Пенсийәгә чиққан мудир обул сидиқ қол телефонидин чиққан сирлиқ бир “хаталиқ” сәвәблик тутқун қилинған

Чапчаллиқ муһаҗирлардин бири өткән һәптә радийомизға учур йоллап, өзиниң сабиқ оқутқучиси, пенсийәгә чиққан мудир обул сидиқниң телефонидин “чатақ” чиқип тутқун қилинғанлиқини инкас қилған иди. Мухбиримизниң ениқлашлири давамида, пенсийонер обул сидиқниң нөвәттә ғулҗа җирғилаңдики лагерда тутуп туруливатқанлиқи дәлилләнди. Мәлум болушичә, униң тутулушқа телефонидин чиққан, нимиликини һәтта әдлийә хадимлириму билмәйдиған “куәйя” исимлик бир “хаталиқ” сәвәб болған.

Мәлум болушичә, өзлириниң немә үчүн тутулғанлиқини билмәслик, 2017 ‏-йилдин буянқи зор тутқунда уйғур тутқунларниң көпинчиси дуч кәлгән бир әһвалдур. Чапчаллиқ муһаҗирлардин бириниң радийомизға инкас қилишичә, чапчал наһийә мәркизий башланғуч мәктәпниң сабиқ мудири, пенсийонер обул сидиқ телефонидин чиққан, әмма өзи чүшәнмәйдиған бир “хаталиқ” сәвәблик2018 ‏-йили тутқун қилинған. Мәзкур мудир аилә әзалири билән екранда бирқанчә қетим көрүштүрлгәндә, өзигә мәлум бир “хаталиқ” ниң артилғанлиқи, әмма өзиниң бу “хаталиқ” ни техичә чүшүнүп болалмайватқанлиқини йошурмиған.

Биз обул сидиқниң өткүзгән аталмиш “хаталиқи” вә нөвәттики әһвалини билип беқиш үчүн, чапчалдики алақидар хадимларға телефон қилдуқ.

Ениқлашлиримиздин мәлум болушичә, бу йил 66 яшқа киргән обул сидиқ, чапчал мәркизи башланғуч мәктипидин пенсийәгә чиқандин кейин, ғулҗа шәһиридики қаривай мәһәллисигә йөткилип кәткән вә ғулҗа шәһиридики дөләт аманлиқ хадимлири тәрипидин тутқун қилинған.

Чапчаллиқ муһаҗирниң инкас қилишичә, пенсийонер обул сидиқниң оқуғучлиридин бири уни аилисигә йоқлап барғанда, униң телефониға үндидарни чүшүрүп бәргән. Бу җәрянда мәзкур оқуғучи билип яки билмәй чәкләнгән бир юмшақ деталдин пайдиланған вә яки чәкләнгән мәзмундики учурларни көргән. Аз кәм үч йилниң алдида йүз бәргән бу иш2018 ‏-йилиға кәлгәндә, обул сидиққа түгимәс бир путликашаң елип кәлгән.

Ғулҗада әдлийә саһәсидә хизмәт қиливатқан бир хадим телефонимизни қобул қилип, тутқун обул сидиқниң дәсләптә партийә мәктәптә қурулған лагерға апирилғанлиқи, у йәрдин су еликтир истансидики лагерға йөткәлгәнликини ашкарилиди.

Бу хадимму обул сидиқниң телефонидин “чатақ” чиққанлиқи үчүн тутулғанлиқи, әмма “чатақ” техникилиқ мәсилә болғанлиқи үчүн, буниң немиликини обул сидиқниңму, һәтта өзиниңму билмәйдиғанлиқини баян қилди. Хизмәт мунасивити билән униң билән бирқанчә қетим екранда көрүшкәнликини тилға алған бу хадим, обул сидиқниң өз хаталиқини “‛коя‚ (куәйя) болуп қаптимән” дәп ипадилигәнликини тилға алди. Униң дийишичә, обул сидиқ сорақ давамида, “куәйя” дәп атилидиған бу нәрсини яки мәшғулатни билмәйдиғанлиқи һәм чүшәнмәйдиғанлиқини изчил тәкрарлиған болсиму, әмма арқа-арқидин кәлгән сорақ гуруппилири охшашла әнә ашу “куәйя” мәсилиси үстидә сорақ қилған. У буни чүшәнмәйдиғанлиқида чиң турған вақтида, сорақчилар тәрипидин “коя болуп қалдим” дәп иқрар қилишқа мәҗбурланған вә у аталмиш “хаталиқи” ни мушу йосунда бойниға алған. Әмма у “хаталиқи” ни бойниға елипму җазадин қутулалмиған. Пәқәт орни лагердин лагерға йөткәлгән. Әмма униң та һазирғичә лагерда икәнлики вә яки кесиветилгәнлики мәлум әмәс.