Qazaqistanning yarkent shehiride tenheriket chémpiyonliri teqdirlendi

• Ixtiyariy muxbirimiz oyghan
  2022-09-07

Yéqinda qazaqistanning yarkent shehiride orunlashqan panfilof nahiyelik Uyghur medeniyet merkizining mejlis zalida bolup ötken uchrishishta jumhuriyet we dunya derijiside tonulghan tenheriketchiler teqdirlendi. Uninggha jem'iyetlik birleshmiler wekilliri, ziyaliylar, yurt-jama'et aktipliri qatnashti.

Qazaqistanning panfilof nahiyesi, yeni yarkent tewesi Uyghur éli bilen chégridash rayon bolup, uningda qazaqlar, Uyghurlar we bashqimu milletler yashaydu. Eyni waqitlarda bu yurttin köpligen dölet we medeniyet erbabliri, yazghuchilar, sen'etkarlar, igilik rehberliri we bashqilar yétilip chiqqan. Kéyinki waqitlarda bu rayondin yash tenheriketchilermu terbiyilinip chiqiwatmaqta. Ular tenheriketning her xil türliri boyiche jumhuriyetlik we dunya miqyasida musabiqilerge qatniship, zor netijilerge érishmekte. Shular ichide tenheriketning “Gréppling”, yeni yéqindin arilash chélishish türi boyiche musabiqilerge qatnashqanlarmu bar.

“Gréppling” adette bir nechche xil chélishish, shu jümlidin biraziliyede jyu-jitsuning téxnikisini öz ichige alghan ten-heriketning bir türidur. Nur-sultanda ötken bu masabiqe “Gréppling” heweskarlirining dunya birleshmisi teripidin uyushturulghan.

Yarkent shehiride ötken uchrishishning uyushturulushigha memliket paytexti nur-sultan shehiride “Gréppling”, yeni yéqindin arilash chélishish türi boyiche yash ösmürler arisida bolup ötken asiya musabiqisi asasiy seweb bolghan. Uningda sözge chiqqan nahiyelik Uyghur merkizining re'isi azad gayitof, jumhuriyetlik Uyghur étno-medeniyet merkizi bashqarmisining ezasi sabit hajim yüsüpof, péshqedem ustaz alimjan tashmetof, medeniyet merkizi yénidiki xanim-qizlar kéngishining re'isi mahinur ayupowalar uchrishishqa teklip qilin'ghan sen'etkarlar bilen bir qatarda köp sandiki tenheriketchilernimu érishken utuqliri bilen qizghin tebriklep, sowghilirini tapshurdi. Shular ichide yéqinda amérika qoshma shtatlirining sharlott shehiride ötken artisliq su üzüsh boyiche dunya musabiqiside mis médalgha érishken yasmina islamowamu boldi.

Uchrishishtin üch kün ilgiri yarkent ahalisi nur-sultan shehiridin qaytqan asiya chémpiyonlirini daghdughiliq kütüwaldi.

Ene shu asiya musabiqiside birinchilikke érishken farux merüpjanofning éytishiche, “Gratsiyabarra-yarkent” kulubidin 20 ge yéqin tenheriketchi qatniship, ularning 19 nepiri chémpiyon bolghan. Alpamis usabayéf, ilyas abdullayéf, sayit iminof, safina salaydinowa shular jümlisidin. Mezkur kulubni hazir chélishishning bir nechche türliri boyiche jumhuriyet we xelq'ara derijidiki tenheriket mahiri bextiyar tayipof bashquridu. Omumen musabiqige rusiye, qirghizistan, özbékistan, qazaqistandin bolup, 100 din oshuq tenheriketchi ishtirak qilghan.

2006-Yili yarkent shehiride tughulup, hazir jambul namidiki ottura mektipining 11-sinipida oquwatqan farux merüpjanof mezkur musabiqide yéngip, altun médalgha érishken.

U mundaq dédi: “Méning jyu-jitsu bilen shughulliniwatqinimgha bu yil töt yil boldi. Méning tenheriketke qiziqqanliqimgha ata-anam qarshi bolmidi. Mekteptiki mu'ellimlirimmu qollidi. Bu men özüm talliwalghan ten-heriket türi bolghanliqtin men uni axirighiche dawam qilimen, dep oylaymen. Bu méning tunji qétim yuqiri derijidiki musabiqige qatniship turghinim. Shériklirimni yéngip, manga médal tapshurghanda qattiq xushal boldum we meghrurlandim. Bu musabiqige qatnishishtin ilgiri bizge qattiq telep qoydi. Uzaq tallidi. Qazaqistan boyiche bir nechche musabiqilerge qatnashtuq. Emdi méning aldimgha qoyghan meqsitim dunya musabiqisige qatnishish. Bu méning eng birinchi chong utuqum. Elwette, men birinchi nöwette, méni da'im qollap kelgen ata-anamgha rehmet éytimen. Shundaqla bizning trénérimiz bextiyar tayipofning roli chong boldi. U waqtini, bilimini, küchini ayimay, da'im biz bilen bille boldi. Uning bashchiliqida bizning komanda bir nechche xelq'ara musabiqilerge qatniship, ghalip ataldi. Bizning bu qétimqi utuqimizni yarkent xelqi kochigha chiqip qarshi aldi. Biz buningdin qattiq rohlanduq.”

Nahiyelik Uyghur medeniyet merkizi re'isining orunbasari turghanjan zayitof mundaq dédi: “Yarkent tewesi köpligen tenheriketchiliri bilen pexirlinidu. Bu olimpik oyunlirining chémpiyoni nurbaqit téngizbayéf, jyu-jitsuni yarkentke élip kelgen arman rozaxunof, hazirqi meshiqlerni ügetküchiler yüsüpjan weliyéf, ilshat osmanof, bextiyar tayipof, ekwerjan niyazof. Chong chighan ottura mektipining tenterbiye mu'ellimi eziz abdusalamof bilen yalqunjan ghojashéfning shagirtliri-walibolchi qizlar qazaqistan jumhuriyitining chémpiyonliri ataldi. Nahiyede kichik balilar we ösmürler tenheriket mektipi bilen 50 tin oshuq kulubta putbol, walibol, shahmat, shashka, jyu-jitsu we bashqilardin meshiqliniwatqan balilar köp.”

Yarkent tewesidin ilgirimu tenheriketning har xil türliri boyiche chémpiyonlar chiqqan. Qazaqistan, asiya qit'esi we dunya boyiche ötküzülgen musabiqilerde bir nechche mertem chémpiyon bolghanlarning mahiri gülminem iminowamu jyu-jitsu we “Gréppling” bilen shughullinip kéliwatidu. U yuqirida atalghan bextiyar tayipofning shagirti.