Qazaqistanliq Uyghur yigiti dunya musabiqiside 3-orun'gha érishti

Ixtiyariy muxbirimiz oyghan
2022-05-26
Share
Qazaqistanliq Uyghur yigiti dunya musabiqiside 3-orun'gha érishti Rusiyede ötken herbiy neyziliship jeng qilish türi boyiche dunya musabiqiside 3-orun'gha érishken munirdin ekrem. 2022-Yil 24-may, rusiye.
RFA/Oyghan

Qazaqistandiki Uyghur ösmürliri tenheriketning her xil türliri boyiche jumhuriyet we xelq'ara derijide köpligen muweppeqiyetlerge érishmekte. Ularning ichide bir nechche mertem dunya chémpiyoni bolghanlarmu bar bolup, ular yash ösmürlerge ülge bolmaqta. Yéqinda rusiyening sankit-pétérburg shehiride ötken tenheriketning az uchraydighan mutleq-heqiqiy küresh, yeni herbiy neyziliship jeng qilish türi boyiche dunya musabiqisi bolup ötken idi. Uninggha 2004-2009-yilliri tughulghan oghul we qizlar hem ulardin chong erler bilen ayallarmu tallap élin'ghan. Mutleq-heqiqiy küreshning xelq'ara kéngishi uyushturghan mezkur dunya musabiqisige rusiye, ezerbeyjan, ermeniye, bélorusiye, gruziye, qazaqistan, qirghizistan, moldawiye, mongghuliye, sérbiye, süriye we tajikistan bolup, 12 memlikettin 300 din oshuq tenheriketchi qatnashqan.

Rusiyede ötken herbiy neyziliship jeng qilish türi boyiche dunya musabiqiside 3-orun'gha érishken munirdin ekrem (solda). 2022-Yil 24-may, rusiye.
Rusiyede ötken herbiy neyziliship jeng qilish türi boyiche dunya musabiqiside 3-orun'gha érishken munirdin ekrem (solda). 2022-Yil 24-may, rusiye.
RFA/Oyghan

Ammiwi axbarat wasitiliridin melum bolushiche, mezkur musabiqide omumiy netije boyiche rusiye 1-orunni, qazaqistan 2-orunni, ermeniye 3-orunni igiligen. Qazaqistan komandisi terkibide Uyghur tenheriketchilirimu qatnashqan bolup, shularning biri almuta wilayiti emgekchiqazaq nahiyesi qizilsherq yézisining yash tenheriketchisi munirdin ekrem 3-orun'gha ériship, mis médal bilen teqdirlen'gen.

Biz munirdin ekremning dadisi muxterjan seydullayéf ependi bilen alaqilashqinimizda u mundaq dédi: “Munirdin kichikidinla tenheriketke qiziqip, toqquz yéshida tenheriketning chélishish türi boyiche mehellimizde tenheriket zali yoq bolghanliqtin üch yil qoshna yéza bayséyitqa qatnap, meshqlinip yürdi. Munirdinning chélishish bilen shughullinip kéliwatqinigha besh yil boldi. Mushu mehellimizning balisi tursunmehemmet mushu yéngi yil aldida manga kélip, tenheriketning yéngi türi chiqiptu, herbiy neyziliship jeng qilish dégen, shuninggha astanada bolidighan musabiqige balangni apirip qatnashturay, dégen idi. Shu yerde oghlum qazaqistan chémpiyoni bolup keldi. Buninggha biz nahayiti xushal bolduq. Yéqinda uning rusiyege bérip, mis médal élip kelginigimu qattiq xushal bolduq. Mushu jehette hemme yaqtin qollap-quwetligen yurtumgha, asasen yashlirimizgha cheksiz rehmitimni éytimen.”

