Уйғур яш сәнәткарлири өзбекистанда өткүзүлгән хәлқаралиқ сәнәт фестивалида маһарәт көрсәтти

Мәлуматлардин игилишимизчә, кейинки вақитларда өзбекистан, қазақистан, қирғизистанда яшаватқан уйғур җамаити яш-өсмүрләрниң миллий сәнәткә болған қизиқишини ойғитиш мәқситидә түрлүк паалийәтләрни өткүзүп кәлмәктә.

Әнә шундақ фестивалларниң бири ташкәнттә өткүзүлди. Йеқинда өзбекистан пайтәхти ташкәнт шәһиридә яш иҗрачиларниң “қолвақлар достларни чақириду!” мавзусида 14-нөвәтлик хәлқара фестивал мусабиқиси болуп өтти. Өзбекистан җумһурийити мәдәнийәт министирлиқи һәмдә өзбекистан дөләт консерваторийәси (музика институти) тәрипидин қоллап қуввәтләнгән бу фестивалда яш уйғур нахшичи вә сазәндилири өзлириниң нахша-музика маһарәтлирини көрсәткән.

Шу мунасивәт билән “қолвақлар достларни чақириду!” мавзусидики 14-нөвәтлик хәлқара фестивал мусабиқисини уюштурғучиларниң бири, өзбекистан мәдәнийәт министирлиқиниң хәлқара алақиләр вә достлуқ бойичә комитети тәркибидики җумһурийәтлик уйғур миллий мәркизиниң мәсуллиридин бири һекимәм веләмова ханим зияритимизни қобул қилип, фестивалниң асасий мәқсити вә уни уюштуруштики бәзи мәсилиләр һәққидә тохтилип, мундақ деди: “бу фестивалниң асасий мәқсити әң талантлиқ вә келәчики бар яш иҗадкарларни ениқлаш вә һәр тәрәплимә қоллап-қуввәтләш, уларниң иҗадий қудритини раваҗландуруш, иҗра қилиш маһарити вә сәһнә мәдәнийитини йүксәлдүрүш һәм балилар вә яшлар коллектиплириниң иҗадийитини аммибаблаштуруштин ибарәт. Фестивал шундақла қолайлиқ писхологийәлик муһитни яритиш, һәр хил әлләрниң балилири арисида иҗадий, достлуқ алақилирини мустәһкәмләш, иҗадий коллектиплар рәһбәрлириниң кәспий маһаритини ашурушқа охшаш мәқсәтләрниму көзлиди. Униңға һәр хил милләт вәкиллири, қошна мәмликәтләрдин, җүмлидин қазақистандин, қирғизистандин, русийә федератсийәсиниң татаристан җумһурийитидин көплигән яш сәнәткарлар иштирак қилди”.

Һекимәм веләмованиң ейтишичә, буниңға қазақистандин хели көп уйғур сәнәт гуруппилири қатнашқан. Мәсилән фестивалға пәқәт қазақистанниң алмута шәһиридин “мәр-мәр” қазақ сәнәт гурупписи, чайковский намидики алмута музика мәктипиниң сабирҗан манашеф рәһбәрликидики “достлуқ” миллий ансамбили, бәхтияр имран рәһбәрликидики “долан” миллий уссул ансамбили, шәһәрниң абдулла розибақийеф намидики 153-мәктәп гимназийәсидин надийәм рембақийева башчилиқидики “яшлар авази” намлиқ нахша гурупписи, яркәнт шәһиридин бәхтияр ниязофниң “бахти” истудийәси, яркәнт тәвәсиниң чоң чиған йезисидин оғләм тайирова рәһбәрликидики “дил саз” муқам ансамбили қатнашқан.

Һекимәм веләмова йәнә мундақ деди: “бу фестивал һәр хил йөнилишләрдә болди. Биз алди билән фестивални өткүзүш қаидилири вә тәләплирини мукәммәл түзүп, уни тәстиқлап, андин униң қатнашқучилириға йоллидуқ. Фестивал төт йөнилиштә елип берилди. Өзбекистанда 130 дин ошуқ милләт яшайду. Қисқиси, фестивал наһайити әтраплиқ, аммиви һалда вә қизғин өтти.”

Фестивалға қатнашқан чайковский намидики алмута музика мәктипи оқуғучилиридин қурулған, бир қатар җумһурийәтлик вә хәлқара мусабиқиләрниң саһиби “достлуқ” миллий ансамбилиниң рәһбири сабирҗан манашеф әпәнди өзлириниң паалийәтлири һәққидә тохталди.

Биз йәнә қазақистанниң хизмәт көрсәткән артиси, атақлиқ уссулчи гүлнара сайитова ханим билән алақиләштуқ. У зияритимизни қобул қилип, мундақ деди: “баштила шуни тәкитлигүм келидуки, өзбекистанниң мәдәнийәт министирлиқиниң ‛камаз достларни йиғиду‚ намлиқ яш иҗрачиларниң фестивал мусабиқиси бирләшмиси билән бирликтә мундақ аҗайип фестивални уюштуруши балилар үчүн яхши бир пурсәтни яратти. Икки аҗайип аялниң, йәни гузалийә тенешева һәм һекимәм веләмованиң күч чиқиришида мушундақ чирайлиқ фестивал өтти. Улар балилар үчүн чоң байрам уюштурди. Бу һәқиқәтәнму балилар байрими болди”.

Гүлнара сайитова йәнә барлиқ балиларниң, уларниң устазлириниң вә рәһбәрлириниң бу фестивалға чоң тәйярлиқ вә җавабкарлиқ билән кәлгәнликини алаһидә тәкитлиди.

У мундақ деди: “мениң уйғур миллий ансамбиллириниң талантиниму тәкитлигүм келиду, әлвәттә. Уларниң һәр бириниң өз алдиға алаһидилики болди. Мән раваб вә тәмбурда музика орунлиған икки йигитниң исмини алаһидә тилға алимән. Улар өзлириниң иҗрасида йеңилиқ яритип, тамашибинларниң алқишиға сазавәр болди. Әмма қазилар омумән фестивал қатнашқучилириниң иҗрасида бәзи кәмчиликләрниму байқап, уларни ансамбил йетәкчилиригә йәткүзди. Улар бу тәклипләрни сәмимий қобул қилди”.

Игилишимизчә, өткән әсирниң 80-йиллириниң оттурилиридин башлап пүткүл совет иттипақи даирисидә, шу өзбекистандиму иҗтимаий, иқтисадий, сиясий вә мәдәний өзгиришләр йүз беришқа башлиғаниди. Болупму һәр қайси милләтләрниң мәдәнийәт мәркәзлири қурулуп, ана тилни, миллий мәдәнийәтни сақлаш йөнилишидә көп ишлар та һазирғичә елип берилмақта. Шуларниң бири сәнәт фестиваллири болуп һесаблиниду. Өзбекистандики уйғурларму өз миллий сәнитини раваҗландурушқа әһмийәт бәргән. Болупму қазақистанда уйғурлар бирқәдәр көп болғанлиқи үчүн уйғур сәнити бу мәмликәттә бирқәдәр тәрәққий қилған, җүмлидин яш-өсмүрләр арисида миллий музика, уссул вә нахшиларға қизиқиш долқуни қозғалғаниди.