Кесәлчан һамут деһқанниң лагерда "кәспкә чиққан" мәзгилидә завутта җан үзгәнлики ашкариланди

Мухбиримиз шөһрәт һошур
2021-11-25
Share
Алтай 5 ‏-оттура мәктипиниң Қораллиқ әскәрниң қәшқәр түрмисиниң қаравулханисида турған көрүнүши. 2021-Йили 3-май, қәшқәр.
REUTERS

82 яшлиқ муһаҗир мәмәттохти имин ака, 2017‏-йили ана юрти тоққузақта көргән-билгәнлири қатарида қошниси һамут деһқан дегән кишиниң лагердин җәсити чиққанлиқини мәлум қилған иди. Мухбиримизниң тоққузаққа қарита елип барған телефон зиярәтлири давамида, һамут деһқан дегән бу кишиниң кесәлчан һаләттә лагерға елип кетилгәнлики вә лагерда аталмиш "кәспкә чиққан" вақтида иш үстидә һаятидин айрилғанлиқи дәлилләнди. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Һөрмәтлик радийо аңлиғучилар, муһаҗир мәмәттохти имин акиниң юрт зиярти давамида көргәнлиригә асасән баян қилишичә, уйғур елида 2017‏-йилиниң оттурилиридила лагер сәвәблик көплигән паҗиәләр йүз беришкә башлиған. Әмма аһалиләр вәзийәтниң кәскинлики сәвәбидин көргән-билгәнлирила әмәс, бәлки бешидин кәчүргәнлириниму еғизға елишқа җүрәт қилалмиған. У тоққузақ ләнгәрдики қошниси һамут деһқан дегән кишиниң лагерда җан үзгәнликини, пәқәт қошнисиниң һойлисиға кирип чиқиватқан сақчиларниң сүрлүк қияпити вә һазидар аилә әзалириниң ғәмкин чирайидинла биләлигән.

Мәлум болушичә тоққузақ ләнгәрниң 2‏-кәнт аһалиси болған һамут деһқанниң фамилиси турди болуп, у 2017‏-йилиниң бешида лагерға әкитилгән вә кейин үрүмчидики бир лагер яки түрмигә йөткәлгән.

Телефон зиярәтлиримиз давамида хадимлардин бириниң паш қилишичә, һамут деһқан лагерға әкитилиштин бурунла кесәлчан һаләттә икән. Лагердики мәзгилидә саламәтлики сәвәблик униңға "йеник иш" дәп қаралған навайлиқ өгитилгән. У лагердин "кәспкә чиққан" мәзгилидә үрүмчидики бир мәҗбурий әмгәк мәйданида навайлиқ қиливатқан мәзгилидә һаятидин айрилған. Тоққузақ ләнгәрдики 2‏-кәнт аманлиқ мудири өз кәнтидә лагерда әң дәсләптә өлгән кишиниң ким икәнликини сориғинимизда "һамут деһқан" дәп җавап бәрди вә униң лагерда җан үзгинигә 3 йилдин ашқанлиқини дәлиллиди.

Муһаҗир мәмәттохти имин ака, һамут деһқанниң 40 яшлар чамисида икәнлики, аяли турахан иминниң 3 балиси билән тул қалғанлиқини тилға алған иди. Мәзкур аманлиқ мудири бу учурларниң тоғрилиқини дәлиллиди. Һамут деһқанниң саламәтлик әһвали һәққидә мәлумат бәргән кәнт хадиминиң паш қилишичә, һамут деһқан кесчлчан һаләттә лагерға елип меңилғанда, аяли турахан имин сақчиларға йиғлап ялвуруп, йолдшиниң саламәтликиниң барғансери яманлишип кетиватқанлиқи, еғир әмгәк яки "тәрбийә" ни көтүрәлмәйдиғанлиқи вә аилидин айрилса һаятиға хәвп йетидиғанлиқини баян қилған икән. Әмма сақчилар һамут деһқанға пәрқлиқ муамилә қилидиниғанлиқини билдүрүп, лагерға елип кәткән. Дейилишичә, лагерда униң саламәтлики көздә тутулуп, әң дәсләптә "кәсп" кә чиқирилған, йәни үрүмчидики мәлум бир мәҗбурий әмгәк орниға йөткәлгән.

Илгири зияртимизни қобул қилған бир лагер сақчиси, лагер тутқунлири лагерға әкитилиштин бурун дохтурханида тәкшүрүлидиғанлиқи вә кесили байқалса, давалап сақайтилип андин лагерға апирилидиғанлиқини, йәни лагерға беришиниң кечикидиғанлиқи, әмма бериштин қутулалмайдиғанлиқини паш қилған иди. Учурлардин қариғанда, һамут деһқан дохтурханиға апирилип тәкшүрүлүш басқучидин өткүзүлмәйла лагерға әкитилгән вә униңға "етибар" сүпитидә "кәсп" өгитилгән вә селинған навайлиқ иши үстидә җан үзгән.

Игиләшлиримизидин һамут деһқанниң немә кесили барлиқи, навайханида иш үстидә қандақ бир әһвалда җан үзгәнлики мәлум әмәс. Муһаҗир мәмәтохти имин акиниң баян қилишичә, һамут деһқанниң җәсити үрүмчидин әкилингән вә җәсәт көкирип кетилгән һаләттә аилисигә тапшурулған. Мәзкур аилиниң һаза ечиши вә нәзир өткүзишигә йол қоюлмиған.

Юқурида тоққузақ лагерида 40 яшлар чамисидики һамут деһқан исимлик кишиниң 2017‏-йили кесәлчан һаләттә лагерға әкитилгәнлики вә үрүмчидики бир бир мәҗбурий әмгәк мәйданида иш үстидә җан үзгәнлики һәққидә аңлитиш бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт