Qazaqistanda qolgha élin'ghan qirghizistanliq Uyghur sen'etkar wikram rozaxunof bishkekke qaytip keldi

Ixtiyariy muxbirimiz féruze
2022.01.12
Qazaqistanda qolgha élin'ghan qirghizistanliq Uyghur sen'etkar wikram rozaxunof bishkekke qaytip keldi Qazaqistanda qolgha élin'ghan qirghizistanliq Uyghur sen'etkar wikram rozaxunof bishkekke qaytip keldi. 2022-Yili 10-yanwar.
Social Media

Qazaqistanning almuta shehiride térrorluq jinayiti bilen qolgha élin'ghan tonulghan qirghizistanliq jez muzikisi sen'etkari wikram rozaxunof qoyup bérilip qirghizistan konsulining mashinisida bishkekke élip kélin'gen.

Melum bolushiche qazaqistan jumhuriyiti 2022-yilini qattiq naraziliq herikiti bilen bashlighan. 2-Yanwar küni qazaqistanning gherbidiki jana'ozén shehiride bashlan'ghan memliket xaraktérlik naraziliq herikiti toqunushqa aylandi. Eng zorawan toqunushlar almuta shehiride yüz bergen, hetta “Kolléktip bixeterlik shertnamisi” teshkilati sheherge qoshun kirgüzdi. Qazaqistan jumhuriyitining prézidénti qasim jomart toqayéf xelqqe qilghan sözide, memliketke sirttin kelgen térrorchilar hujum qilghanliqini éytti.

9-Yanwar küni qazaqistandiki “Xabar 24” téléwiziye qanili bir qirghizistanliq yigitning naraziliq herikitige qatnishish üchün pul alghanliqini iqrar qilghan bir sin tarqatti. Mezkur sin ijtima'iy taratqularda, bolupmu sen'etkarlar arisida ghezeplinish dolqunini qozghidi. Sewebi sindiki yigit tonulghan sen'etkar wikram rozaxunof idi. Shu künila chüshtin kéyin qirghizistanda turushluq qazaqistan jumhuriyitining elchixanisining aldida sen'etkarlar “Wikramgha erkinlik”, “Siyasiy suyiqestlerge yol yoq” qatarliq sho'arlarni towlap naraziliq namayishi uyushturushni. Namayishqa 40 tin oshuq tonulghan sen'etkar qatnashti. Ataqliq naxshichi iriskeldi osmonqulof éltr téléwiziye qanilining ziyaritini qobul qilghanda wikramni térrorluq bilen eyiblesh pütünley bimene dep tekitligen. U mundaq dégen: “Wikram rozaxunofning pul élip naraziliq heriketlerge qatnashqanliqigha biz qet'iy ishenmeymiz. Bu pütünley bimene. Wikram rozaxunof bizning sen'etkarimiz, u nahayiti yaxshi adem”.

Mezkur namayishqa qatnashqan tonulghan naxshichi irina ruskaya ashu téléwiziye qanilining ziyaritini qobul qilghanda wikramni derhal qoyup bérishni telep qilghanliqini bildürdi. U mundaq dégen: “Sindiki yigit wikram ikenlikini biz hemmimiz birdinla jezmleshtürimiz. U dangliq we muweppeqiyet qazan'ghan pi'ano chalghuchisi, biz hemmimiz uning bilen ishligen. Biz özimizning qattiq naraziliqimizni bildürimiz hem özimizning prézidéntimizgha hem qazaqistan hökümitige muraji'et qilimiz, wikramni derhal qoyup bersun. Wikramning nahayiti éghir yarilan'ghanliqini sindin körüwatimiz, shuning üchün biz uning derhal qoyup bérilishini telep qilimiz”.

Dölet bixeterlik komitétining bashliqi qamchibék tashiyéf dölet téléwiziye qanalliri muxbirlirining so'allirigha jawab bergende “Wikram rozaxunof térrorist bolushi mumkin emes” dep tekitligen.

Axiri qazaqistan hökümiti wikramni qoyup bérishke mejbur boldi. 10-Yanwar küni kechte wikram rozaxunof “Aq jol” chégra ponkitidin ötüp bishkekke élip kélindi. Igilinishiche u qirghizistanning almutada turushluq konsulxanisining mashinisida élip kélindi. Wikram rozaxunof ghezep qozghighan sinda saqta bayanat bergenliki toghrisida chüshenche bérip qirghizistan hökümitige öz minnetdarliqini bildürdi.

Gerche wikram rozaxunof öyige baldurraq qaytish üchün sindiki saxta bayanatini öz ixtiyari bilen bergenlikini tekitlep ötsimu, ijtima'iy taratqularda uning saxta iqrari qazaqistan herbiy xadimliri we saqchilirining zorawanliq heriketliri bilen qildurulghanliqi aktip muzakire qilinmaqta.

Qirghizistan we orta asiyada dangliq naxshichi shöhret yaqubof, radiyo ziyaritimizni qobul qilip eng muhimi wikramning öyge qaytip kélishi dep tekitlep, shundaqla bu weqe qirghizistan we qazaqistan xelqlirining dostluqigha tesir körsitelmeydighanliqigha ümid bilen qaraydighanliqini éytti.

Wikram rozaxunof 1986-yili bishkek shehiride bir Uyghur a'iliside dunyagha kélgen. Anisi köp yil jiddiy qutquzush mashinisida doxtur bolup xizmet körsetken, akisi jiddiy qutquzush bölümining bashchisi. Wikram kichikidinla naxsha-sazgha alahide hérsmen bolup, kéyin bishkektiki muratali kurénkéyéf namidiki muzika mektipini tamamlighan. Bügünki künlerde wikram qirghizistandiki eng yuqiri derijidiki sen'etkerlar bilen birlikte sehnide oyun qoyidu. U peqet qirghizistandila emes, belki ottura asiya, jümlidin qazaqistandiki sen'etkarlar arisidimu dang chiqarghan. U dangliq jez muzikanti bolush süpiti bilen köpligen xelq'ara musabiqilargha qatnashqan. “Séntral asi'a art menejmént” fondining ezasi, “Artték médi'a grup” uyushmisining wekili, shundaqla xelq'ara “Jez bishkek spring” féstiwalining wekilidur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.