Késelchan hamut déhqanning lagérda "Kespke chiqqan" mezgilide zawutta jan üzgenliki ashkarilandi

Muxbirimiz shöhret hoshur
2021-11-25
Share
Altay 5 ‏-ottura mektipining Qoralliq eskerning qeshqer türmisining qarawulxanisida turghan körünüshi. 2021-Yili 3-may, qeshqer.
REUTERS

82 Yashliq muhajir memettoxti imin aka, 2017‏-yili ana yurti toqquzaqta körgen-bilgenliri qatarida qoshnisi hamut déhqan dégen kishining lagérdin jesiti chiqqanliqini melum qilghan idi. Muxbirimizning toqquzaqqa qarita élip barghan téléfon ziyaretliri dawamida, hamut déhqan dégen bu kishining késelchan halette lagérgha élip kétilgenliki we lagérda atalmish "Kespke chiqqan" waqtida ish üstide hayatidin ayrilghanliqi delillendi. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Hörmetlik radiyo anglighuchilar, muhajir memettoxti imin akining yurt ziyarti dawamida körgenlirige asasen bayan qilishiche, Uyghur élida 2017‏-yilining otturiliridila lagér seweblik köpligen paji'eler yüz bérishke bashlighan. Emma ahaliler weziyetning keskinliki sewebidin körgen-bilgenlirila emes, belki béshidin kechürgenlirinimu éghizgha élishqa jür'et qilalmighan. U toqquzaq len'gerdiki qoshnisi hamut déhqan dégen kishining lagérda jan üzgenlikini, peqet qoshnisining hoylisigha kirip chiqiwatqan saqchilarning sürlük qiyapiti we hazidar a'ile ezalirining ghemkin chirayidinla bileligen.

Melum bolushiche toqquzaq len'gerning 2‏-kent ahalisi bolghan hamut déhqanning familisi turdi bolup, u 2017‏-yilining béshida lagérgha ekitilgen we kéyin ürümchidiki bir lagér yaki türmige yötkelgen.

Téléfon ziyaretlirimiz dawamida xadimlardin birining pash qilishiche, hamut déhqan lagérgha ekitilishtin burunla késelchan halette iken. Lagérdiki mezgilide salametliki seweblik uninggha "Yénik ish" dep qaralghan nawayliq ögitilgen. U lagérdin "Kespke chiqqan" mezgilide ürümchidiki bir mejburiy emgek meydanida nawayliq qiliwatqan mezgilide hayatidin ayrilghan. Toqquzaq len'gerdiki 2‏-kent amanliq mudiri öz kentide lagérda eng deslepte ölgen kishining kim ikenlikini sorighinimizda "Hamut déhqan" dep jawap berdi we uning lagérda jan üzginige 3 yildin ashqanliqini delillidi.

Muhajir memettoxti imin aka, hamut déhqanning 40 yashlar chamisida ikenliki, ayali turaxan iminning 3 balisi bilen tul qalghanliqini tilgha alghan idi. Mezkur amanliq mudiri bu uchurlarning toghriliqini delillidi. Hamut déhqanning salametlik ehwali heqqide melumat bergen kent xadimining pash qilishiche, hamut déhqan késchlchan halette lagérgha élip méngilghanda, ayali turaxan imin saqchilargha yighlap yalwurup, yoldshining salametlikining barghanséri yamanliship kétiwatqanliqi, éghir emgek yaki "Terbiye" ni kötürelmeydighanliqi we a'ilidin ayrilsa hayatigha xewp yétidighanliqini bayan qilghan iken. Emma saqchilar hamut déhqan'gha perqliq mu'amile qilidinighanliqini bildürüp, lagérgha élip ketken. Déyilishiche, lagérda uning salametliki közde tutulup, eng deslepte "Kesp" ke chiqirilghan, yeni ürümchidiki melum bir mejburiy emgek ornigha yötkelgen.

Ilgiri ziyartimizni qobul qilghan bir lagér saqchisi, lagér tutqunliri lagérgha ekitilishtin burun doxturxanida tekshürülidighanliqi we késili bayqalsa, dawalap saqaytilip andin lagérgha apirilidighanliqini, yeni lagérgha bérishining kéchikidighanliqi, emma bérishtin qutulalmaydighanliqini pash qilghan idi. Uchurlardin qarighanda, hamut déhqan doxturxanigha apirilip tekshürülüsh basquchidin ötküzülmeyla lagérgha ekitilgen we uninggha "Étibar" süpitide "Kesp" ögitilgen we sélin'ghan nawayliq ishi üstide jan üzgen.

Igileshlirimizidin hamut déhqanning néme késili barliqi, nawayxanida ish üstide qandaq bir ehwalda jan üzgenliki melum emes. Muhajir memetoxti imin akining bayan qilishiche, hamut déhqanning jesiti ürümchidin ekilin'gen we jeset kökirip kétilgen halette a'ilisige tapshurulghan. Mezkur a'ilining haza échishi we nezir ötküzishige yol qoyulmighan.

Yuqurida toqquzaq lagérida 40 yashlar chamisidiki hamut déhqan isimlik kishining 2017‏-yili késelchan halette lagérgha ekitilgenliki we ürümchidiki bir bir mejburiy emgek meydanida ish üstide jan üzgenliki heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet