"хәлқара вәзийәт вә шәрқий түркистан" намлиқ журналниң тунҗи сани йоруқ көрди

Ихтиярий мухбиримиз әркин тарим
2021-04-15
Share
Мәркизи әнқәрәдики уйғур тәтқиқат иниститути тәрипидин тәсис қилинған "хәлқара вәзийәт вә шәрқий түркистан" намлиқ журналниң тунҗи сани оқурмәнлири билән йүз көрүшти.
RFA/Erkin Tarim

Мәркизи әнқәрәдики уйғур тәтқиқат иниститути тәрипидин тәсис қилинған "хәлқара вәзийәт вә шәрқий түркистан" намлиқ журналниң тунҗи сани оқурмәнлири билән йүз көрүшти.

Мәзкур журнал сиясий, иқтисадий, иҗтимаий вә илмий мәзмундики пәсиллик журнал болуп, тунҗи санида мәзкур журналниң қануний вәкили, истиратегийә мутәхәссиси доктор әркин әкрәмниң журналға язған кириш сөзи, журналниң баш тәһрири мәвлан тәңриқут әпәндиниң "трампниң сиясий мираси", йеңи зеландийәдики уйғур зиялийси мәликзадә ханим язған "хитай-йеңи зеландийә әркин сода шәртнамиси", муһәммәдәли орхун әпәнди язған "хитай армийәси вә заманивийлаштуруш қәдәмлири", ялқун улуғйол әпәнди язған "хитайчә бирликсәп әндизәси: б д т омумий кеңиши сайлам анализидин йәкүнләр" вә адилҗан әруйғур язған "вәһимә күлтүри" қатарлиқ мақалиларға орун берилгән. Журналниң ахирида йеңи нәшир қилинған бир қанчә муһим китаб тонуштурулған.

Биз мәзкур журнал вә журналниң бу санида елан қилинған мақалилар тоғрисида техиму тәпсилий мәлумат игиләш үчүн уйғур тәтқиқат иниститутиниң мудири, доктор әркин әкрәм әпәнди вә журналниң баш тәһрири мәвлан тәңриқут әпәндиләр билән сөһбәт елип бардуқ.

Доктор әркин әкрәм әпәнди шәрқий түркистан дәвасиниң 2018-йили хәлқараниң муһим мәсилисигә айланғанлиқини, шуңа дәвани яхши елип бериш үчүн хәлқара вәзийәтни яхши билиш керәкликини, буниңға охшаш бир қатар вәзийәтниң тәқәззаси йүзсидин "хәлқара вәзийәт вә шәрқий түркистан" намлиқ бу журнални тәсис қилғанлиқини баян қилди.

Мәзкур журналниң тунҗи санида 5 парчә мақалигә орун берилгән болуп, буларниң көпи хәлқара вәзийәт тоғрисидики мақалиләр икән. Доктор әркин әкрәм журналниң бу санида орун берилгән мақалиларниң мәзмуни тоғрисида мәлумат бәрди.

Мәзкур журналниң баш тәһрири истанбулдики ибни халдун университетиниң докторанти мәвлан тәңриқут әпәнди журналниң хәлқара өлчәмдики бир журнал икәнликини, мақалилар мәзкур журнналниң әсәр баһалаш һәйити тәрипидин көрүлүп тәстиқланғандин кейин, елан қилиниғанлиқини баян қилди.

Мәркизи әнқәрәдә турушлуқ уйғур иниститути тәрипидин тәсис қилинған "хәлқара вәзийәт вә шәрқий түркистан" намлиқ журналниң қануний вәкили, доктор әркин әкрәм әпәнди бу журналда мақалә елан қилмақчи болған апторларниң илмий салаһийәткә игә яки мол тәҗрибигә игә мутәхәссисләр болуши керәкликини әскәртип өтти.

Мәвлан тәңриқут әпәнди бу журналниң әң муһим әһмийитиниң бири униң уйғур тилиниң илмий тәтқиқат саһәсидә ишлитилишигә сәһнә һазирлаш болғанлиқини тәкитләп өтти.

"хәлқара вәзийәт вә шәрқий түркистан" намлиқ бу журналниң әсәр баһалаш һәйити доктор әркин әкрәм, абдурәһим дөләт, руқийә турдуш, ниҗат турғун, адилҗан әруйғур вә ялқун улуғйол қатарлиқ кишиләрдин тәркиб тапқан икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт