Уйғур яшлири үчүн “кишилик һоқуқ вә таратқу бойичә тәрбийәләш курси” өткүзүлди

Ихтиярий мухбиримиз азиғ
2021.08.30
Share on WhatsApp
Share on WhatsApp
Уйғур яшлири үчүн “кишилик һоқуқ вә таратқу бойичә тәрбийәләш курси” өткүзүлди Америкадики уйғур кишилик һоқуқ қурулушиниң директори өмәр қанат әпәнди тор арқилиқ ечилған “кишилик һоқуқ вә таратқу бойичә тәрбийәләш курси” да сөзлимәктә. 2021-Йили 28-авғуст.
Photo: RFA

Хитайниң уйғур елидики қирғинчилиқ вә ассимилатсийә сиясәтлири пүтүн дуняниң диққитини тартиватқан бүгүнкидәк күндә, уйғур сиясий давасини давамлаштуруш вә уйғур қирғинчилиқиға қарши күрәштә яш уйғур паалийәтчиләрни йетиштүрүш, муһаҗирәттики уйғурлар җиддий көңүл бөлүватқан муһим мәсилиләрниң бири дәп қаралмақта.

28- Вә 29-авғуст күнлири америкадики уйғур тәшкилатлиридин уйғур кишилик һоқуқ қурулушиниң орунлаштуруши вә уйғур академийәси билән шәрқий түркистан йеңи әвлад һәрикитиниң һәмкарлиқида уйғур яшлири үчүн “кишилик һоқуқ вә таратқу бойичә тәрбийәләш курси” ечилди. Мәзкур тәрбийәләш курси тор вастиси арқилиқ елип берилған болуп, түркийәдин 20 дин артуқ уйғур яш қатнашқан.

Америкадики уйғур кишилик һоқуқ қурулушиниң тәтқиқатчи зубәйрә шәмсидин ханим тор арқилиқ ечилған “кишилик һоқуқ вә таратқу бойичә тәрбийәләш курси” да сөзлимәктә. 2021-Йили 28-авғуст.
Америкадики уйғур кишилик һоқуқ қурулушиниң тәтқиқатчи зубәйрә шәмсидин ханим тор арқилиқ ечилған “кишилик һоқуқ вә таратқу бойичә тәрбийәләш курси” да сөзлимәктә. 2021-Йили 28-авғуст.

Мәзкур тәрбийәләш курсиға уйғур паалийәтчи мустапа ақсу риясәтчилик қилған болуп, уйғур кишилик һоқуқ қурулушиниң дериктори өмәр қанат, уйғур академийәсиниң муавин рәиси абдулһәмид қарахан қатарлиқлар қатнашқан. Униңдин башқа, уйғур кишилик һоқуқ қурулушидики тәтқиқатчилардин әлис андирсун (назакәт) ханим вә зубәйрә шәмсидин ханим қатнишип, уйғур оқуғучиларға кишилик һоқуқ принсиплири вә күрәш йоллири һәққидә мәлумат бәргән.

Уйғур кишилик һоқуқ қурулушиниң тәтқиқатчилиридин зубәйрә шәмсидин ханим зияритимизни қобул қилип, уйғур яш паалийәтчиллирини кишилик һоқуқ, ахбарат вә тәшвиқат тихникалири бойичә тәрбийәләшниң әһмийитини тәкитлиди.

Мәзкур курсқа қатнашқан  яш түрк паалийәтчилиридин күбра өзтүрк вә фатманур ширин қатарлиқлар уйғур яшлириға ахбаратчилиқ вә кишилик һоқуқ тәшвиқатлирини қанат яйдурушниң техникалиқ тәпсилатлири тоғрисида лексийә бәргән.

Уйғур тәшкилатлири уйғур оқуғучилар ичидин ярамлиқ вә қабилийәтлик яшларни байқап, қәрәллик һалда сиясий вә кишилик һоқуқ күрәш йоллири җәһәттин тәрбийәләп кәлмәктә.

Уйғур академийәсиниң рәсмий тор бетидә, келәр қетим шәрқий түркистан миллий күришидә лобичилиқ, тәшкилатчилиқ, тәшвиқатта диққәт қилишқа тегишлик муһим нуқтилар, учур бихәтәрликини қоғдаш вә миллий мустәқиллиқ йоллириниң қәдәм басқучлири қатарлиқ муһим темиларда һәр хил тәрбийәләш курслирини тәшкилләйдиғанлиқини билдүргән.

Уйғур академийәсиниң муавин рәиси абдулһәмид қарахан әпәндим зияритимизни қубул қилип, мәзкур курсиниң мәқсити вә нишани һәққидә мәлумат бәрди.

Мәзкур курсқа қатнашқан уйғур яш паалийәтчиләрдин абдуқадир абликим әпәндим зияритимизни қубул қилип, бу хил курслардин көп нәрсә өгинивалғили болидиғанлиқини, бундин кейин бу хил курсларниң техиму көпләп орунлаштурулишиға тиләкдаш икәнликини ейтти.

Уйғур қирғинчилиқини хәлқаралаштурушта ахбаратниң вә кишилик һоқуқ тәшвиқатлириниң зөрүрийити тәкитлинип келиватқан болуп, мутәхәссисләр, яш уйғур паалийәтчиләрниң бу хил кәспий билимләр бойичә тәрбийәлинишниң уйғур давасини илгири сүрүштә интайин муһим рол ойнайдиғанлиқини билдүрмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.