Qazaqistanliq Uyghur tenheriketchiler dunya gimnastika chémpiyoni boldi

Wén'giriyening sombatxéy shehiride ötken tenheriketning gimnastika türi boyiche dunya musabiqiside kömüsh médalgha érishken qazaqistanliq Uyghur yigit ilyas ezizof. 2020-Yili öktebir.

Yéqindin buyan qazaqistan ammiwi axbarat wasitiliride Uyghur yigiti nariman qurbanofning wén'giriyening sombatxéy shehiride ötken tenheriketning gimnastika türi boyiche dunya musabiqiside altun médalgha érishkenliki heqqide xewerler élan qilinishqa bashlighanidi. Bu heqqide uchurlar ijtima'iy taratqulardimu keng tarqilip, bu weqe Uyghur jama'etchilikini qattiq xushal qilghanidi.

“Zakon qazaqistan” axbarat agéntliqida élan qilin'ghan “Qazaqistanliq gimnastikichi dunya musabiqiside ghalibiyet qazandi” namliq maqalida éytilishiche, mezkur musabiqige 14 memlikettin kelgen tenheriketchiler qatnashqaniken. Qazaqistanliq tenheriketchi nariman qurbanof “At üstidiki heriket” boyiche orundighan gimnastikiliq meshiqliri bilen altun médalgha érishken. Ikkinchi orunni xarwatiyelik robért séligman, üchinchi orunni albaniyelik matwéy pétrof igiligen.

Maqalida éytilishiche, mezkur musabiqige yene bir qazaqistanliq Uyghur yigiti ilyas ezizofmu qatnashqan bolup, u gimnastikining erkin türi boyiche kümüsh médalgha érishken.

Qazaqistandiki inawetlik metbu'atlarning biri “Qazaqistan 24” agéntliqida bérilgen “Nariman qurbanof: altun médal-bu men intilgen nerse idi” namliq maqalida nariman qurbanof “Olimpik qazaqistan” tenheriket torigha söhbet bérip, özining mezkur dunya musabiqiside alghan tesiratliri bilen bölüshken. U mundaq dégen: “Wabagha qarimay, musabiqe intayin yaxshi, yuqiri derijide uyushturulghan. Uninggha qatnishishmu intayin qaltis boldi. Shunche waqit ichide özüngning qilghan ishingni körsiteleysen. Altun médal-bu men shunche waqit intilip kelgen nerse idi, men nahayiti bextlik”.

Biz nariman qurbanof bilen alaqileshkinimizde u özining wén'giriyedin uchup kélip, korona wirusi sewebidin hazir almuta shehirining bir méhmanxanisida “Ayrim tutup turush” bölmide ikenlikini, bu yerde yene nechche waqit bolidighanliqining namelum ikenlikini xewer qildi. Biz téléfon arqiliq uning bilen söhbetleshtuq.

Nariman qurbanof 2-4-öktebirde ötken musabiqige 60tin oshuq tenheriketchining qatnashqanliqini bildürüp, mundaq dédi: “Korona wirusi we karantin sewebidin biz üch ay öyde olturduq we shu jeryanda héchbir teyyarliqsiz qalduq. Omumen teyyarliqqa ikki aydin az waqit qalghanidi. Bu kespiy gimnastikichi üchün nahayiti az qerel bolsimu, biz özimizni ayimay, teyyarlinip, munasip netije körsettuq. Musabiqige qatnishishtin ilgiri men aldinqi qatarliqlar tizimigha kirgenlikimni hem altun médal üchün küresh qilish kéreklikini bilgenidim. Men buninggha teyyar boldum hem özümning qolidin kélidighan ishni körsitelidim. Mukapat bérish peytide men nahayiti meghrurlandim. Méning boynumgha ikki mertem olimpik chémpiyoni altun médalni asqanda, chong meydanda bizning tughning kötürülüshini körüp, özümni bextlik hés qildim. Men Uyghurlirimning bizning ghalibiyitimizge xushal bolghinidin tesirlendim. Hem nahayiti pexirlendim. Men janköyerlerge we adettiki tamashibinlargha shunchilik bext élip kelgenlikimdin xushalmen”.

Nariman qurbanof kélechektiki musabiqilerde yene shundaq yaxshi netijilerning körsitish üchün tinmay meshiqlinidighanliqini, yenimu köp altun médallargha ériship, xelqini, wetinini xushal qilishqa tirishidighanliqini bildürdi.

Melum bolushiche, nariman qurbanof 1998-yili almuta shehiride tughulghan bolup, besh yéshidin tartip gimnastika bilen shughullinishqa bashlighaniken. Uning dadisi hüsenjan qurbanofmu gimnastika sahesining mahiri bolup, oghlining tenheriketchi bolushigha qattiq tesir qilghan. Nariman qurbanof köpligen musabiqilerge qatniship, kéyinki yillarda yuqiri derijilik musabiqilergimu arilashqan. U 2018-yili awstraliyening mélborn shehiride ötken gimnastika boyiche dunya musabiqiside altun médalgha, shu yili slowéniyening kopér shehiride ötküzülgen gimnastika boyiche dunya musabiqiside kümüsh médalgha, 2019-yili italiyening néapol shehiride bolghan oqughuchilar-yashlarning tenheriket musabiqiliri boyiche 30-qétimliq yazliq dunya musabiqiside kümüsh médalgha érishken.

Biz yene wén'giriyede ötken dunya musabiqiside gimnastikining erkin türi boyiche kümüsh médalgha érishken ilyas ezizofni ziyaret qilduq. U mundaq dédi: “Men özümning netijemge razimen, chünki pütkül qabiliyitimni körsitelidim. ‛at üstidiki heriket‚ boyiche orundighan meshiqlirimde men yiqilip, üchlük qatarigha kirelmidim. Men emdi ötküzgen xataliqlirini bilimen hem kélechekte shular üstide yene ishleydighan boldum. Musabiqe aldida biz töt heptilik teyyarliqtin öttuq we bu jehette köp meshiqlenduq. Men gimnastikining ‛at üstidiki heriket‚ we erkin türi boyiche meshiq qildim. Erkin tür boyiche méni meshqawulum aléksandir grébénkof teyyarlidi. Bu, netije bérip, men kümüsh médalgha ige bolalidim. Méning tenheriketchi bolushumgha bolupmu ata-anam köp yardem qildi, shuning üchün ulargha méning minnetdarliqim cheksiz. Shundaqla meshqawullirimgha rehmet éytimen.”

Ilyas ezizof 1999-yili almuta shehiride dunyagha kelgen hem yette yéshidin tartip gimnastika bilen shughullinishqa bashlighan. U nurghunlighan her derijilik musabiqilerde yaxshi netijilerni qolgha keltürgen. Bolupmu 2019-yili slowéniyade ötken gimnastika boyiche dunya musabiqiside ikkinchi orunni igiligen.

Radiyomiz ziyaritini qobul qilghan “Kéntawr” qabiliyetlik tenheriketchilerge yardem qilish jem'iyetlik fondining prézidénti, qazaqistanda xizmet körsetken meshqawul mexmut iskenderof gimnastika boyiche köpligen dunya musabiqiliride qazaqistanliq tenheriketchilerning yaxshi netijilerni körsetkenlikini, shularning ichide wén'giriyede ötken musabiqiningmu özige xas bir alahidiliki bar ikenlikini bildürüp, mundaq dédi: “Shundaq bolsimu, bu muhim we chong xelq'ara musabiqe, dunya derijilik musabiqe. Biz hazir nöwettiki dunya musabiqisining qeyerde bolidighanliqini bilmeymiz. Narimanning olimpik oyunlirigha yollanma élishi üchün yene ikki dunya musabiqisige qatniship, birinchi orunni élishi lazim. Eger shuningdin ötse, u shertlik halda 2021-yili tokyoda ötidighan yazliq olimpik musabiqisige qatnishalaydu. Bu yili baku shehiride dunya musabiqiside nariman üchlük qatarigha ötsimu, emma tuyuqsizla korona wirusi sewebidin oyun toxtilip, ular öyge yénip keldi. Qatarda bolidighan musabiqimu toxtitildi. Elwette, nariman qurbanof we ilyas ezizofning wén'giriyediki utuqliri bizni qattiq xushal qildi. Biz ularning kélechekte shundaq olimpik oyunlirigha qatnishishini ümid qilimiz.”

Melum bolushiche, eyni waqitlarda qazaqistanda tenheriketning her xil türliri boyiche köpligen chémpiyonlar yétiship chiqqaniken. Hazirmu asiya, dunya musabiqilirige qatnishiwatqan Uyghur qiz-yigitliri bar bolup, ular her xil yollar arqiliq ene shundaq yuqiri derijilik musabiqilerge qatniship, yaxshi netijilerni körsetmektiken.