“Xelq'ara weziyet we sherqiy türkistan” namliq zhurnalning tunji sani yoruq kördi

• Ixtiyariy muxbirimiz erkin tarim
  2021-04-15

Merkizi enqerediki Uyghur tetqiqat inistituti teripidin tesis qilin'ghan “Xelq'ara weziyet we sherqiy türkistan” namliq zhurnalning tunji sani oqurmenliri bilen yüz körüshti.

Mezkur zhurnal siyasiy, iqtisadiy, ijtima'iy we ilmiy mezmundiki pesillik zhurnal bolup, tunji sanida mezkur zhurnalning qanuniy wekili, istiratégiye mutexessisi doktor erkin ekremning zhurnalgha yazghan kirish sözi, zhurnalning bash tehriri mewlan tengriqut ependining “Trampning siyasiy mirasi”, yéngi zélandiyediki Uyghur ziyaliysi melikzade xanim yazghan “Xitay-yéngi zélandiye erkin soda shertnamisi”, muhemmed'eli orxun ependi yazghan “Xitay armiyesi we zamaniwiylashturush qedemliri”, yalqun ulughyol ependi yazghan “Xitayche birliksep endizesi: b d t omumiy kéngishi saylam analizidin yekünler” we adiljan erUyghur yazghan “Wehime kültüri” qatarliq maqalilargha orun bérilgen. Zhurnalning axirida yéngi neshir qilin'ghan bir qanche muhim kitab tonushturulghan.

Biz mezkur zhurnal we zhurnalning bu sanida élan qilin'ghan maqalilar toghrisida téximu tepsiliy melumat igilesh üchün Uyghur tetqiqat inistitutining mudiri, doktor erkin ekrem ependi we zhurnalning bash tehriri mewlan tengriqut ependiler bilen söhbet élip barduq.

Doktor erkin ekrem ependi sherqiy türkistan dewasining 2018-yili xelq'araning muhim mesilisige aylan'ghanliqini, shunga dewani yaxshi élip bérish üchün xelq'ara weziyetni yaxshi bilish kéreklikini, buninggha oxshash bir qatar weziyetning teqezzasi yüzsidin “Xelq'ara weziyet we sherqiy türkistan” namliq bu zhurnalni tesis qilghanliqini bayan qildi.

Mezkur zhurnalning tunji sanida 5 parche maqalige orun bérilgen bolup, bularning köpi xelq'ara weziyet toghrisidiki maqaliler iken. Doktor erkin ekrem zhurnalning bu sanida orun bérilgen maqalilarning mezmuni toghrisida melumat berdi.

Mezkur zhurnalning bash tehriri istanbuldiki ibni xaldun uniwérsitétining doktoranti mewlan tengriqut ependi zhurnalning xelq'ara ölchemdiki bir zhurnal ikenlikini, maqalilar mezkur zhurnnalning eser bahalash hey'iti teripidin körülüp testiqlan'ghandin kéyin, élan qilinighanliqini bayan qildi.

Merkizi enqerede turushluq Uyghur inistituti teripidin tesis qilin'ghan “Xelq'ara weziyet we sherqiy türkistan” namliq zhurnalning qanuniy wekili, doktor erkin ekrem ependi bu zhurnalda maqale élan qilmaqchi bolghan aptorlarning ilmiy salahiyetke ige yaki mol tejribige ige mutexessisler bolushi kéreklikini eskertip ötti.

Mewlan tengriqut ependi bu zhurnalning eng muhim ehmiyitining biri uning Uyghur tilining ilmiy tetqiqat saheside ishlitilishige sehne hazirlash bolghanliqini tekitlep ötti.

“Xelq'ara weziyet we sherqiy türkistan” namliq bu zhurnalning eser bahalash hey'iti doktor erkin ekrem, abdurehim dölet, ruqiye turdush, nijat turghun, adiljan erUyghur we yalqun ulughyol qatarliq kishilerdin terkib tapqan iken.