“Strasburg Uyghurlar üchün” namliq teshkilatning rehberlirining Uyghurlar toghrisidiki bayanliri

• Ixtiyariy muxbirimiz ekrem
  2021-08-17

Fransuz yashliri teripidin qurulghan “Strasburg Uyghurlar üchün” namliq teshkilat Uyghurlarni qollap, xitayning jaza lagérlirigha qarshi köresh qilmaqta.

D u q merkizidin igilishimizche, yawropa ittipaqining ikkinchi merkizi we qarar élish orgini jaylashqan fransiyening strasburg shehridiki bir bölük yashlar bundin birqanche ay ilgiri özlikidin qozghilip, “Strasburg Uyghurlar üchün” namliq teshkilatni qurup chiqqan hemde Uyghurlarni qollap, xitayning jaza lagérlirigha qarshi köreshke atlan'ghan. D u q re'isi dolqun eysa ependining bildürishiche, bu teshkilatning ezaliri fransiyediki oxshash bolmighan milletlerge tewe bolghan, köpinchisi aliy mekteplerni püttürgen yashlarni asas qilidiken.

Uyghurlarning tartiwatqan azap - oqubetlirige hésdashliqi qozghalghan, xitaygha bolghan nepretliri kücheygen bu yashlar aldinqi aylarda yawropa ittipaqining xitaygha bésim ishlitishini qolgha keltürüsh üchün bir yürüsh pa'aliyetlerni élip bérip, fransiyede zor tesir qozghighan. Dolqun eysa ependining bergen uchurlirigha qarighanda “Strasburg Uyghurlar üchün” namliq bu teshkilatning 9 neper rehberliri 15 - awghust küni gérmaniyening myunxén shehrige yétip kélip, d u q merkizini ziyaret qilghan, Uyghurlar xususida söhbetlerde bolghan hem Uyghur ta'amlirigha éghiz tegken.

Biz bügün “Strasburg Uyghurlar üchün” namliq bu teshkilatning bezi rehberliri bilen téléfon arqiliq alaqiliship, ularning néme üchün Uyghurlarni qollap heriket qilish niyitige kelgenliki, bundin kéyin Uyghurlar üchün néme ishlarni qilmaqchi boliwatqanliqi we d u q merkizini ziyaret qilishtin hasil bolghan tesiratliri toghrisida so'allar soriduq.

“Strasburg Uyghurlar üchün” namliq teshkilatning idare hey'et ezaliridin biri bolghan cheyma xanim mundaq deydu: “Uyghurlar duch kéliwatqan éghir weziyet bizning jiddiy diqqitimizni chekken nazuk téma boldi. Biz Uyghurlar uchrawatqan irqiy qirghinchiliqni we u peyda qilghan qabahetni qobul qilalmiduq. Biz fransiyelikler ma'arip terbiyeside kishilik qimmet qarashlirini himaye qilish we qoghdashtin ders alimiz. Bizning kishilik heqliri depsende boluwatqan insanlarning awazi bolush we ularning heqqini qoghdash mejburiyitimiz bar. Nöwette Uyghurlarning béshigha kéliwatqan külpetlerge qarshi turushni özimizge wezipe qilghanliqimizdin pexirlinimiz.”

Mezkur teshkilatning rehberliridin biri bolghan tolga ependi mundaq deydu: “D u q re'isining bergen melumatliri bizni qattiq tesirlerdürdi we bizning téximu janliq heriket qilish iradimizni küchlendürdi. Biz barghanséri sépi kéngiyiwatqan bir qoshun. Biz özimizge nésip bolghan herqandaq yighilish pursetlerdin paydilinip, Uyghur irqiy qirghinchiliqini teshwiq qilishni qoldin bermeslik qararigha kelduq we pa'aliyetlirimiz shu yosunda dawam qiliwatidu. Biz xitay mallirini bayqut qilishni teshwiq qiliwatimiz. Strasburgdiki xu'awéyning zawutini taqashni telep qiliwatimiz. Biz yene strasburgda yawropa ittipaqigha Uyghurlar mesiliside tesir körsitish üchün kölimi téximu zor bolghan pa'aliyetlerni ötküzüshni pilanlawatimiz. Uyghurlar mesilisi biz üchün intayin jiddiy téma. Biz aldimizdiki künlerde mexsus Uyghurlarning kimliki we medeniyitini qoghdash mezmun qilin'ghan pa'aliyetlirni élip barimiz.”

Mezkur teshkilatning rehberliridin biri bolghan türk qizi hülya xanim mundaq deydu: “Biz myunxén ziyaritide d u q re'isi teripidin qizghin kütiwélinduq we küchlük ilhamgha érishtuq. D u q re'isi bizge heqiqetenmu zor medet berdi we bizni bashqidin janlandurdi. Uning bizdin kütkenlirini bija keltürüsh üchün pütün imkanlirimiz bilen heriket qilimiz. Biz d u q bilen hemkarliq ornatqanliqmizdin köp memnunluq hés qiliwatimiz. Biz bundin kéyin qandaq heriketler bilen meshghul bolidighanliqimizni d u q rehberlirige tepsiliy melum qilduq. Uyghurlar we sherqiy türkistan bilen alaqiliq bolghan herqandaq sorunlarda biz Uyghurlar mesilisini kötürüp chiqishni dawamlashturimiz. Re'isning ichimizni achchiq qilghan sherqiy türkistandiki échinishliq weqeler toghrisidiki bayanliri bizning gheyritimizge gheyret qoshti. Men Uyghurlar üchün xizmet qilalighanliqimdin iptixarlinimen.”