Rusiyede ötken herbiy neyziliship jeng qilish türi boyiche dunya musabiqiside 3-orun'gha érishken munirdin ekrem treneri tursunmehemmet abdullayef (soldin birinchi) bilen. 2022-Yil 24-may, rusiye.
Rusiyede ötken herbiy neyziliship jeng qilish türi boyiche dunya musabiqiside 3-orun'gha érishken munirdin ekrem treneri tursunmehemmet abdullayef (soldin birinchi) bilen. 2022-Yil 24-may, rusiye.
RFA/Oyghan

Igilishimizche, yézining ilgirki yigitbéshi merhum nuraxun metbaqiyéf, hazirqi yigitbéshi nur'exmet abdullayéf, qéyyumbek nuridinof we bashqilarning rehberlikide yézining yashliri hem chongliri birliship salghan tenheriket zali, hazir mexsus kiyim-kéchek almashturidighan we yuyunidighan bölmiliri, meshqlinish zali, shundaqla bashqimu hajetlik nersilerge ige kespiy tenheriket zaligha aylan'ghan. Uninggha yézida yashawatqan barliq milletlerning baliliri kélip, tejribilik trénérlarning qol astida meshiqlinidiken.

Munirdin ekrem 2007-yili almuta shehiride tughulghan, kéyinche ata-anisi bilen öz yurti qizil sherq yézisigha köchüp kelgen. U shu yézidiki muxter ewézof namidiki ottura mektepning 9-sinipini tamamlighandin kéyin shu jayda meshqlinip kelmektiken. U 11-sinipni tamamlighandin kéyin özi arman qilghan aliy oqush yurtlirida oqushni xalaydiken hem tenheriket bilen shughullinishni yenila dawam qilmaqchiken.

Rusiyede ötken herbiy neyziliship jeng qilish türi boyiche dunya musabiqiside 3-orun'gha érishken munirdin ekremning ekrem nurdunoftin pexriy yarliq tapshurup éliwatqan peyti. 2022-Yil -24may almuta.
Rusiyede ötken herbiy neyziliship jeng qilish türi boyiche dunya musabiqiside 3-orun'gha érishken munirdin ekremning ekrem nurdunoftin pexriy yarliq tapshurup éliwatqan peyti. 2022-Yil -24may almuta.
RFA/Oyghan

Radiyomiz ziyaritini qobul qilghan jumhuriyetlik Uyghur étno-medeniyet merkizi terkibidiki tenheriket komitétining re'isi ekrem nurdunof ependi 24-may küni özning orunbasarliri, shu jümlidin chélek rayoni tenheriket komitétining rehbiri mesimjn mexsum oghli bilen emgekchiqazaq nahiyesining chélek yézisigha bérip, chélek rayonining tenterbiye sahesini kötüriwatqan, yashlargha ülge körsitiwatqan tenheriketchiler bilen uchriship, ularni teqdirlesh murasimi ötküzgenlkini tilgha aldi.

Ekrem nurdunof mundaq dédi: “Tursunmehemmet abdullayéf, nur'exmet ablullayéf, polat danaxunowgha oxshash bizning dangliq trénérlirimizgha ‛saxawet‚ médalini tapshurduq. Shundaqla biz her xil derijidiki musabiqilerge qatniship, mukapatliq orunlarni élip, élimiz qazaqistanning shenini qoghdighan, xelqimizni chong xushalliqqa chömdürgen'gen yash tenheriketchilirimizdin yéqinda sankit-pétérburgtiki dunya musabiqiside 3-orun alghan munirdin ekremge medeniyet merkizining pexriy yarliqini tapshurduq. Shunga men muniridinni pütkül qazaqistan Uyghurliri namidin chin qelbimdin tebrikleymen. Shu yashlirimizni maddiy we meniwiy jehetlerdin qollawatqan ularning ata-anilirigha, barliq janköyerlirimizge chong rehmitimni éytimen!”

Rusiyede ötken herbiy neyziliship jeng qilish türi boyiche dunya musabiqisige qatnashqan qazaqistan komandisining bir guruppisi. 2022-Yil 24-may, almuta.
Rusiyede ötken herbiy neyziliship jeng qilish türi boyiche dunya musabiqisige qatnashqan qazaqistan komandisining bir guruppisi. 2022-Yil 24-may, almuta.
RFA/Oyghan

Melumatlargha qarighanda, qazaqistan Uyghurliri peqet qazaqistan üchünla emes, belki eyni waqitlarda sabiq sowét ittipaqigha shan-sherep keltürgen abduréshit abduraxmanof, zakir toxtiyéf, ghopur toxtiyéf, hémit toxtaxunof qatarliq dangliq Uyghur tenheriketchiliri bilen pexirlinidiken. Hazir ular tenheriketning her xil türliri boyiche yétilip chiqiwatqan Uyghur yashlarni maddiy we meniwiy qollap-quwetlep kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet