Dotsént burhan siti uruq-tughqanlirini lagérdin qoghdash üchün saqchi bashliqi bilen ündidarda bir yil küresh qilghan

Muxbirimiz shöhret hoshur
2019-03-13
Élxet
Pikir
Share
Print
Istanbuldiki sabahidin za'im uniwérsitétning dotsénti burhan séti ependi türkiye jumhuriyitining re'isi rejep tayyip erdoghanning qolidin mukapat tapshurup almaqta. 2018-Yili dékabir, türkiye.
Istanbuldiki sabahidin za'im uniwérsitétning dotsénti burhan séti ependi türkiye jumhuriyitining re'isi rejep tayyip erdoghanning qolidin mukapat tapshurup almaqta. 2018-Yili dékabir, türkiye.
RFA/Arslan

Melum bolushiche qumul wilayetlik j x idarisining bashliqi abduweli 2017-yili xizmet ishi bilen malaysiyagha kelgen we bu mezgilde malaysiyadiki bir uniwérsitétta xizmet qiliwatqan yardemchi proféssor burhan sitini xitay terep bilen hemkarlishishqa dewet qilghan. Burhan siti bu teklipni siliq sipaye ret qilip, xizmet éhtiyaji bilen türkiyege yötkelgen.

Saqchi bashliqi abduweli uninggha ündidardin uchur yollap özining malaysiyagha xizmetke kelgenliki we uni hemkarlishishqa dewet qilghanliqini héchkimge démeslikni tapilighan we ashkarilap qoysa a'ile-tawabi'atlirining ziyan-zexmetke uchrap qalidighanliqini eskertken.

2018-Yili u türkiyediki mezgilide mezkur saqchi bashliqi uning qumuldiki dadisini uninggha téléfon qilghuzup؛ Uni yene bir qétim özliri üchün xizmet qildurushqa urunup baqqan. Burhan siti bu qétim u saqchigha téléfon qayturup, eger özi we a'ilisini yene aware qilsa, bu awaz we sin xatirilirini dunyagha ashkarilaydighanliqini bayan qilghan. Netijide, 2018-yili 11-aygha qeder uning biwaste a'ile ezaliridin héchkim lagirgha ekétilmigen.

U peqet melum bir tonushi arqiliq 11-ayning 11-küni singlisining lagirgha ekitilgenlikini uqqan. U bu chaghdiki qolidiki awaz we sin xatirisini retlep mezkur saqchi bashliqigha yollighan hem derhal qoyup bermise qolidiki pakitlarni dunyagha ashkarilaydighanliqini éytqan. Saqchilar uning singlisini shu künila qoyup bergen.

Singlisi bilen télfonda körüshken burhan siti, anisining singlisidin bir hepte burun lagérgha ekitilgenlikidin xewer tapqan؛ u saqchi bashliqi abduwelige qayta téléfon qilip, anisinimu 3 kün ichide qoyup bérishni telep qilghan. Bu telepmu derhal béja keltürülgen.

U yene melum tonushliri arqiliq dadisining 11-ayning 23-küni lagérgha ekétilgenlikidin xewer tapqan we saqchi bashliqigha téléfon qilip, dadisiningmu qoyup bérilishini qolgha keltürgen.

Ötken yil 12-ayning 8‏-küni uning singlisi hammisi bilen birlikte ikkinchi qétim tutqun qilin'ghan. U bu uchurni alghandin kéyin mezkur saqchigha yene téléfon qilghinida uning bilen sözlishishke muweppeq bolalmighan.

Melum bolushiche, burhan siti qolidiki awaz we sin xatirlirini qoral qilip paydilinip, biwaste a'ile ezalirining köp qismini lagérdin saqlap qalghan.

Toluq bet