Канададики мусулман студентлар «уйғур әркинлик йиғилиши» өткүзди

Мухбиримиз гүлчеһрә
2019-05-07
Елхәт
Пикир
Share
Принт
Канаданиң пайтәхти оттавадики мусулман студентлар җәмийитиниң әзалири өткүзгән «уйғур әркинлик йиғилиши» мәхсус паалийитидин көрүнүш. 2019-Йили 4-май.
Канаданиң пайтәхти оттавадики мусулман студентлар җәмийитиниң әзалири өткүзгән «уйғур әркинлик йиғилиши» мәхсус паалийитидин көрүнүш. 2019-Йили 4-май.
RFA/Gulchehre

Уйғурлар еғир диний бастурушқа учраватқан мусулманлар болуш сүпити билән рамизанда қайтидин дуня җамаәтчиликиниң, мусулманлар вә мәтбуатларниң диққәт нуқтиси болмақта.

Канаданиң пайтәхти оттавадики мусулман студентлар җәмийитиниң әзалири 4-май шәнбә күни мәхсус «уйғур әркинлик йиғилиши» өткүзүш арқилиқ, инсанларни 2 милйондин артуқ лагерға қамалған уйғур қатарлиқ мусулман хәлқлиригә ярдәм қилишқа, хитай һөкүмити тәрипидин барлиқ диний вә инсаний әркинлики еғир бастурушқа учрап, әқәллий кишилик һоқуқлиридин мәһрум қалдурулуп зулум чекиватқан уйғурларға көңүл бөлүшкә чақириқ қилған.

Шәнбә күни оттава вақти чүштин кейин саәт 1дин 3:30 ғичә давам қилған бу йиғилишқа 50 тин артуқ һәр милләт мусулман студентлири актиплиқ билән иштирак қилған болуп, улар қоллириға канаданиң байриқи билән тәң шәрқий түркистан байрақлирини, «уйғурларға әркинлик», «хитай лагерларни тақисун» дегәндәк лозункиларни көтүрүп, өткән-кәчкән кишиләргә уйғурларниң нөвәттики вәзийитини аңлатқан. Улар бу арқилиқ уйғурларға болған һесдашлиқи вә қоллишини ипадилигән. Намайишқа монтреал вә оттавадики уйғурларму келип қатнашқан. Намайиш җәрянида канададики уйғур тәшкилат вәкиллири уйғурларниң вәзийити һәққидә доклат бәргән, канаданиң бир қисим мусулман тәшкилат вәкиллири, мусулман студентлар җәмийити вәкиллири һәмдә хәлқара кәчүрүм тәшкилатиниң вәкиллири уйғурларни қоллап баянат бәргән вә сөз қилған.

Оттавадики мәзкур намайиш паалийитини асаслиқи оттава шәһиридики университет оқуғучилиридин сарах алий вә хибах ахмед исимлик икки нәпәр мусулман қиз баш болуп тәшкиллигән. Зияритимизни қобул қилған сарах алий өзи вә дости хибахниң, хәвәр вә паалийәтләр арқилиқ 2 милйондин көп уйғурниң хитай һөкүмити тәрипидин лагерларға қамилип, қанунсиз һалда җазалиниватқан, хорлашқа учраватқан, аилилири парчилинип, балилар йетим қеливатқан, уйғурлар һәр җайда хитай даирилири тәрипидин юқири техникалиқ көзитиливатқан вә башқа хил еғир бир вәзийәтни тонуп йәткәндин кейин, һеч болмиғанда мушу хил намайиш паалийити арқилиқ уйғурларни қоллайдиғанлиқини ипадә қилишни қарар қилғанлиқини билдүрди. Улар оттава мусулман студентлар җәмийити, канада шәрқий түркистан җәмийити вә уйғур кишилик һоқуқ қурулуши һәмдә хәлқара кәчүрүм тәшкилатиниң қоллиши вә һәмкарлиқида, дуня миқясида уйғурлар тәрипидин өткүзүлүватқан «уйғур әркинлик йиғилиши» ниң чақириқиға аваз қошуш үчүн бу намайишни елип барған.

Сарах, өзиниң уйғурлар учраватқан бу еғир трагедийәни наһайити кечикип аңлиғанлиқидин әпсуслинидиғанлиқини, лекин йәнила нурғун оқуғучиларниң буни билмәйдиғанлиқини тәкитләш билән биргә «бу, тунҗи қетим уйғурларни қоллап бир паалийәт елип беришимиз, биз йәнә оқуғучилардин, аммидин аваз йиғиш, имзалиқ хәт йоллаш арқилиқ һөкүмәт вә җәмийәтни уйғурларға көңүл бөлүшкә, хитай һөкүмитигә лагерларни тақаш һәққидә бесим ишлитишкә чақириш үчүн паалийәтләр елип баримиз» дәйду.

Намайиш иштиракчилиридин монтреал уйғур җәмийитиниң рәиси нурмуһәммәт әпәнди зияритимизни қобул қилип, һәр милләттин болған мусулман студентларниң өзлүкидин тәшкиллинип өткүзгән бу намайишниң уйғурларға зор илһам болғанлиқини, өзиниңму бу қоллаштин миннәтдар болғанлиқини билдүрди.

Нурмуһәммәт әпәнди «бу намайишниң мәйданға келиши, қоллиғучилиримизниң көпийиватқанлиқиниң өзидур, бу һәм канададики уйғур қериндашлиримиз елип бериватқан уйғурларни тонуштуруш дәва паалийәтлиримизниң нәтиҗә бериватқанлиқиниң йәнә бир испати, демәк биз паалийәтләрни чоң-кичик демәй тохтимай елип беришимиз вә қоллиғучилиримизни көпәйтишимиз керәк» дәйду.

Нурмуһәммәт әпәндиниң ейтишиға қариғанда, монтреялдики уйғурлар оттава мусулман студентлар җәмийити билән тунҗи қетим, буниңдин бир қанчә ай илгири монтреал уйғур җәмийитиниң оттава университетида өткүзгән уйғур вәзийитини тонуштуруш йиғиниға қатнишип доклат бериши сәвәби билән алақә бағлиған икән.

37 Милйондин артуқ канада нопусиниң 3.2% Ни мусулманлар игиләйдиған болуп, рамизан һарписида канада баш министири җастен трудо, мәхсус рамизанлиқ тәбрик баянати елан қилип, канада җүмлидин пүтүн дуня мусулманлирини улуғ рамизан мунасивити билән мубарәкләш билән тәң, һөкүмранлар тәрипидин етиқад әркинлики вә әқәллий кишилик һоқуқлиридин мәһрум қалдурулуватқан барлиқ мусулманларға өзиниң вә канада хәлқиниң чоңқур һесдашлиқ қилидиғанлиқини һәм уларни қоллишини ипадилиди. Шундақла у исламға вә мусулманларға өчмәнлик билән зулум қилғучиларға қарита, канада һөкүмити вә хәлқиниң давамлиқ қарши мәйданда туридиғанлиқини билдүргән иди.

Пикирләр (0)
Share
Толуқ бәт