Атуш бөгәнлик карханичи қурбанҗан абдукеримниң лагердин чиқипла җан өзгәнлики дәлилләнди

Мухбиримиз шөһрәт һошур
2021.03.02
Атуш бөгәнлик карханичи қурбанҗан абдукеримниң лагердин чиқипла җан өзгәнлики дәлилләнди Атушлуқ карханичи қурбанҗан абдукерим лагердин чиқип 3 күндин кейин җан үзгән.
Zibibulla teminligen

Явропада яшаватқан атушлуқ муһаҗирлардин бири өзиниң юртидики мәһәлләдашлиридин-карханичи қурбанҗан абдукеримниң лагердин чиқип 3 күндин кейин җан үзгәнлиги һәққидә учур алған. Дейилишичә, бәдән еғирлиқи 100 килодин артуқ болған қурбанҗан абдукерим 2018‏-йилиниң бешида лагерға әкитилгән вә өткән һәптиниң бешида бәдән еғирлиқи 53 килограмға чүшүп қалған һаләттә қоюп берилгән. У аилисигә қайтип 3 күндин кейин һаятидин айрилған. Ениқлашлиримиз давамида йәрлик даириләр қурбанҗан абдукеримниң алисидә нәзир өткүзүливатқанлиқини ашкарилиди.

Нөвәттә германийәдә яшаватқан муһаҗирлардин зибибулланиң билдүришичә, униң юрти атуштики қошниси қурбанҗан абдукерим өткән һәптә лагердин чиқип 3 күндин кейин һаятидин айрилған. Дейилишичә, бу йил 54 яшқа киргән қурбанҗан абдукерим тонулған тиҗарәтчи вә карханичи болуп, атушниң азақ йеза бөгән кәнтидә олтурушлуқ икән. У 2018-йили бәдән еғирлиқ 100 килограмдин артуқ мәзгилидә лагерға әкитилгән вә аридин 3 йил өткәндә, йәни өткән сәйшәнбә күни бәдән еғирлиқи 53 килограм һаләттә лагердин қоюп берилгән. Биз бу учурни дәлилләш үчүн қурбанҗан нопуслуқ болған атушниң азақ йезисидики алақидар хадимларға телефон қилдуқ. Телефон зиярәтлиримиз давамида азақ йезисиниң бөгән кәнтидә төнүгүн нәзир өткүзүлгәнлики ашкариланди.

Мәлум болушичә, даириләр мәзкур аилигә қатнашқучилар саниниң 20 дин ешип кәтмәслик шәрти билән нәзир өткүзүшигә рухсәт бәргән. Телефонимизни қобул қилған бөгән кәнт аһалиләр кометитиниң хадимлири, қурбанҗан абдукеримниң буниңдин 5-6 күн бурун түгәп кәткәнлики вә шу күнләрдә сақчиларниң назарити астида йәрликкә қоюлғанлиқини дәлиллиди.

Муһаҗир зибибулла әпәндиниң йәнә тонуштуришичә, икки қериндиши билән бирликтә атуш билән бешкәк арисида рәхт тиҗариити билән шуғуллиниватқан қурбанҗан абдукерим илгири атушта тунҗи болуп тоқумичилиқ фабрикиси қурған икән. 4 Пәрзәнтниң атиси болған қурбанҗан абдукерим 2015‏-йилниң алди-кәйнидә бир қетим сәуди әрәбистаниға берип һәҗ ибадитини ада қилған икән. Пәрәз қилинишичә, у әнә шу сәвәптин “диний әсәбийлик” гумани билән тутқун қилинған.

Ениқлашлримиздин әслидә саламәтликидә һечқандақ мәсилә болмиған қурбанҗан абдукеримниң немә сәвәбтин өлгәнлики айдиңлашмиди, әмма униң лагерға кириш вә чиқиш арисидики бәдән еғирлиқ пәрқи униң лагерда озуқ йетишмәслик яки юқтуривалған мәлум бир кесәллик сәвәбидин еғир дәриҗидә мағдурсизланғанлиқи вә буниң ақивитидә җан үзгәнлик еһтималлиқи мәлум болмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.