Türmide jaza ötewatqan ikki oghligha buyrulghan jerimanini töliyelmigen naway memtimin yasin tutqun qilin'ghan

Washin'gtondin muxbirimiz shöhret hoshur teyyarlidi
2024.06.05
Xitayning atalmish “Milletler ittipaqliqi asasidiki qurban héyt” teshwiqati yalghanchiliq bilen eyiblendi Qeshqer konasheherde kocha charlawatqan xitay saqchiliri. 2021-Yili 4-may.
REUTERS

Weziyettin xewerdar kishilerdin birining inkas qilishiche, xoten nahiye bazirida nawayliq bilen tirikchilik qiliwatqan 70 yashliq memtimin yasin ötken charshenbe küni seherde nawayliq qiliwatqan dukinidin tutup kétilgen. Inkasta déyilishiche, memtimin yasin, türmide jaza ötewatqan ikki oghligha buyrulghan jerimane pulini töliyelmigenliki üchün tutulghan. Xoten nahiyelik sot mehkimisi xadimi, memtimin yasinning tutqunda ikenlikini delillesh bilen birlikte, uning pulni sürüshte qilip barghan sot xadimliri bilen ghewghalashqanliqi üchün tutqun qilin'ghanliqini ashkarilidi.

Ötken heptidiki éniqlashlirimizdin melum bolushiche, nöwette Uyghur élidiki türmilerde mehbuslar hökümnamiside békitilgen “Ishtirap” yeni jerimanini töleshke qiziqturuluwatqan bolup, eger bu pul aktipchanliq bilen tölense ularning jaza mudditi tügigen haman chiqip kételeydighanliqi yaki mudditining birnechche yil qisqartilidighanliqi teshwiq qilinmaqtiken.

Melumki bu jerimane gerche mehbuslargha qoyulghan bolsimu, ular türmide jaza ötewatqan bolghachqa, bu pulni uning a'ile-tawabi'ati töleshke mejbur bolghan. Emma jerimane sommisi bek yuqiri bolghachqa, uning üstige tölen'gen teqdirdimu, jaza mudditide közge körünerlik töwenlesh bolmaydighan bolghachqa, téximu muhimi mehbus a'ile-tawabi'atlirining iqtisadiy ehwalimu chaghliq bolghachqa, türme da'irilining mezkur qiziqturushi mehbus a'ile-tawabi'atlirini heriketke keltürelmigen. Déyilishiche, bu pul türmige emes sotqa tapshurulidiken؛ sotning mexsus ijra'iy bölümi bu pulni yighishqa mes'ul iken.

Xitayning jinayi ishlar qanunidiki alaqidar maddilarda sherhlinishiche, sot mehkimisi mehbus a'ililirining iqtisadiy ehwalida azraq yaxshilinish barliqini sézip qalsa, mehbusqa pichilghan jerimanini yighishqa derhal heriket qilidiken.

Weziyettin xewerdar kishining inkasida déyilishiche, naway memtimin yasin, yéshining chongiyip qalghanliqi we salametlikining nacharlashqanliqi seweblik ikki oghli tutulushtin burunla tijarettin toxtighaniken. Emma kéyinki mezgillerde tirikchilik we dawalinish éhtiyaji bilen dukanni qayta achqan. Bir mezgil sodisi aqmighan memtimin yasin yéqinqi aylarda kona xéridarlirining toplinishi we jama'etning hésdashliqi bilen tijaritide bir'az ilgirilesh bolghan. Emma bu ilgirilesh gerche özidin éshin'ghudek derijide, bolupmu 150 ming yüen jerimanini töligüdek derijide bolmighan bolsimu, sot xadimlirining diqqitidin qachmighan we ular jerimanini derhal tölitish üchün memtimin yasinni izdep kélishke bashlighan. U, axirida alaqidar xadimlargha özining bu pulni töleshke qadir emeslikini késip éytqandin kéyin, xadimlar uni yalghan sözlewatidu dep qarap, soraq qilish üchün élip ketken. Memtimin yasin soraqtin qaytip kelmigen, uning dukinimu ta bügün'ge qeder échilmighan. Bu ehwallardin uning nöwette tutqunda ikenliki melum bolghan.

Xoten wilayetlik sot xadimi, eger jerimane pulini töligüdek ehwalda turup tölimise, mehbus a'ililirige memuri jaza bérilish éhtimali barliqini otturigha qoydi. Emma, memtimin yasinning nöwette, nede tutup turulghanliqi we memuri jazaning konkrét néme bolidighanliqi heqqide melumat bérelmidi.

Téléfonimizni qobul qilghan xoten nahiyelik sot xadimi, xitayda jerimane pulni töliyelmigenliki üchün tutup kétilidighan ish bolmaydighanliqini ilgiri sürüp, bizge kelgen inkasning yalghan ikenlikini bayan qildi. Biz tutqunning isim-familisi qatarliq kimliki uchurlirini tilgha alghinimizdin kéyin, u memtimin yasinning pulni sürüshte qilip barghan sot ijra'iye xadimlirigha öktemlik qilghanliqi we awarichilik tughdurghanliqini üchün qanunni ijra qilishqa tosqunluq qilish seweblik tutulghanliqini ashkarilidi. Bu ijragha tosqunluq qilghan memtimin yasin üchün memuri jaza bérilgenliki, qisqa muddet tutup turulghandin kéyin qoyup bérilidighanliqini ilgiri sürdi.

Matériyallarda körsitilishiche, memuri jaza 15 kündin 6 aygha qeder nezerbend qilish yaki tutup turush bolup, memtimin yasinning qamaqxanida yene qanchilik tutup turulidighanliqi hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.