Xoten "Güzel makan öy-mülük shirkiti" ning diréktori ekber imin 25 yilliq késilgen

Muxbirimiz shöhret hoshur
2020-01-14
Élxet
Pikir
Share
Print
Bayliq jehette xotende aldinqi qatardiki kishilerdin sanilidighan "Güzel makan öy-mülük shirkiti" ning diréktori ekber imining pasporti. Xoten(waqti éniq emes)
Bayliq jehette xotende aldinqi qatardiki kishilerdin sanilidighan "Güzel makan öy-mülük shirkiti" ning diréktori ekber imining pasporti. Xoten(waqti éniq emes)
RFA/Shöhret Hoshur

Weziyettin xewerdar bir kishining bayan qilishiche jem'iyette "Ekber dalu" dep tonulghan, bayliq jehette xotende aldinqi qatardiki kishilerdin sanilidighan 51 yashliq karxanichi ekber imin 2018‏-yilning otturiliri ün-tinsiz ghayib bolghan. Biz ekber iminning ehwalini uqush üchün xoten sheherlik j x idarisige téléfon qilduq. Alaqidar xadimlar bu heqte so'alimizgha jawab bérishni ret qildi. Weziyettin xewerdar kishi, ekber iminning birqanche shirkiti barliqi, shirketliridin birining "Güzel makan öy-mülük shirkiti" ikenlikini bayan qilghan. Xitay tor arxiplirini axturghinimizda, bu shirketning 2007-yili qurulghanliqi, xoten sheher ittipaq yolida ishxanisi barliqi, shirketning 13 milyon 343 ming yüen meblighi barliqi qeyt qilin'ghan. Biz bu shirketning nöwette méngiwatqan yaki toxtighanliqini éniqlash üchün xoten wilayetlik yerlik baj idarisige téléfon qilduq. Bu xadimmu, bu tür ehwallargha jawab bermeslik heqqide j x tarmaqlirining mexsus höjjiti barliqini ashkarilidi.

Xoten wilayitide siyasiy qanun saheside xizmet qilghan bir xadim, ekber iminning xoten sheher ichige sélin'ghan 16 qewetliktin 30 nechche binadin teshkillen'gen "Bext olturaq rayoni" ning sahibi ikenliki we 2 yildin buyan tutqunda ikenlikini tilgha aldi. Emma u ekber iminning tutulush sewebidin asasen dégüdek xewersizlikini éytti.

"Güzel makan öy-mülük shirkiti" heqqidiki tordiki tonushturushta déyilishiche, mezkur shirket qurulush-binakarliq ishliridin bashqa tashqi soda bilenmu shughullan'ghan. Téléfonimizni qobul qilghan bir saqchi xadimi ekber iminning chégrada soda resmiyitini béjiriwatqan mezgilide tutqun qilin'ghanliqini ashkarilidi. Bu xadimning yene eskertishiche, u ekber iminni muddetsiz késildi dep jem'iyettin anglighan, emma idarisidin bu heqte özige melumat bérilmigen.

Bayiqi siyasiy qanun xadimi ekber iminning 25 yilliq késilgenliki we bu uchurning nöwette xotende sir emeslikini, chong-kichik hemmila kishining bilidighanliqini melum qildi.

Özining bixeterlikini nezerde tutup, ismini ashkarilashni xalimaydighan mezkur weziyettin xewerdar kishi ekber iminning ishni qashtéshi sodisidin bashlighanliqi we xotende olturaq öy-binakarliq saheside aldinqi orun'gha ötkenliki we desmayining bir milyard yüendin ashqanda xitay da'irilirining "Qestlishige uchrighanliqi" ni melum qilghanidi. Ekber iminning tutulush sewebi we uning soda ortaqliri bolghan ikki qérindishi we bir oghlining teqdiri üstidiki éniqlashlirimiz téxi dawamlashmaqta.

Toluq bet