Myunxénda Uyghur tili we medeniyiti körüki ötküzüldi

“Gérmaniye Uyghur anilar birliki” ning teshkillishi bilen ötküzülgen “Xelq'ara ana til küni” ni qutluqlash pa'aliyiti “Sherqiy türkistan istiqlal marshi” bilen bashlandi. 2019-Yili 10-mart, myunxén, gérmaniye.

“Gérmaniye Uyghur anilar birliki” ning teshkillishi bilen ötküzülgen “Xelq'ara ana til küni” ni qutluqlash pa'aliyitide ösmürler. 2019-Yili 10-mart, myunxén, gérmaniye.

Gérmaniye Uyghur anilar birliki xelq'ara ana til künini mol mezmunluq pa'aliyetler bilen qutluqlidi.

10-Mart küni “Gérmaniye Uyghur anilar birliki” ning teshkillishi bilen gérmaniyening myunxén shehiride “Xelq'ara ana til küni” ni qutluqlash pa'aliyiti ötküzüldi. Türlük sewebler bilen kéchikip ötküzülgen bu pa'aliyetke myunxén shehiri we etrap rayonlarda yashawatqan 200 din artuq kishi qatnashti. Pa'aliyet “Sherqiy türkistan istiqlal marshi” bilen bashlandi.

Bu pa'aliyet yalghuz “Xelq'ara ana til küni” ni qutluqlash, Uyghur tilini namayan qilish pa'aliyiti bolupla qalmastin, u yene xitay hakimiyiti teripidin Uyghur diyarida omumyüzlük chekliniwatqan Uyghur medeniyitini, sen'itini, örp-adetlirini namayan qilidighan, kishini hayajan'gha salidighan we zoqlanduridighan bir pa'aliyet bolghan idi.

1944-Yili qurulghan sherqiy türkistan jumhuriyiti milliy armiyesining herbiy formisini kiygen yigit-qizlar, her yurtning özgiche en'eniwi milliy kiyimlirini kiyishken omaq perzentler, ular orundighan kiyim modéllirini körsitish pa'aliyiti, lerzan usullar we mungluq naxshilar tamashibin bolup olturghan ata-anilarning hayajanliq yashlarni töküshige seweb bolghan idi.

D u q re'isi dolqun eysa ependi pa'aliyet xatimiside qilghan sözide, özining jaza lagérliri bésimi peyda bolghan 2 yildin buyan, tunji qétim ich-ichidin külüsh pursitige we zor meniwi énérgiyege érishkenlikini bayan qildi. U yene myunxéndiki bu ösmürlerning milliy rohini menggü yashitishning zörüriyiti tilgha aldi.

Bu qétimqi pa'aliyette nomur körsetken ösmürlerning sani 100 ge yéqin bolup, hetta emdila 3 yashqa kirgen sebiylermu bu septin orun alghan idi. Bu ösmürler myunxén shehiride yéngidin qurulghan “Boghda Uyghur mektipi” ning oqughuchiliri idi.