Мюнхенда уйғур тили вә мәдәнийити көрүки өткүзүлди

Ихтиярий мухбиримиз әкрәм
2019-03-12
Елхәт
Пикир
Share
Принт
«Германийә уйғур анилар бирлики» ниң тәшкиллиши билән өткүзүлгән «хәлқара ана тил күни» ни қутлуқлаш паалийитидә д у қ рәиси долқун әйса әпәнди сөз қилмақта. 2019-Йили 10-март, мюнхен, германийә.
«Германийә уйғур анилар бирлики» ниң тәшкиллиши билән өткүзүлгән «хәлқара ана тил күни» ни қутлуқлаш паалийитидә д у қ рәиси долқун әйса әпәнди сөз қилмақта. 2019-Йили 10-март, мюнхен, германийә.
RFA/Ekrem

Германийә уйғур анилар бирлики хәлқара ана тил күнини мол мәзмунлуқ паалийәтләр билән қутлуқлиди.

10-Март күни «германийә уйғур анилар бирлики» ниң тәшкиллиши билән германийәниң мюнхен шәһиридә «хәлқара ана тил күни» ни қутлуқлаш паалийити өткүзүлди. Түрлүк сәвәбләр билән кечикип өткүзүлгән бу паалийәткә мюнхен шәһири вә әтрап районларда яшаватқан 200 дин артуқ киши қатнашти. Паалийәт «шәрқий түркистан истиқлал марши» билән башланди.

Бу паалийәт ялғуз «хәлқара ана тил күни» ни қутлуқлаш, уйғур тилини намаян қилиш паалийити болупла қалмастин, у йәнә хитай һакимийити тәрипидин уйғур диярида омумйүзлүк чәклиниватқан уйғур мәдәнийитини, сәнитини, өрп-адәтлирини намаян қилидиған, кишини һаяҗанға салидиған вә зоқландуридиған бир паалийәт болған иди.

1944-Йили қурулған шәрқий түркистан җумһурийити миллий армийәсиниң һәрбий формисини кийгән йигит-қизлар, һәр юртниң өзгичә әнәниви миллий кийимлирини кийишкән омақ пәрзәнтләр, улар орундиған кийим моделлирини көрситиш паалийити, ләрзан усуллар вә муңлуқ нахшилар тамашибин болуп олтурған ата-аниларниң һаяҗанлиқ яшларни төкүшигә сәвәб болған иди.

Д у қ рәиси долқун әйса әпәнди паалийәт хатимисидә қилған сөзидә, өзиниң җаза лагерлири бесими пәйда болған 2 йилдин буян, тунҗи қетим ич-ичидин күлүш пурситигә вә зор мәниви енергийәгә еришкәнликини баян қилди. У йәнә мюнхендики бу өсмүрләрниң миллий роһини мәңгү яшитишниң зөрүрийити тилға алди.

Бу қетимқи паалийәттә номур көрсәткән өсмүрләрниң сани 100 гә йеқин болуп, һәтта әмдила 3 яшқа киргән сәбийләрму бу сәптин орун алған иди. Бу өсмүрләр мюнхен шәһиридә йеңидин қурулған «боғда уйғур мәктипи» ниң оқуғучилири иди.

Пикирләр (0)
Share
Толуқ бәт