Putbol sahesidimu Uyghur putbolchilar chetke qéqilghan

Muxbirimiz nur'iman
2020-12-24
Share
Putbol sahesidimu Uyghur putbolchilar chetke qéqilghan 2018‏-Yili etiyazda tutqun qilinip dörbiljindiki bir yighiwélish lagérigha solan'ghan ataqliq putbol cholpini irfan hézim.
Social Media

"Jenubiy xitay seher pochtsi géziti" ning xewer qilishiche, "Putbol diréktori-2021" (Football Manager 2021) namliq putbol teqlidi sin oyunidiki "Yéngi nesil (newgen)" namliq oyun türidin Uyghur putbolchilar chiqiriwétilgen. Burunqi oyundiki Uyghur putbolchilarning ornigha xitay putbolchilar seplen'gen.

Közetküchiler bu yil tenterbiye we siyaset dunyasining ilgirikige qarighanda téximu keng da'iride bir-birige ariliship ketkenlikini, buning hetta kompyutér teqlidi oyun da'irisigiche kéngeygenlikini ilgiri sürüshmekte.

"Putbol diréktori" ning sanliq melumat ambirigha qarighanda, bu oyun deslep bashlan'ghanda 200 din artuq Uyghur topchisi we xizmetchisi bolghaniken. Bularning qatarida xitay dölet komandisigha wekillik qilghan tunji Uyghur mahiri mirexmetjan muzeppermu bar iken.

Sherqi türkistan ulusal putbul komandisining putbolchisi salahidin ependi "Putbol diréktori" ning sanliq melumat ambirida körsitlgendek, xitaydiki döletlik komanda we bashqa chong komandilarda top tépidighan Uyghur balilarning heqiqeten köplikini éytti.

Mushu ayning béshida "Putbol diréktori" kompyutér oyunining mestaniliri 2021-yilliq oyun endizisi élan qilin'ghandin kéyin oyunning tor munbiride Uyghur putbolchilarning chiqiriwétilgenlikidek binormalliqni bayqighan.

Putbol oyun tor munbiride, eslide Uyghur putbolchilirining nisbiti zor bolghan "Shinjang qar yilpizi" kulubigha kéliwatqan yash topchilarning hemmisining xitaylar ikenlikidin shikayet qilin'ghan.

"Putbol diréktori" ning xitaydiki bash tetqiqatchisi munber yazmisigha mundaq jawab qayturghan: "Siler nahayiti yaxshi bir nuqtini otturigha qoydunglar, bu xuddi bilbaw yénik atlétika komandisida baské mahiri bolmighandekla bir ish. Biz bu mesilini uzun muddette bolsimu ongshashni pilanlawatimiz".

"Putbol diréktori" bayanatchisi tom dawidsonning munberdiki inkasigha qarighanda, bu Uyghur putbolchilar mesilisi yanwarda körülüshke bashlighan, lékin ular bu mesilidin yiraq turushqa tirishqan.

Hetta "Jenubiy xitay seher pochtisi géziti" ning xewirige asaslan'ghanda tom dawidson mundaq dégen: "Biz bu yilning béshida Uyghur tilini oyun'gha qoshtuq we sanliq melumat ambiridiki 200din artuq Uyghurni közde tutup ularning tilinimu oyun tili qilip belgilishige kapaletlik qilduq. Emma bu qétimqi yéngi oyunda emeliyleshmidi. Biz oyunni yaxshilash üstide izdiniwatimiz".

Analizchilar xitayning Uyghur xelqige tutqan mu'amilisining hetta putbol dunyasighimu tesir körsetkenlikini bildürüshken.

Arsénal kulubining putbolchisi mesut özil xitayning Uyghurlargha yürgüzüwatqan zulumi heqqide pikir bayan qilghanliqi xitayda ghulghula qozghighan. Türkiyede putbol tépidighan dem ba bamu putbolchilarni Uyghurlargha yürgüzülüwatqan zulum heqqide pozitsiye bildürüshke chaqirghanidi.

Firank ribéri we kalido kolibali qatarliq bir qanche dangliq firansuz putbolchilarmu arqa-arqidin ijtima'iy alaqe torida bu mesilini gewdilendürgen.

Mushu ayning béshida, firansiyelik putbol hujumchiliq mahiri antoyén girizman xitayning Uyghurlargha tutqan mu'amilisi tüpeylidin, xu'awéy bilen bolghan sodisini bikar qilghanidi.

Salahidin ependi xitay dölitide burundinla putbol sahesige siyasetning arilishidighanliqi, yiqinqi nechche yillardin buyan téximu éghirlashqan bu basturushta Uyghur putbolchilarning teqdirige bir néme déyishning tiximu teslikini tekitlidi.

"Putbol diréktori" munbiri "Yéngi nesil" oyun endiziside Uyghur putbolchilar mesilisining hel bolidighan yaki bolmaydighanliqi heqqide inkas bildürüshni ret qilghan.

Istiqballiq bir Uyghur putbolchi irpan hézimning 2018-yili 2-ayda lagérgha élip kétilgenliki radiyomiz teripidin delillen'gendin kéyin küchlük inkas peyda qilghanidi. Irpan hézim 2018‏-yili 2‏-ayda ghayib bolghandin kéyin tunji qétim 2019-yilining bashlirida ötken xitay ijtima'iy taratqulirida peyda bolghan. Emma uning qoyup bérilgenliki delillenmigenidi.

Bilbaw yénik atlétika komandisida baské mahiri bolush (Athletic Bilbao doesn’t have Basque) bir idi'om bolup, mezkur idi'om tenterbiye saheside nahayiti köp qollinilidiken.

Melum bolushiche bu idi'omning esli kélish menbesi mundaq iken: 1912-yildin bashlap, ispaniyediki birleshme putbol kulubi bilbawning yézilmighan bir qa'idisi bar bolup, bu kulub peqet bask dölitide tughulghan yaki putbol maharitini bask kulubida ögen'gen topchilarni qobul qilidiken. Shunga melum bir komandida alahide orun'gha ige bolush, xuddi "Bilbaw yénik atlétika komandisida baské mahiri bolush" qa oxshitilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet