Сәмимә ханим: "хитай йолдишимни түркийәгә барди, балилирини түркийәдә оқутти дәп қамиди"

Ихтиярий мухбиримиз арслан
2021-03-02
Share
Сәмимә ханим: Истанбулдики хитай консулханиси алдида 70 күндин буян давам қиливатқан "аиләм қәйәрдә" "милләт нөвити" намдики наразилиқ намайиши қар вә ямғур яғсиму тохтимай давам қилмақта. 2021-Йили 2-март, түркийә.
RFA/Arslan

Хитай түрмиси вә лагерлириға қамалған уруқ-туғқанлириниң вә аилисиниң из-дерикини қилиш үчүн истанбулдики хитай консулханиси алдида 70 күндин буян давам қиливатқан "аиләм қәйәрдә" "милләт нөвити" намдики наразилиқ намайиши қар вә ямғур яғсиму тохтимай давам қилмақта.

Бу намайиш һечбир тәшкилатниң орунлаштуруши билән болмастин хәлқ өзлүкидин тәшкиллинип орунлаштурулған болғачқа истанбулдики һәр қайси шәрқий түркистан аммиви тәшкилатларниң рәһбәрлири, әзалири вә һечбир тәшкилатқа әза болмиған хәлқ аммиси болуп көп санда кишиниң қатнишиши билән бирлик-баравәрлик ичидә һәр күни давам қиливатиду.

Бүгүн, йәни 3-айниң 2-күни һава тутуқ, ямғур йеғиватқан болсиму намайишчилар қоллирида ай юлтузлуқ көк байрақ билән хитайниң түрмә вә лагерлириға қамалған уруқ-туғқанлириниң рәсимлирини көтүргән һалда хитайниң истанбулдики консулхана алдиға җәм болди. Намайиш җәрянида ямғур арилаш тул яғқан болсиму намайишчилар орнини ташлап кәтмәй мәйданда чиң туруп намайишни давам қилди. Илгирики күни явропа хәвәрлири Euronews агентлиқиниң мухбири келип намайишчиларни зиярәт қилип кәткәниди. Бүгүн биз әркин асия радийоси мухбири бөлүш сүпитимиз билән намайишчиларни арилап йүрүп бир қанчә киши билән, уларниң хитай түрмисигә вә яки лагерға қамалған уруқ-туғқанлири һәққидә сөһбәт елип бардуқ.

Намайишчилар қәһритан қишниң қаттиқ соғуқлирида, бәзи вақитларда қар астида, бәзидә ямғур астида қалди, әмма һечбир киши шу намайиш мәйдандин айрилмай тик турди. Улар "залим хитай аиләм қәйәрдә! ?" дегәндәк шоарларни яңритип әтрапни зилзилигә салди. Чоң йолдин өтүватқан кишиләр арисида уларни қоллайдиғанлиқини ипадиләп машинисиниң сигналини челип вә яки қол ишарити қилип өтүп кәткәнләрму болди. Намайишчилар арисида 60-70 яш әтрапида яшинип қалған уйғур бовай-момайлар, һәтта кичик балиларму бар иди.

Намайишқа қатнишиватқан сәмимә исимлик уйғур аял бизниң зияритимизни қобул қилип йолдишиниң 2016-йилидин буян түрмә вә лагерға қамалғанлиқини билдүрди.

Сәмимә ханимниң билдүрүшичә, униң йолдиши рози абдуғени бу йил 40 яшқа киргән, у сода-тиҗарәт билән шуғуллинидиған йәккә тиҗарәтчи икән, у хотән вилайитиниң керийә наһийәсидин болуп, 2015-йили аяли сәмимә вә 6 пәрзәнти билән түркийәгә көчүп келип истанбулда олтурақлашқан. 2016-Йили 9-айда истанбулдин үрүмчигә барған, керийәдики йәрлик сақчилар уни чақиртип баллириниң түркийәдә мәктәпкә өткән рәсмийәт хетини әкелип беришни тәләп қилған. Роза абдуғени 2016-йили 10-айниң 28-күни керийәгә барғанда сақчилар уни тутуп қамап қойған. Сәмимә ханим бир айдин кейин йолдишиниң икки йиллиқ қамақ җазасиға һөкүм қилинғанлиқидин хәвәр тапқанлиқини, йолдишиниң тутулуп кетишигә уларниң түркийәгә барғанлиқи вә баллирини түркийәдә оқутқанлиқи сәвәбидин икәнликини билдүрди.

Сәмимә ханим, йолдишиниң 2018-йили 10-айниң 28-күни җаза муддити тошқан болсиму, лекин даириләрниң йолдишини түрмидин чиқирип хотәндики бир лагерға қамап қойғанлиқидин хәвәр тапқанлиқини билдүрди.

Сәмимә ханимниң билдүрүшичә, униң йолдиши 2019-йили 4-айда туюқсиз телефон қилған болуп, у телефонда өзиниң лагерда еғир кесәл болуп қелип дохтурханиға йөткәлгәнликини, өттә таш бар икән дәп дохтурханида даваланғанлиқини, кейин 3 ай әтрапида қоюп берилгәнликини, әмма йәнә керийә сақчилириниң өзини үрүмчидин тутуп хотәнгә елип кәткәнликини сөзләп бәргән. Сәмимә ханим 2019-йили 9-айдин буян йолдиши билән алақә үзүлгәнликини, униңдин кейин һеч қандақ учур алалмиғанлиқини билдүрди.

Сәмимә ханим йолдишиниң тутулуп кетиш сәвәби тоғрисида тохтилип: "хитайниң асасий мәқсити биз уйғурларни йоқитиш, бизниң алтә пәрзәнтимиз төт йерим йилдин буян түркийәдә оқуватиду, хитай сақчилири бизни түркийәгә кәтти вә баллиримизни түркийәдә оқуди дәп йолдишимни түрмигә қамиди", деди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт