جاڭ شيۇمىڭ مائارىپ سېپىدىكى ئۈچ خىل كۈچلەرگە قارشى كۈرەش ھەققىدە توختالدى


2004-10-24
Share

ئۇيغۇر ئاپتونوم رايونىنىڭ مۇئاۋىن سېكرىتارى جاڭ شيۇمىڭ، مائارىپ ساھەسى بېيجىڭ دائىرىلىرى تەرىپىدىن ئۈچ خىل كۈچلەر دەپ ئاتالغان مۇستەقىللىق ئىدىيىسىدىكى ئۇيغۇرلار بىلەن خىتاي ھۆكۈمىتى ئوتتۇرىسىدىكى ئاساسلىق كۈرەش مەيدانى دەپ كۆرسەتتى. " مائارىپ سېستىمىسى ئۈچ خىل كۈچلەرنىڭ سىڭىپ كىرىشتىكى ئاساسلىق نىشانى" دەپ تەكىتلىگەن جاڭ شيۇمىڭ مۇنداق دەيدۇ : " مەملىكەت ئىچى ۋە سىرتىدىكى دۈشمەن كۈچلەرنىڭ غەرپلەشتۈرۈش، پارچىلاش ۋە جوڭگونى ئاجىزلاشتۇرۇش نىيىتى بىر مىنۇتمۇ توختاپ قالمىدى، بۆلگۈنچىلىككە قارشى كۈرەش يەنىلا ئىنتايىن كەسكىن. " جاڭ شيۇمىڭ بۇ سۆزلەرنى ئالدىنقى كۈنى ئاپتونوم رايون بويىچە مائارىپ ئىدارە باشلىقلىرىنى ۋە پارتىيە سېكرىتارلىرىنى تەربىيىلەش كۇرسىنىڭ ئوقۇغۇچىلىرىغا بەرگەن دوكلاتىدا تەكىتلىگەن.

"مائارىپ سېستىمىسى دۈشمەن كۈچلەر بىلەن كۈرەش قىلىدىغان ئاساسلىق سەھنە " دەپ كۆرسەتكەن جاڭشيۇمىڭ، مائارىپ سېپىدىكى دۈشمەن كۈچلەرنىڭ كىملەر ئىكەنلىكىنى تىلغا ئالمىغان. ئۇ يەنە مائارىپ سېپىنى بۆلگۈنچىلىككە، قانۇنسىز دىنىي پائالىيەتلەرگە قارشى مۇستەھكەم قورغان قىلىپ قۇرۇپ چىقىش يولىدا مەكتەپلەردىكى سىياسىي ئىدئىلوگىيە خىزمىتىنى چىڭ تۇتۇش كىرەك دەپ تەكىتلىگەن. خىتاي ھۆكۈمىتى ئۇيغۇر ئاپتونوم رايونىنىڭ جەنۇبىدىكى ئوتتۇرا - باشلانغۇچ مەكتەپ ئوقۇغۇچىلىرىنى شەنبە، يەكشەنبە ۋە ھەپتە ئارىسىدىكى دەرستىن سرتقى ۋاقىتلاردا سىياسى ئۈگىنىشكە ئۇيۇشتۇرماقتا. شىنجاڭ ئۇنىۋېرسىتىتى ئوقۇتۇش باشقارمىسىنىڭ بىر مۇئاۋىن خىتاي باشلىقى ئىلگىرى شىنجاڭ ئۇنۋېرسىتىتىدا مىللى ئوقۇغۇچىلارغا خىتاي تىلىدا دەرس ئۆتۈشكە قارشى چىققۇچىلار مىللى بۆلگۈنچىلەر سۈپىتىدە بىر تەرەپ قىلىنىدۇ دەپ تەكىتلىگەن ئىدى. (ئەركىن)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت