Муһаҗирәттики уйғурларниң "вирус кризиси ярдәм мәркизи" қурулди

Ихтиярий мухбиримиз әкрәм
2020-03-31
Share
virus-merkizi-Murajetname.jpg Д у қ ниң тәшәббуси билән қурулған "вирус кризиси ярдәм мәркизи" ниң һазирлиған мураҗиәтнамиси.
RFA/Ekrem

Муһаҗирәттики уйғур тәшкилатлириниң һәмкарлиқида "вирус кризиси ярдәм мәркизи" рәсмий қурулди.

Дуня уйғур қурултийиниң тәшәббуси билән көплигән дөләтләрдә паалийәт елип бериватқан уйғур тәшкилатлириниң өз-ара һәмкарлишиши нәтиҗисидә 31-март күни "вирус кризиси ярдәм мәркизи" рәсмий қурулған.

Бу мәркәз түркийә, австралийә, америка, канада, японийә, әнглийә, австрийә, финландийә, фирансийә, шиветсийә, голландийә, белгийә, шиветсарийә, германийә, қазақистан, қирғизистан қатарлиқ дөләтләрдә вәкил тәйинлигән болуп, корона вируси мәзгилидә қийинчилиқта қалған муһаҗирәттики уйғурларға ярдәм қилидикән.

"вирус кризиси ярдәм мәркизи" ниң бүгүн һазирлиған мураҗиәтнамисидә мундақ пикирләргә орун берилгән: "хитай вируси пүтүн дуняға тарқилип инсанийәт дунясида қаттиқ вәһимә пәйда қилди. Дуня дөләтлири өз хәлқини вирустин қоғдаш вә зиянға учриғучиларға ярдәм қилиш үчүн алаһидә мәбләғ аҗритип хәлқиниң дәрдигә дәрман болмақта. Бу вирус вәтинимиз шәрқий түркистанда, җүмлидин җаза лагерлирида азаб чекиватқан қериндашлиримиз үчүн һаятий тәһдит шәкилләндүрүпла қалмастин, чәтәлләрдә яшаватқан пүткүл шәрқий түркистанлиқ қериндашлиримизғиму җиддий тәһдит шәкилләндүрмәктә, болупму оттура асия җумһурийәтлиридин қалсила уйғурлар әң көп яшаватқан түркийәдә қериндашлиримизниң вәзийити һәммимизни күчлүк қайғуға салмақта. Чүнки қолида паспорти йоқ, олтуруш рухсити йоқ, өй кирасини, ток вә су пулини төлийәлмигән давалиниш имканийити болмиған, нормал турмушини қамдаштинму мәһрум қелип өйлиригә қапсилип қалған көплигән қериндашлиримиз чарисизлиқ ичидә теңирқимақта вә турмуш сәвийиси бирқәдәр яхши болған әлләрдә яшаватқан уйғур қериндашлиридин ярдәм күтмәктә. Гәрчә бизниң дөлитимиз хитай ишғалийитидә болғачқа алаһидә мәбләғ аҗритип хәлқимизгә ярдәм қилидиған һөкүмитимиз болмисиму, дуняниң һәрқайси җайлирида паалийәт елип бериватқан тәшкилатлиримиз, җәмийәтләр, вәхпилиримиз бар."

Д у қ рәиси долқун әйса әпәнди бу һәқтә тохталғанда алди билән корана вируси сәвәблик муһаҗирәттики бир қисим уйғурларниң, болупму түркийәдики уйғурларниң еғир вәзийәттә қалғанлиқини әскәртип өтти. У сөзидә "вирус кризиси ярдәм мәркизи" ниң мүшкилат ичидә қалған мушу уйғурларниң дәрдигә дәрман болуш мәқситидә қурулғанлиқини тилға алди.

"вирус кризиси ярдәм мәркизи" ниң мәсули турғунҗан алавудун әпәндиму бу һәқтә бизни бәзи мәлуматлар билән тәминлиди. У сөзидә дуняниң һәрқайси җайлиридики уйғурлар арисида ярдәм сәпәрвәрлики қозғап корана вирусиниң зиянкәшликлиригә учраватқан уйғур муһаҗирлирини қутқузуш үчүн қолидин келишичә теришчанлиқ көрситидиғанлиқини тәкитлиди.

"вирус кризиси ярдәм мәркизи" 17 дөләттә вәкаләтчи бәлгилигән. Мәркәзниң норвегийәдики вакаләтчиси болған бәхтияр өмәр әпәндиму бу һәқтә өз қарашлирини оттуриға қоюп өтти.

Мәлум болғинидәк, 3-айниң 26-күни муһаҗирәттики 30 дин артуқ уйғур тәшкилатлири телефон йиғиниға қатнишип "вирус кризиси ярдәм мәркизи" қуруш тоғрисида бирдәк қарар қобул қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт