Қазақистанлиқ уйғур тәнһәрикәтчиләр дуня гимнастика чемпийони болди

Ихтиярий мухбиримиз ойған
2020.10.08
Share on WhatsApp
Share on WhatsApp
nariman-qurbanof-2020-yil-oktebir.jpg Қазақистанлиқ уйғур йигит нариман қурбаноф венгирийәниң сомбатхей шәһиридә өткүзүлгән тәнһәрикәтниң гимнастика түри бойичә дуня мусабиқисидә алтун медалға еришти. 2020-Йили өктәбир.
RFA/Oyghan

Йеқиндин буян қазақистан аммиви ахбарат васитилиридә уйғур йигити нариман қурбанофниң венгирийәниң сомбатхей шәһиридә өткән тәнһәрикәтниң гимнастика түри бойичә дуня мусабиқисидә алтун медалға еришкәнлики һәққидә хәвәрләр елан қилинишқа башлиғаниди. Бу һәққидә учурлар иҗтимаий таратқулардиму кәң тарқилип, бу вәқә уйғур җамаәтчиликини қаттиқ хушал қилғаниди.

“закон қазақистан” ахбарат агентлиқида елан қилинған “қазақистанлиқ гимнастикичи дуня мусабиқисидә ғалибийәт қазанди” намлиқ мақалида ейтилишичә, мәзкур мусабиқигә 14 мәмликәттин кәлгән тәнһәрикәтчиләр қатнашқаникән. Қазақистанлиқ тәнһәрикәтчи нариман қурбаноф “ат үстидики һәрикәт” бойичә орундиған гимнастикилиқ мәшиқлири билән алтун медалға еришкән. Иккинчи орунни харватийәлик роберт селигман, үчинчи орунни албанийәлик матвей петроф игилигән.

Мақалида ейтилишичә, мәзкур мусабиқигә йәнә бир қазақистанлиқ уйғур йигити иляс әзизофму қатнашқан болуп, у гимнастикиниң әркин түри бойичә күмүш медалға еришкән.

Қазақистандики инавәтлик мәтбуатларниң бири “қазақистан 24” агентлиқида берилгән “нариман қурбаноф: алтун медал-бу мән интилгән нәрсә иди” намлиқ мақалида нариман қурбаноф “олимпик қазақистан” тәнһәрикәт ториға сөһбәт берип, өзиниң мәзкур дуня мусабиқисидә алған тәсиратлири билән бөлүшкән. У мундақ дегән: “вабаға қаримай, мусабиқә интайин яхши, юқири дәриҗидә уюштурулған. Униңға қатнишишму интайин қалтис болди. Шунчә вақит ичидә өзүңниң қилған ишиңни көрситәләйсән. Алтун медал-бу мән шунчә вақит интилип кәлгән нәрсә иди, мән наһайити бәхтлик”.

Биз нариман қурбаноф билән алақиләшкинимиздә у өзиниң венгирийәдин учуп келип, корона вируси сәвәбидин һазир алмута шәһириниң бир меһманханисида “айрим тутуп туруш” бөлмидә икәнликини, бу йәрдә йәнә нәччә вақит болидиғанлиқиниң намәлум икәнликини хәвәр қилди. Биз телефон арқилиқ униң билән сөһбәтләштуқ.

Нариман қурбаноф 2-4-өктәбирдә өткән мусабиқигә 60тин ошуқ тәнһәрикәтчиниң қатнашқанлиқини билдүрүп, мундақ деди: “корона вируси вә карантин сәвәбидин биз үч ай өйдә олтурдуқ вә шу җәрянда һечбир тәйярлиқсиз қалдуқ. Омумән тәйярлиққа икки айдин аз вақит қалғаниди. Бу кәспий гимнастикичи үчүн наһайити аз қәрәл болсиму, биз өзимизни айимай, тәйярлинип, мунасип нәтиҗә көрсәттуқ. Мусабиқигә қатнишиштин илгири мән алдинқи қатарлиқлар тизимиға киргәнликимни һәм алтун медал үчүн күрәш қилиш керәкликини билгәнидим. Мән буниңға тәйяр болдум һәм өзүмниң қолидин келидиған ишни көрситәлидим. Мукапат бериш пәйтидә мән наһайити мәғрурландим. Мениң бойнумға икки мәртәм олимпик чемпийони алтун медални асқанда, чоң мәйданда бизниң туғниң көтүрүлүшини көрүп, өзүмни бәхтлик һес қилдим. Мән уйғурлиримниң бизниң ғалибийитимизгә хушал болғинидин тәсирләндим. Һәм наһайити пәхирләндим. Мән җанкөйәрләргә вә адәттики тамашибинларға шунчилик бәхт елип кәлгәнликимдин хушалмән”.

Нариман қурбаноф келәчәктики мусабиқиләрдә йәнә шундақ яхши нәтиҗиләрниң көрситиш үчүн тинмай мәшиқлинидиғанлиқини, йәниму көп алтун медалларға еришип, хәлқини, вәтинини хушал қилишқа тиришидиғанлиқини билдүрди.

Мәлум болушичә, нариман қурбаноф 1998-йили алмута шәһиридә туғулған болуп, бәш йешидин тартип гимнастика билән шуғуллинишқа башлиғаникән. Униң дадиси һүсәнҗан қурбанофму гимнастика саһәсиниң маһири болуп, оғлиниң тәнһәрикәтчи болушиға қаттиқ тәсир қилған. Нариман қурбаноф көплигән мусабиқиләргә қатнишип, кейинки йилларда юқири дәриҗилик мусабиқиләргиму арилашқан. У 2018-йили австралийәниң мелборн шәһиридә өткән гимнастика бойичә дуня мусабиқисидә алтун медалға, шу йили словенийәниң копер шәһиридә өткүзүлгән гимнастика бойичә дуня мусабиқисидә күмүш медалға, 2019-йили италийәниң неапол шәһиридә болған оқуғучилар-яшларниң тәнһәрикәт мусабиқилири бойичә 30-қетимлиқ язлиқ дуня мусабиқисидә күмүш медалға еришкән.

Биз йәнә венгирийәдә өткән дуня мусабиқисидә гимнастикиниң әркин түри бойичә күмүш медалға еришкән иляс әзизофни зиярәт қилдуқ. У мундақ деди: “мән өзүмниң нәтиҗәмгә разимән, чүнки пүткүл қабилийитимни көрситәлидим. ‛ат үстидики һәрикәт‚ бойичә орундиған мәшиқлиримдә мән йиқилип, үчлүк қатариға кирәлмидим. Мән әмди өткүзгән хаталиқлирини билимән һәм келәчәктә шулар үстидә йәнә ишләйдиған болдум. Мусабиқә алдида биз төт һәптилик тәйярлиқтин өттуқ вә бу җәһәттә көп мәшиқләндуқ. Мән гимнастикиниң ‛ат үстидики һәрикәт‚ вә әркин түри бойичә мәшиқ қилдим. Әркин түр бойичә мени мәшқавулум александир гребенкоф тәйярлиди. Бу, нәтиҗә берип, мән күмүш медалға игә болалидим. Мениң тәнһәрикәтчи болушумға болупму ата-анам көп ярдәм қилди, шуниң үчүн уларға мениң миннәтдарлиқим чәксиз. Шундақла мәшқавуллиримға рәһмәт ейтимән.”

Иляс әзизоф 1999-йили алмута шәһиридә дуняға кәлгән һәм йәттә йешидин тартип гимнастика билән шуғуллинишқа башлиған. У нурғунлиған һәр дәриҗилик мусабиқиләрдә яхши нәтиҗиләрни қолға кәлтүргән. Болупму 2019-йили словениядә өткән гимнастика бойичә дуня мусабиқисидә иккинчи орунни игилигән.

Радийомиз зияритини қобул қилған “кентавр” қабилийәтлик тәнһәрикәтчиләргә ярдәм қилиш җәмийәтлик фондиниң президенти, қазақистанда хизмәт көрсәткән мәшқавул мәхмут искәндәроф гимнастика бойичә көплигән дуня мусабиқилиридә қазақистанлиқ тәнһәрикәтчиләрниң яхши нәтиҗиләрни көрсәткәнликини, шуларниң ичидә венгирийәдә өткән мусабиқиниңму өзигә хас бир алаһидилики бар икәнликини билдүрүп, мундақ деди: “шундақ болсиму, бу муһим вә чоң хәлқара мусабиқә, дуня дәриҗилик мусабиқә. Биз һазир нөвәттики дуня мусабиқисиниң қәйәрдә болидиғанлиқини билмәймиз. Нариманниң олимпик оюнлириға йолланма елиши үчүн йәнә икки дуня мусабиқисигә қатнишип, биринчи орунни елиши лазим. Әгәр шуниңдин өтсә, у шәртлик һалда 2021-йили токйода өтидиған язлиқ олимпик мусабиқисигә қатнишалайду. Бу йили баку шәһиридә дуня мусабиқисидә нариман үчлүк қатариға өтсиму, әмма туюқсизла корона вируси сәвәбидин оюн тохтилип, улар өйгә йенип кәлди. Қатарда болидиған мусабиқиму тохтитилди. Әлвәттә, нариман қурбаноф вә иляс әзизофниң венгирийәдики утуқлири бизни қаттиқ хушал қилди. Биз уларниң келәчәктә шундақ олимпик оюнлириға қатнишишини үмид қилимиз.”

Мәлум болушичә, әйни вақитларда қазақистанда тәнһәрикәтниң һәр хил түрлири бойичә көплигән чемпийонлар йетишип чиққаникән. Һазирму асия, дуня мусабиқилиригә қатнишиватқан уйғур қиз-йигитлири бар болуп, улар һәр хил йоллар арқилиқ әнә шундақ юқири дәриҗилик мусабиқиләргә қатнишип, яхши нәтиҗиләрни көрсәтмәктикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.