Уйғур елидә бултур 80 миңға йеқин адәм қетим хитай өлкилиригә йөткәп кетилгән

 Тәңритағ торида хәвәр қилинишичә, 2007 - йилида пүтүн уйғур или миқясида 1 милйон 448 миң 500 адәм қетим йөткәп ишқа орунлаштурулған болуп, буларниң ичидә җәнубий уйғур илидин ичкири өлкиләргә йөткәлгән адәм сани 79 миң 200 адәм қетимға йәткән һәмдә хәвәрдә шуниң билән " деһқанларни ичкири өлкиләргә тәшкиллик, түркүмләп ишқа орунлаштурушта муһим бөсүш" һасил қилинғанлиқи көрситилгән.

Хәвәрдә оттуриға қоюлишичә йәнә, бундин кейин әмгәк күчлирини йөткәш ишлири йәнә изчил давамлаштурулидиған болуп, бу хизмәтни җәнубий уйғур илини асас қилған һалда һәр аилидин бир адәмни йөткәп ишқа орунлаштуруш әмәлгә ашурилидикән.

Һалбуки, һазир йәрлик хитай һөкүмитиниң тәшкиллиши билән, җәнуби уйғур илини мәркәз қилған асаста әмгәк күчлирини сиртқа йөткәш намида түркүмләп уйғур қизлириниң хитай өлкилиригә елип кетилиши чәтәлләрдики уйғур тәшкилатлири вә уйғур зиялийлирини әндишигә селиватқан мәсилиләрниң бири болуп, дуня уйғур қурултийи баянатчиси дилшат ришит буни һазир уйғур җәмийити дуч келиватқан хәтәрлик иҗтимаий мәсилиләрниң бири дәп көрсәтти.

У йәнә, хитай һөкүмитиниң хизмәткә орунлаштуруш баһаниси билән асасән қизларни хитай өлкилиригә йөткәп кетиватқанлиқи, уйғурларниң миллий әнәниси җәһәттин елип ейтқандиму уйғурларға қилинған еғир һақарәт дәп әскәртти һәмдә хитай һөкүмитини бу хил қилмишлирини дәрһал тохтитишқа чақирди.