Карханичи қадир реһим вә һәдиси мунәввәр реһим ата-анисиниң өлүмигә адәм көп кәлгәнлики үчүн кесилгән

Мухбиримиз шөһрәт һошур
2019-07-18
Елхәт
Пикир
Share
Принт
Қәшқәр нәзәрбағлиқ карханичи қадир реһим әпәнди.
Қәшқәр нәзәрбағлиқ карханичи қадир реһим әпәнди.
RFA/Shöhret Hoshur

Муһаҗирәттики уйғурларниң гуваһлиқ баянатлиридин ашкарилинишичә, қәшқәр нәзәрбағлиқ карханичи қадир реһим вә сиңлиси мунәввәр реһим, ата-анисиниң өлүмигә бәлгиләнгән сандин көп адәм кәлгәнлики үчүн 11 вә 15 йиллиқтин кесилгән. Мухбиримизниң бу һәқтә елип барған ениқлашлири давамида йәрлик алақидар хадимлар, даириләрниң өлүм мурасимлирини 10-15 киши биләнла өткүзүшни тәләп қиливатқанлиқи вә қатнашқучиларниң 30дин ешип кетишни қаттиқ чәкләватқанлиқини ашкарилиди.

Йеқинда «уйғур спекер» намидики бир тивиттир учурида, қәшқәр нәзәрбағлиқ қадир реһим билән һәдиси мунәввәр реһимниң ата-анисиниң өлүм мурасимини исламий йосунда өткүзгәнлики үчүн кесилип кәткәнлики баян қилинған. Ениқлашлиримиз давамида қадир реһимниң акиси тәвәккүл реһимниң африқа дөлити суданда төмүр фабрикиси қурған бир карханичи икәнлики ашкариланди. Зияритимизни қобул қилған тәвәккүл реһим кесилип кәткән иниси вә сиңлиси һәққидә мундақ мәлумат бәрди. Униң дейишичә иниси қадирҗан реһим қәшқәр нәзәрбағда 15 йилдин буян бир хиш фабрикисини маңдуруватқан бир карханичи болуп, униң 2013-вә 2017-йиллири түгәп кәткән ата-анисиниң өлүм мурасимиға көп санда адәм кәлгәнлики үчүн 15 йиллиқ кесиветилгән. Әслидә бир аилә аяли болған сиңлиси мунәввәр реһимму охшаш сәвәб билән 11 йиллиқ кесилгән. Қәшқәр нәзәрбағдики алақидар хадимлар бу һәқтики соаллиримизға җаваб бәрмиди. Телефонимизни қобул қилған ғулҗа тәвәсидики бир аяллар мудири, нөвәттә ғулҗида өлүм мурасимлирини 10-15 киши билән узутушниң тәләп қилиниватқанлиқи, өлүмгә қатнашқучиларниң 30дин ешип кетишкә қәтий болмайдиғанлиқини ашкарилиди. Йәнә бир хадимму, нөвәттә ғулҗида юрт җамаити билән өлүм мурасими узутушниң тохтиғанлиқи, өлүм пәтиси үчүн мәһәллә атлашқиму болмайдиғанлиқи, мурасимниң пәқәт аилә әзалири, уруқ-туғқанлири вә қолум қошнилири биләнла узайдиғанлиқи ; буниңдиму йәнә қатнашқучиларниң бәлгиләнгән сандин ешип кәтсә болмайдиғанлиқини ашкарилиди. Бу хадимлар йәнә өлүм мурасимлириниң үстидә чоқум бир кадир назарәтчилик қилидиғанлиқи, тәйинләнгән бир диний затниң мурасимға йетәкчилик қилидиғанлиқини баян қилди.

Қәшқәр нәзәрбағлиқ тәвәккүл реһимниң баян қилишичә, униң ата-анисиниң өлүм мурасими даириләрдин рухсәт елинған вә тәйинләнгән кадир вә диний затлар мурасимниң үстидә һазир болған болсиму, пәқәт мурасимға адәм көп келип кәткәнлики үчүнла мәзкур аилә җазалиништин халий болалмиған. Униң иниси қадирҗанниң иш һаяти бойи, һөкүмәтниң чишиға тәгмәслик һәққидә көрситип кәлгән еһтиятчанлиқиму карға кәлмигән.

Вәзийәттин хәвәрдар бәзи кишиләр даириләрниң, өлүм мурасимиға қатнишидиған кишиләрниң санини чәкләшни 3-4 йилниң алдида йолға қойғанлиқи вә буниң уйғурларниң топлишип иш чиқирип қоюшиниң алдини елиш үчүн икәнликини илгири сүрсә, йәнә бәзиләр, йеқинқи икки йилдин буян даириләрниң лагердики сирлиқ өлүмләрни сиртқа ашкарилимаслиқ үчүн өлүм мурасимиға қатнишидиған кишиләр санини 10-15тин ашурмайватқанлиқини тәкитлимәктә.

Пикирләр (0)
Share
Толуқ бәт