Ghulja chuluqaydiki 700 nechche nopusluq bir kentte az dégende 100 kishining türmide ikenliki ashkarilandi

Muxbirimiz shöhret hoshur
2022-04-06
Share
turme-siyasiy-mehbus.jpg Jinayetchilerni tutup turush merkizining derwazisi. Yerlik kishiler éytishiche, bu orun siyasiy jinayetchiler üchün ishlitilidiken. 2017-Yili 2-noyabir, korla.
AP

Muxbirimizning ghulja nahiyesige qarita élip barghan téléfon ziyaretliri dawamida chuluqay yézisidiki bir kent saqchisi, yéziliq hökümetning mehbus a'ile-tawabi'atlirigha bériwatqan atalmish “Yardem” lirini bayan qilish dawamida chuluqaydiki 700 nechche nopusluq bir kenttin az dégende 100 kishining türmide ikenlikini ashkarilidi.

Ghulja chuluqaydiki bir kent saqchisi, da'irilerning wirus yuqumi mezgilide mehbuslar a'ile-tawabi'atlirigha qandaq qarawatqanliqi heqqidiki so'alimizgha jawaben, bu a'ililerge alahide köngül bölüniwatqanliqi, yémek-ichmektin tartip kiyim-kéchekkiche pütün turmush éhtiyajlirini qamdawatqanliqini ilgiri sürdi. Bu mehbus a'ililirige qarita nöwette néme ishlarning qiliniwatqanliqini sorighinimizda, u eng yéqinda 30 tonnadin artuq kömür tarqitilghanliqini tilgha aldi. U bu jeryanda, yardem bérilgen mehbus a'ililiri sanining yüzge yetkenlikini bayan qilish arqiliq, bu kentte az dégende 100 kishining türmide ikenlikini ashkarilidi. Uning bayan qilishiche, chuluqay yézisining nopusi 10 mingdin artuq bolup, mezkur “Yardem” ge érishken 100 mehbus a'ilisi mensup bolghan kentte 140 a'ile 700 nechche nopus bar iken.

Ghuljadin chiqip chet elde yashawatqan muhajirlardin birining bayan qilishiche, mezkur tutulush nisbiti özi tughulup ösken onyar yézisigha nisbeten éytqanda ejeblinerlik emes iken. Özining 3 qérindishining türmide ikenlikini tilgha alghan bu muhajir, mehellisidiki her bir a'ilidin 1-5 ke qeder kishining türmide ikenlikidin xewer tapqanliqini, mushuninggha asasen chuluqaydiki mezkur kentte 200 che kishining türmide ikenlikini texmin qilishqa bolidighanliqini bayan qildi. Chuluqayning sheyxmehelle kentidin téléfonimizni qobul qilghan bir amanliq mudiri, ozi olturushluq mehellide nesrulla isilik kishining a'ilisidin 4 kishining türmide ikenlikini ashkarilidi. Mezkur mehellidiki yene bir xadim, 11 qérindashliq bir jemettin (chong a'ilidin) 6 kishining türmide ikenlikini tilgha aldi.

Ilgiriki éniqlashghlirimiz dawamida, qeshqer wilayitide 2017‏-yilidila 120 ming kishining tutqunda ikenliki, bulardin yéngisar nahiyesining 13 ming nopusluq topluq yézisida 2000 din artuq kishining késilip bolghanliqi delillen'gen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet