Uyghur tenheriketchisi nariman qurbanof asiya musabiqiside kümüsh médalgha érishti

Ixtiyariy muxbirimiz oyghan
2022.06.23
Share on WhatsApp
Share on WhatsApp
Uyghur tenheriketchisi nariman qurbanof asiya musabiqiside kümüsh médalgha érishti Dohada ötken gimnastika boyiche asiya musabiqiside nariman qurbanof yaghach atta oyun körsitish türi boyiche ikkinchi orunni igiligen. 2022-Yili 18-iyun, qatar.
RFA/Oyghan

Kéyinki waqitlarda qazaqistandiki rus tilliq ammiwi axbarat wasitiliri we ijtima'iy taratqulirining diqqiti gimnastika boyiche dunya musabiqiliride yaxshi körsetküchlerge érishiwatqan Uyghur yigiti nariman qurbanofta bolmaqta. Yéqinda, yeni 15-18-iyun künliri qatar paytexti doxada ötken gimnastika boyiche asiya musabiqisige qazaqistan komandisimu qatniship, omumiy netijiler boyiche 5-orunni igiligen. Shu jümlidin komanda ezasi, yeni qazaqistanning almuta shehiride tughulup ösken Uyghur millitining wekili nariman qurbanof kümüsh médalgha érishken. U ilgirimu qazaqistanning shenini qoghdap, bir nechche dunya musabiqilirige qatnashqan we bu jeryanda chong utuqlar qazinip, komandisini, ata-anisini, ustazlirini, pütkül Uyghur jama'itini xushal qilghanidi. Bu qétim nariman qurbanof toghriliq xewerler uning resimi bilen qazaqistanning “Nur”, “Qaz tag”, “Litér”, “Qazaqaxbarat” oxshash eng inawetlik axbarat wasitiliride élan qilin'ghan.

Mezkur ammiwi axbarat wasitiliridin melum bolushiche, doxada ötken gimnastika boyiche asiya musabiqiside dunyaning her qaysi memliketliridin kelgen tenheriketchiler gimnastikining her xil türliri boyiche öz hünerlirini namayan qilghan. Nariman qurbanof bu qétimmu yaghach atta oyun körsitish türi boyiche maharitini namayan qilip, ikkinchi orunni igiligen bolsa, birinchi orunni iyordaniye, üchinchi orunni xitay gimnastikichisi igiligen.

Dohada ötken gimnastika boyiche asiya musabiqiside nariman qurbanof(solda) yaghach atta oyun körsitish türi boyiche ikkinchi orunni igiligen. 2022-Yili 18-iyun, qatar.
Dohada ötken gimnastika boyiche asiya musabiqiside nariman qurbanof(solda) yaghach atta oyun körsitish türi boyiche ikkinchi orunni igiligen. 2022-Yili 18-iyun, qatar.
RFA/Oyghan

Biz nariman qurbanof bilen alaqileshkinimizde u radiyomiz ziyaritini qobul qilip, mundaq dédi: “Bu méning qit'elerning öz aldigha ötküzgen musabiqisidiki tunji médalim. Bu qétim men maharitimni xéli yaxshi orunlidim. Öz aldimgha ijra qilip körsitimen dep oylighan barliq qiyin maharetlerni toluq körsitelmigenlikim üchün altun médalni qoldin bérip qoydum. Komandimizgha besh eng küchlük komandilar qatarigha kirish we ikki médalni qolgha keltürüsh wezipisi qoyulghanidi. Shuninggha tiriship, biz heqiqetenmu besh eng küchlük komanda qatarigha kirip, ikki médalgha érishtuq we dunya musabiqisige ruxset qeghizi alduq. Men kümüsh médal, sepdishim milat karimi mis médalgha érishtuq. Méning asasiy riqabetchim teywenlik li chinkey boldi. U ötken yili tenheriketning mushu türi boyiche olimpik chémpiyoni bolghanidi. Men uning bilen burundinla musabiqilishishni arman qilghan. Bu qétim men uni yéngiwaldim. Men bir nechche xataliqlarni ötküzdüm. Shuning üchün altun médalgha érishelmidim. Emma asiya musabiqiside kümüsh médalmu bu xéli munasip netije. Men hazir mushu yil awghust éyida bolidighan islam ellirining musabiqisige, andin noyabirda bolidighan dunya musabiqisige teyyarliniwatimen. Méning bash meqsitim altun médal üchün küresh qilish”.

Radiyomiz ziyaritini qobul qilghan “Kéntawr” qabiliyetlik tenheriketchilerge yardem qilish jem'iyetlik fondining prézidénti, qazaqistanning xizmet körsetken trénér, nariman qurbanofning ustazi mexmut iskenderof ependi doxada intayin chong derijide musabiqining bolup, uningda shagirtlirining yetken utuqigha nahayiti xushal bolghanliqini otturigha qoyup, mundaq dédi: “Pütkül asiya, jümlidin 15tin oshuq eng küchlük komandilar qatnashti. Uninggha xitay, yaponiye, koréye, wiyétnam, teywen'ge oxshash gimnastika boyiche küchlük döletlerning olimpik musabiqiliri chémpiyonliri, köp mertem dunya chémpiyoni atalghan tenheriketchiler ishtirak qildi. Heqiqetenmu bu heywetlik musabiqe boldi. Mana shundaq küchlük komandilarning qatnishishigha qarimay, biz eng küchlük besh komanda sépige kirishke tirishtuq hem meqsitimizge yettuq. Emdi mushu utuqimiz komandimizgha öktebir éyida en'gliye shehiri liwérpulda ötidighan dunya musabiqisige qatnishishigha yol achti”.

Mexmut iskenderof qazaqistanliq tenheriketchilerning, bolupmu nariman qurbanof bilen milat karimining bu qétimqi utuqining qazaqistan üchün chong yéngiliq bolghanliqini bildürdi.

U mundaq dédi: “Nariman özini tonutti. Uning tizimida dunya musabiqisining bir nechche basquchliri boyiche mis médallarmu, kümüsh médallarmu, altun médallarmu bar. Lékin asiya musabiqisi médali yoq idi. Nariman doxada dunyaning eng küchlük tenheriketchiliri bilen küreshke chüshti. Bu chong gep. Mezkur musabiqide, elwette, yiqilip chüshkenlermu boldi. Xataliq ötküzgenlermu boldi. Nariman bu qétim özini qattiq saqlidi. Hetta bezi meshiqlirini addiylashturushqa toghra keldi. Shuning üchün ikkinchi orun'gha chüshüp qaldi. Her bir herikette tenheriketchining psixologiyesimu chong rol oynaydu. Narimanni bu tereptinmu men yaxshi bilimen. Uning hazir keypiyati üstün. Emdi nariman meshiqlirini peydin-pey murekkepleshtüridu. Milat karimimu yaxshi hüner körsetti. Uningmu özige xas alahidilikliri bar.”

Mexmut iskenderofning éytishiche, qazaqistanliq gimnastikichilar, jümlidin qazaqistanliq Uyghur tenheriketchiler kélechektimu chong utuqlarni qolgha keltürüshke bar wujudi bilen tirishmaqta. Ular hazir özlirining yash bolghinigha qarimay, chong pilanlarni qurmaqta. Melum bolushiche, qazaqistan Uyghurliri arisidin tenheriketning boks, taykewando( yekmuyek élishish ), jiyu jitsu(biraziliyeche élishish), chambashchiliq, gimnastika we bashqa türliri boyiche dunya chémpiyonliri yétiship chiqqanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet