Қазақистанлиқ уйғур йигити дуня мусабиқисидә 3-орунға еришти

Ихтиярий мухбиримиз ойған
2022-05-26
Share
Қазақистанлиқ уйғур йигити дуня мусабиқисидә 3-орунға еришти Русийәдә өткән һәрбий нәйзилишип җәң қилиш түри бойичә дуня мусабиқисидә 3-орунға еришкән мунирдин әкрәм. 2022-Йил 24-май, русийә.
RFA/Oyghan

Қазақистандики уйғур өсмүрлири тәнһәрикәтниң һәр хил түрлири бойичә җумһурийәт вә хәлқара дәриҗидә көплигән мувәппәқийәтләргә еришмәктә. Уларниң ичидә бир нәччә мәртәм дуня чемпийони болғанларму бар болуп, улар яш өсмүрләргә үлгә болмақта. Йеқинда русийәниң санкит-петербург шәһиридә өткән тәнһәрикәтниң аз учрайдиған мутләқ-һәқиқий күрәш, йәни һәрбий нәйзилишип җәң қилиш түри бойичә дуня мусабиқиси болуп өткән иди. Униңға 2004-2009-йиллири туғулған оғул вә қизлар һәм улардин чоң әрләр билән аялларму таллап елинған. Мутләқ-һәқиқий күрәшниң хәлқара кеңиши уюштурған мәзкур дуня мусабиқисигә русийә, әзәрбәйҗан, әрмәнийә, белорусийә, грузийә, қазақистан, қирғизистан, молдавийә, моңғулийә, сербийә, сүрийә вә таҗикистан болуп, 12 мәмликәттин 300 дин ошуқ тәнһәрикәтчи қатнашқан.

Русийәдә өткән һәрбий нәйзилишип җәң қилиш түри бойичә дуня мусабиқисидә 3-орунға еришкән мунирдин әкрәм (солда). 2022-Йил 24-май, русийә.
Русийәдә өткән һәрбий нәйзилишип җәң қилиш түри бойичә дуня мусабиқисидә 3-орунға еришкән мунирдин әкрәм (солда). 2022-Йил 24-май, русийә.
RFA/Oyghan

Аммиви ахбарат васитилиридин мәлум болушичә, мәзкур мусабиқидә омумий нәтиҗә бойичә русийә 1-орунни, қазақистан 2-орунни, әрмәнийә 3-орунни игилигән. Қазақистан командиси тәркибидә уйғур тәнһәрикәтчилириму қатнашқан болуп, шуларниң бири алмута вилайити әмгәкчиқазақ наһийәси қизилшәрқ йезисиниң яш тәнһәрикәтчиси мунирдин әкрәм 3-орунға еришип, мис медал билән тәқдирләнгән.

Биз мунирдин әкрәмниң дадиси мухтәрҗан сәйдуллайеф әпәнди билән алақилашқинимизда у мундақ деди: “мунирдин кичикидинла тәнһәрикәткә қизиқип, тоққуз йешида тәнһәрикәтниң челишиш түри бойичә мәһәллимиздә тәнһәрикәт зали йоқ болғанлиқтин үч йил қошна йеза байсейитқа қатнап, мәшқлинип йүрди. Мунирдинниң челишиш билән шуғуллинип келиватқиниға бәш йил болди. Мушу мәһәллимизниң балиси турсунмәһәммәт мушу йеңи йил алдида маңа келип, тәнһәрикәтниң йеңи түри чиқипту, һәрбий нәйзилишип җәң қилиш дегән, шуниңға астанада болидиған мусабиқигә балаңни апирип қатнаштурай, дегән иди. Шу йәрдә оғлум қазақистан чемпийони болуп кәлди. Буниңға биз наһайити хушал болдуқ. Йеқинда униң русийәгә берип, мис медал елип кәлгинигиму қаттиқ хушал болдуқ. Мушу җәһәттә һәммә яқтин қоллап-қувәтлигән юртумға, асасән яшлиримизға чәксиз рәһмитимни ейтимән.”

Русийәдә өткән һәрбий нәйзилишип җәң қилиш түри бойичә дуня мусабиқисидә 3-орунға еришкән мунирдин әкрәм трәнәри турсунмәһәммәт абдуллайәф (солдин биринчи) билән. 2022-Йил 24-май, русийә.
Русийәдә өткән һәрбий нәйзилишип җәң қилиш түри бойичә дуня мусабиқисидә 3-орунға еришкән мунирдин әкрәм трәнәри турсунмәһәммәт абдуллайәф (солдин биринчи) билән. 2022-Йил 24-май, русийә.
RFA/Oyghan

Игилишимизчә, йезиниң илгирки йигитбеши мәрһум нурахун мәтбақийеф, һазирқи йигитбеши нурәхмәт абдуллайеф, қейюмбәк нуридиноф вә башқиларниң рәһбәрликидә йезиниң яшлири һәм чоңлири бирлишип салған тәнһәрикәт зали, һазир мәхсус кийим-кечәк алмаштуридиған вә ююнидиған бөлмилири, мәшқлиниш зали, шундақла башқиму һаҗәтлик нәрсиләргә игә кәспий тәнһәрикәт залиға айланған. Униңға йезида яшаватқан барлиқ милләтләрниң балилири келип, тәҗрибилик тренерларниң қол астида мәшиқлинидикән.

