Дотсент бурһан сити уруқ-туғқанлирини лагердин қоғдаш үчүн сақчи башлиқи билән үндидарда бир йил күрәш қилған

Мухбиримиз шөһрәт һошур
2019-03-13
Елхәт
Пикир
Share
Принт
Истанбулдики сабаһидин заим университетниң дотсенти бурһан сети әпәнди түркийә җумһурийитиниң рәиси рәҗәп таййип әрдоғанниң қолидин мукапат тапшуруп алмақта. 2018-Йили декабир, түркийә.
Истанбулдики сабаһидин заим университетниң дотсенти бурһан сети әпәнди түркийә җумһурийитиниң рәиси рәҗәп таййип әрдоғанниң қолидин мукапат тапшуруп алмақта. 2018-Йили декабир, түркийә.
RFA/Arslan

Мәлум болушичә қумул вилайәтлик җ х идарисиниң башлиқи абдувәли 2017-йили хизмәт иши билән малайсияға кәлгән вә бу мәзгилдә малайсиядики бир университетта хизмәт қиливатқан ярдәмчи профессор бурһан ситини хитай тәрәп билән һәмкарлишишқа дәвәт қилған. Бурһан сити бу тәклипни силиқ сипайә рәт қилип, хизмәт еһтияҗи билән түркийәгә йөткәлгән.

Сақчи башлиқи абдувәли униңға үндидардин учур йоллап өзиниң малайсияға хизмәткә кәлгәнлики вә уни һәмкарлишишқа дәвәт қилғанлиқини һечкимгә демәсликни тапилиған вә ашкарилап қойса аилә-тавабиатлириниң зиян-зәхмәткә учрап қалидиғанлиқини әскәрткән.

2018-Йили у түркийәдики мәзгилидә мәзкур сақчи башлиқи униң қумулдики дадисини униңға телефон қилғузуп; уни йәнә бир қетим өзлири үчүн хизмәт қилдурушқа урунуп баққан. Бурһан сити бу қетим у сақчиға телефон қайтуруп, әгәр өзи вә аилисини йәнә аварә қилса, бу аваз вә син хатирилирини дуняға ашкарилайдиғанлиқини баян қилған. Нәтиҗидә, 2018-йили 11-айға қәдәр униң бивастә аилә әзалиридин һечким лагирға әкетилмигән.

У пәқәт мәлум бир тонуши арқилиқ 11-айниң 11-күни сиңлисиниң лагирға әкитилгәнликини уққан. У бу чағдики қолидики аваз вә син хатирисини рәтләп мәзкур сақчи башлиқиға йоллиған һәм дәрһал қоюп бәрмисә қолидики пакитларни дуняға ашкарилайдиғанлиқини ейтқан. Сақчилар униң сиңлисини шу күнила қоюп бәргән.

Сиңлиси билән телфонда көрүшкән бурһан сити, анисиниң сиңлисидин бир һәптә бурун лагерға әкитилгәнликидин хәвәр тапқан; у сақчи башлиқи абдувәлигә қайта телефон қилип, анисиниму 3 күн ичидә қоюп беришни тәләп қилған. Бу тәләпму дәрһал беҗа кәлтүрүлгән.

У йәнә мәлум тонушлири арқилиқ дадисиниң 11-айниң 23-күни лагерға әкетилгәнликидин хәвәр тапқан вә сақчи башлиқиға телефон қилип, дадисиниңму қоюп берилишини қолға кәлтүргән.

Өткән йил 12-айниң 8‏-күни униң сиңлиси һаммиси билән бирликтә иккинчи қетим тутқун қилинған. У бу учурни алғандин кейин мәзкур сақчиға йәнә телефон қилғинида униң билән сөзлишишкә мувәппәқ болалмиған.

Мәлум болушичә, бурһан сити қолидики аваз вә син хатирлирини қорал қилип пайдилинип, бивастә аилә әзалириниң көп қисмини лагердин сақлап қалған.

Пикирләр (0)
Share
Толуқ бәт