Atush bögenlik karxanichi qurbanjan abdukérimning lagérdin chiqipla jan özgenliki delillendi

Muxbirimiz shöhret hoshur
2021.03.02
Share on WhatsApp
Share on WhatsApp
Atush bögenlik karxanichi qurbanjan abdukérimning lagérdin chiqipla jan özgenliki delillendi Atushluq karxanichi qurbanjan abdukérim lagérdin chiqip 3 kündin kéyin jan üzgen.
Zibibulla teminligen

Yawropada yashawatqan atushluq muhajirlardin biri özining yurtidiki mehelledashliridin-karxanichi qurbanjan abdukérimning lagérdin chiqip 3 kündin kéyin jan üzgenligi heqqide uchur alghan. Déyilishiche, beden éghirliqi 100 kilodin artuq bolghan qurbanjan abdukérim 2018‏-yilining béshida lagérgha ekitilgen we ötken heptining béshida beden éghirliqi 53 kilogramgha chüshüp qalghan halette qoyup bérilgen. U a'ilisige qaytip 3 kündin kéyin hayatidin ayrilghan. Éniqlashlirimiz dawamida yerlik da'iriler qurbanjan abdukérimning aliside nezir ötküzüliwatqanliqini ashkarilidi.

Nöwette gérmaniyede yashawatqan muhajirlardin zibibullaning bildürishiche, uning yurti atushtiki qoshnisi qurbanjan abdukérim ötken hepte lagérdin chiqip 3 kündin kéyin hayatidin ayrilghan. Déyilishiche, bu yil 54 yashqa kirgen qurbanjan abdukérim tonulghan tijaretchi we karxanichi bolup, atushning azaq yéza bögen kentide olturushluq iken. U 2018-yili beden éghirliq 100 kilogramdin artuq mezgilide lagérgha ekitilgen we aridin 3 yil ötkende, yeni ötken seyshenbe küni beden éghirliqi 53 kilogram halette lagérdin qoyup bérilgen. Biz bu uchurni delillesh üchün qurbanjan nopusluq bolghan atushning azaq yézisidiki alaqidar xadimlargha téléfon qilduq. Téléfon ziyaretlirimiz dawamida azaq yézisining bögen kentide tönügün nezir ötküzülgenliki ashkarilandi.

Melum bolushiche, da'iriler mezkur a'ilige qatnashquchilar sanining 20 din éship ketmeslik sherti bilen nezir ötküzüshige ruxset bergen. Téléfonimizni qobul qilghan bögen kent ahaliler kométitining xadimliri, qurbanjan abdukérimning buningdin 5-6 kün burun tügep ketkenliki we shu künlerde saqchilarning nazariti astida yerlikke qoyulghanliqini delillidi.

Muhajir zibibulla ependining yene tonushturishiche, ikki qérindishi bilen birlikte atush bilen béshkek arisida rext tijari'iti bilen shughulliniwatqan qurbanjan abdukérim ilgiri atushta tunji bolup toqumichiliq fabrikisi qurghan iken. 4 Perzentning atisi bolghan qurbanjan abdukérim 2015‏-yilning aldi-keynide bir qétim se'udi erebistanigha bérip hej ibaditini ada qilghan iken. Perez qilinishiche, u ene shu seweptin “Diniy esebiylik” gumani bilen tutqun qilin'ghan.

Éniqlashlrimizdin eslide salametlikide héchqandaq mesile bolmighan qurbanjan abdukérimning néme sewebtin ölgenliki aydinglashmidi, emma uning lagérgha kirish we chiqish arisidiki beden éghirliq perqi uning lagérda ozuq yétishmeslik yaki yuqturiwalghan melum bir késellik sewebidin éghir derijide maghdursizlan'ghanliqi we buning aqiwitide jan üzgenlik éhtimalliqi melum bolmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet