Uyghur teshkilatliri b d t diki yighinda shirketlerni insaniyetke qarshi jinayet we irqiy qirghinchiliqtin payda almasliqqa chaqirdi

25-Noyabirdin 27-noyabirghiche shiwéytsariyening jenwe shehirige jaylashqan birleshken döletler teshkilati bash ishtabida, “Birleshken döletler teshkilati soda we kishilik hoquq munbiri” namida yighinlar ötküzülüwatqan bolup, bu munberge Uyghur teshkilatlirimu qatniship, nöwettiki xitayning dawam qiliwatqan irqiy qirghinchiliqi we Uyghur mejburiy emgikining mewjutluqini yighin qatnashquchilirigha xatiriletken.

Bu qétimqi “Birleshken döletler teshkilati kishilik hoquq munbiri” ge amérika Uyghur birleshmisi re'isi elfidar iltebir, dunya Uyghur qurultiyi fondi re'isi gheyur qurban, Uyghur kishilik hoquq qurulushidin pétér irwén, kommunizm qurbanliri xatire fondi tetqiqatchisi adréyan zénz qatarliqlar qatnashqan. Bu munberning 25-noyabir künidiki yighinida elfidar iltebir xanim so'al sorash shekli bilen Uyghur mesilisini otturigha qoyghan.

 U sözide: “Men qatnashquchilarning sözini estayidilliq bilen anglidim, men bu yerde bir mesilini, yeni, adilliq bilen yéshil énérgiyege yötkilish üchün meblegh salghuchilarning küntaxta we yéshil énérgiye saheside yenila mewjut bolup dawam qiliwatqan Uyghur mejburiy emgikini toxtitishi üchün qandaq xizmetlerni qiliwatidu dégenlerni sorimaqchimen” deydu.

Biz bu munasiwet bilen elfidar iltebir xanimni ziyaret qilduq, u özlirining pa'aliyetliri heqqide melumat berdi.

B d t soda we kishilik hoquq munbirige dunyadiki her qaysi hökümetler, soda sahesi, puqralar jem'iyetliri, adwokatliq orunliri, meblegh salghuchilar, b d t ning her qaysi komitétliri, kishilik hoquq organliri, ishchilar uyushmiliri, tetqiqatchilar, siyasetchiler we her qaysi döletlerning b d t diki elchiliri qatnashqan.

RFA/Hebibulla Izchi

Bu munasiwet bilen birleshken döletler teshkilatidiki bu yighin'gha bérlindin kélip qatnashqan dunya Uyghur qurultiyi fondi re'isi, qurultay bérlin ishxanisi diréktori gheyur qurbanni ziyaret qilduq. U bu yighinda élip bérilghan bezi xizmetler heqqidiki melumatlarni ortaqlashti:

Bu munberde yene, döletler, shexsler, teshkilatlar öz-ara tejribe almashturush élip bérip, her qaysi döletlerning kishilik hoquqqa hörmet qilishini ilgiri sürüsh üchün teklip tewsiyeler sunulidu.

 Merkizi amérikadiki Uyghur kishilik hoquq qurulushidin pétér irwénmu bu yighin'gha qatnishiwatqan bolup, u radiyomizning ziyaritige yazmiche jawab bérip, Uyghur kishilik hoquq qurulushining öz hemkarlashquchiliri bilen birlikte “B d t soda we kishilik hoquq munbiri” ni Uyghur mejburiy emgikini toxtitishqa chaqirghanliqini, özining hökümet wekilliri we her qaysi teshkilatlardin Uyghur mesilisige téximu köp diqqet qilishni telep qilghanliqini, bolupmu xelq'araliq shirketlerni Uyghur rayonidiki mejburiy emgek, insaniyetke qarshi jinayet we irqiy qirghinchiliqtin payda almasliqigha dewet qilghanliqini bildürdi.