Peyziwatta zohurluqni tosush üchün bayraq chiqirish, tarawini tosush üchün siyasiy öginish orunlashturulghan

Muxbirimiz shöhret hoshur
2020-05-15
Élxet
Pikir
Share
Print
Xitay hökümiti xotende ötküzgen "Térrorluq" qa qarshi qesemyad yighinlirining biridin körünüsh.
Xitay hökümiti xotende ötküzgen "Térrorluq" qa qarshi qesemyad yighinlirining biridin körünüsh.
Social Media

Melum bolushiche, Uyghur rayonida ahaliler namaz oqush we diniy atalghular bilen salamlishishtinmu endishe qilip turuwatqan weziyet 3 yildin buyan dawam qilip kéliwatqan bolsimu, da'iriler, bu yilliq ramzan mezgilide, ahalilerning roza ibadetlirini cheklesh tedbirini yenila jiddiy we qattiq shekilde yolgha qoyghan. Peyziwattiki alaqidar xadimlarning bayan qilishiche, da'iriler ahalilerning "Seherde oghriliqche zohurgha qopushining aldini élish üchün bayraq chiqirish pa'aliyiti, kéchiside tarawi oqushining aldini élish üchün kechlik siyasiy öginish" orunlashturghan.

Uyghur rayonida 2014 ‏-yildin bashlap yolgha qoyulup kéliwatqan etigende bayraq chiqirish pa'aliyiti, xitayda tajsiman wirus tarqalghandin kéyin toxtitip qoyulghanidi. Melum bolushiche, peyziwat nahiyesidiki da'iriler bu yil ramzan mezgilide ahalilerning yoshurunche zohurgha qopushining aldini élish üchün, ramzan bashlinishtin bir hepte awwal bayraq chiqirish pa'aliyitini qaytidin eslige keltürgen. Da'iriler yene ahalilerning kechte yoshurunche tarawa oqushigha purset bermeslik üchün, kechlik siyasiy öginish orunlashturghan. Herqaysi kent ishxanilirida échilghan siyasiy öginish kech sa'et 9:30 bilen 10:30 arisigha orunlashturulghan. Kent xadimining bayan qilishiche, kentte köpinche kishiler "Sirtta" bolghachqa, her küni yighin'gha peqet 200-250 che kishi qatnashqan. Bu yighinda qizil teshwiqatchi qurban niyazning yillardin béri özlükidin hoylisida bayraq chiqiriwatqanliqi heqqidiki teshwiqat filimi körsitilgen.

Peyziwattiki melum bir ashxana sahibining ashkarilishiche, uning ashxanisi ramzan kirgendin kéyin, ilgirikige qarighanda aldirash bolghan, sodisi yükselgen. Bu ashxana sahibining bayanliridin melum bolushiche, bu ashxana jaylashqan tewelikte ahaliler ramzan mezgilide östeng chépishqa sélin'ghan.

Biz bu tedbirler heqqide yenimu tepsiliy melumat élish üchün alaqidar saqchi orunlirigha téléfon qilduq. Bir saqchixana xadimi, yuqiriqi tedbirlerdin bashqa, ramzan mezgilide yene kocha charlashningmu kéche-kündüz dawam qiliwatqanliqi, bu charlash dawamida tewelikke sirttin kelgüchiler bar-yoqluqigha qattiq diqqet qiliwatqanliqini ashkarilidi.

Yuqirida qeshqer peyziwatta ramzan mezgilide ahalilerning yoshurunche zohurluqqa turushini tosush üchün bayraq chiqirish, tarawi oqushini tosush üchün kechlik siyasiy öginish orunlashturulghanliqi heqqide melumat berduq.

Toluq bet