Мунирдин әкрәм 2007-йили алмута шәһиридә туғулған, кейинчә ата-аниси билән өз юрти қизил шәрқ йезисиға көчүп кәлгән. У шу йезидики мухтәр әвезоф намидики оттура мәктәпниң 9-синипини тамамлиғандин кейин шу җайда мәшқлинип кәлмәктикән. У 11-синипни тамамлиғандин кейин өзи арман қилған алий оқуш юртлирида оқушни халайдикән һәм тәнһәрикәт билән шуғуллинишни йәнила давам қилмақчикән.

Русийәдә өткән һәрбий нәйзилишип җәң қилиш түри бойичә дуня мусабиқисидә 3-орунға еришкән мунирдин әкрәмниң әкрәм нурдунофтин пәхрий ярлиқ тапшуруп еливатқан пәйти. 2022-Йил -24май алмута.
Русийәдә өткән һәрбий нәйзилишип җәң қилиш түри бойичә дуня мусабиқисидә 3-орунға еришкән мунирдин әкрәмниң әкрәм нурдунофтин пәхрий ярлиқ тапшуруп еливатқан пәйти. 2022-Йил -24май алмута.
RFA/Oyghan

Радийомиз зияритини қобул қилған җумһурийәтлик уйғур етно-мәдәнийәт мәркизи тәркибидики тәнһәрикәт комитетиниң рәиси әкрәм нурдуноф әпәнди 24-май күни өзниң орунбасарлири, шу җүмлидин челәк райони тәнһәрикәт комитетиниң рәһбири мәсимҗн мәхсум оғли билән әмгәкчиқазақ наһийәсиниң челәк йезисиға берип, челәк райониниң тәнтәрбийә саһәсини көтүриватқан, яшларға үлгә көрситиватқан тәнһәрикәтчиләр билән учришип, уларни тәқдирләш мурасими өткүзгәнлкини тилға алди.

Әкрәм нурдуноф мундақ деди: “турсунмәһәммәт абдуллайеф, нурәхмәт аблуллайеф, полат данахуновға охшаш бизниң даңлиқ тренерлиримизға ‛сахавәт‚ медалини тапшурдуқ. Шундақла биз һәр хил дәриҗидики мусабиқиләргә қатнишип, мукапатлиқ орунларни елип, елимиз қазақистанниң шәнини қоғдиған, хәлқимизни чоң хушаллиққа чөмдүргәнгән яш тәнһәрикәтчилиримиздин йеқинда санкит-петербургтики дуня мусабиқисидә 3-орун алған мунирдин әкрәмгә мәдәнийәт мәркизиниң пәхрий ярлиқини тапшурдуқ. Шуңа мән муниридинни пүткүл қазақистан уйғурлири намидин чин қәлбимдин тәбрикләймән. Шу яшлиримизни маддий вә мәнивий җәһәтләрдин қоллаватқан уларниң ата-анилириға, барлиқ җанкөйәрлиримизгә чоң рәһмитимни ейтимән!”

Русийәдә өткән һәрбий нәйзилишип җәң қилиш түри бойичә дуня мусабиқисигә қатнашқан қазақистан командисиниң бир гурупписи. 2022-Йил 24-май, алмута.
Русийәдә өткән һәрбий нәйзилишип җәң қилиш түри бойичә дуня мусабиқисигә қатнашқан қазақистан командисиниң бир гурупписи. 2022-Йил 24-май, алмута.
RFA/Oyghan

Мәлуматларға қариғанда, қазақистан уйғурлири пәқәт қазақистан үчүнла әмәс, бәлки әйни вақитларда сабиқ совет иттипақиға шан-шәрәп кәлтүргән абдурешит абдурахманоф, закир тохтийеф, ғопур тохтийеф, һемит тохтахуноф қатарлиқ даңлиқ уйғур тәнһәрикәтчилири билән пәхирлинидикән. Һазир улар тәнһәрикәтниң һәр хил түрлири бойичә йетилип чиқиватқан уйғур яшларни маддий вә мәнивий қоллап-қувәтләп кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт