Uyghurlarning jiddiy weziyiti yawropadiki ikki Uyghur teshkilatining rishtisini ching baghlidi

Ixtiyariy muxbirimiz ekrem
2019-10-03
Élxet
Pikir
Share
Print
Norwégiye Uyghur komitétining re'isi bextiyar ömer(soldin birinchi) we bélgiye Uyghur jem'iyitining re'isi yashar(soldin ikkinchi) ependiler hemkarliq ornatqan. 2019-Yili 3-öktebir, bélgiye.
Norwégiye Uyghur komitétining re'isi bextiyar ömer(soldin birinchi) we bélgiye Uyghur jem'iyitining re'isi yashar(soldin ikkinchi) ependiler hemkarliq ornatqan. 2019-Yili 3-öktebir, bélgiye.
RFA/Ekrem

Norwégiye Uyghur komitéti bilen bélgiye Uyghur jem'iyiti milliy küreshning éhtiyaji seweblik hemkarliq ornatti.

3-Öktebir bélgiye paytexti biryusséldin muhajirettiki Uyghur teshkilatlirigha yaxshi örnek bolghusi bir xosh xewer yétip keldi. Bélgiye Uyghur jem'iyitining re'isi yashar we norwégiye Uyghur komitétining re'isi, "Uyghur edliye arxip ambiri" ning mes'uli bextiyar ömer ependiler Uyghur diyarining nöwettiki jiddiy weziyitini hem muhajirettiki milliy küreshning éhtiyajini nezerde tutup, bundin kéyin birlik ichide ortaq küresh qilish üchün ikki teshkilatning hemkarliq munasiwitini ornatqan.

Bextiyar ömer ependi bu heqte toxtalghanda bundaq bir hemkarliqni wujudqa chiqirishqa nöwettiki Uyghur weziyiti we muhajirettiki dewaning jiddiy éhtiyajining türtke bolghanliqini bayan qildi.

Uning ilgiri sürüshiche, hazir chet´eldiki Uyghurlar merkezliship olturaqlashqan dölet we sheherlerde köpligen Uyghur teshkilatliri mewjut bolsimu, ular xitaygha qarshi namayishlarda bir arigha kileligenni hésabqa almighanda köpinche halda hemmisi öz aldigha heriket qilidiken. Muhajirettiki dewaning tereqqiyati we tesir küchini zoraytish üchün öz'ara hemkarliship heriket qilishning ünümi téximu zor bolidiken. Buning üchün ikki teshkilatning yash rehberliri 2-öktebir biryussélda bir arigha kélip resmiy hemkarliq ornatqan hemde "Uyghur edliye arxip ambiri" xizmitining kölimini yenimu kéngeytish üchün biryussélda mexsus bir xizmetchi xadim teyinleshni qarar qilishqan.

Bélgiye yawropa ittipaqining siyasiy merkizi bolup, Uyghur siyasiy teshkilatliri bu yerde Uyghur dewasini kücheytishke izchil köngül bölüp kelmekte. 10-Iyul b d t kishilik hoquq aliy komissarliqigha Uyghur diyaridiki jaza lagérlirini cheklesh toghrisida bayanat bergen 25 döletning 22 si yawropa ittipaqigha eza döletlerdur. Bélgiye paytexti biryussélda bélgiye Uyghur jem'iyiti pa'aliyet élip barmaqta.

Bélgiye Uyghur jem'iyitining re'isi yashar ependi bu toghrisida qarashlirini bayan qilghanda bundaq bir hemkarliqni ornitishqa sikandinawiye yérim arilida pa'al heriket qiliwatqan norwégiye Uyghur komitétining netijilik pa'aliyetlirining türtke bolghanliqini eskertti. U sözide bu hemkarliqning ikki teshkilatning öz-ara tejribe almashturup ortaq heriket qilishigha paydisi bolupla qalmay, "Uyghur edliye arxip ambiri" xizmitining küchiyishigimu töhpisi bolidighanliqini tilgha aldi.

"Uyghur edliye arxip ambiri" 2018-yili ishqa kirishken bolup, u muhajirettiki Uyghurlar arisida xitayning jaza lagérliridiki qérindashliri toghrisida guwahliq bérish, melumat bérishni teshebbus qiliwatqan bir organ idi. Ular toplighan 10 mingdin artuq Uyghurning tutqundiki qérindashliri toghrisida bergen melumatliri d u q teripidin yawropa parlaménti hemde b d t kishilik hoquq aliy kéngishige yollan'ghan. Nöwette bu organ türlük guwahliq sin filimlirini ishlep, in'glizche tillarda tarqatmaqta. Kélechekte xitayning jaza lagérliri siyasitining janliq delili bolghusi bu arxiplarni toplash xizmitining kölimini yenimu kéngeytish bu organning nöwettiki jiddiy wezipisi bolup hésablinidiken.

Pikirler (0)
Share
Toluq bet