Muhajirettiki Uyghurlarning "Wirus krizisi yardem merkizi" quruldi

Ixtiyariy muxbirimiz ekrem
2020-03-31
Share
virus-merkizi-Murajetname.jpg D u q ning teshebbusi bilen qurulghan "Wirus krizisi yardem merkizi" ning hazirlighan muraji'etnamisi.
RFA/Ekrem

Muhajirettiki Uyghur teshkilatlirining hemkarliqida "Wirus krizisi yardem merkizi" resmiy quruldi.

Dunya Uyghur qurultiyining teshebbusi bilen köpligen döletlerde pa'aliyet élip bériwatqan Uyghur teshkilatlirining öz-ara hemkarlishishi netijiside 31-mart küni "Wirus krizisi yardem merkizi" resmiy qurulghan.

Bu merkez türkiye, awstraliye, amérika, kanada, yaponiye, en'gliye, awstriye, finlandiye, firansiye, shiwétsiye, gollandiye, bélgiye, shiwétsariye, gérmaniye, qazaqistan, qirghizistan qatarliq döletlerde wekil teyinligen bolup, korona wirusi mezgilide qiyinchiliqta qalghan muhajirettiki Uyghurlargha yardem qilidiken.

"Wirus krizisi yardem merkizi" ning bügün hazirlighan muraji'etnamiside mundaq pikirlerge orun bérilgen: "Xitay wirusi pütün dunyagha tarqilip insaniyet dunyasida qattiq wehime peyda qildi. Dunya döletliri öz xelqini wirustin qoghdash we ziyan'gha uchrighuchilargha yardem qilish üchün alahide meblegh ajritip xelqining derdige derman bolmaqta. Bu wirus wetinimiz sherqiy türkistanda, jümlidin jaza lagérlirida azab chékiwatqan qérindashlirimiz üchün hayatiy tehdit shekillendürüpla qalmastin, chet'ellerde yashawatqan pütkül sherqiy türkistanliq qérindashlirimizghimu jiddiy tehdit shekillendürmekte, bolupmu ottura asiya jumhuriyetliridin qalsila Uyghurlar eng köp yashawatqan türkiyede qérindashlirimizning weziyiti hemmimizni küchlük qayghugha salmaqta. Chünki qolida pasporti yoq, olturush ruxsiti yoq, öy kirasini, tok we su pulini töliyelmigen dawalinish imkaniyiti bolmighan, normal turmushini qamdashtinmu mehrum qélip öylirige qapsilip qalghan köpligen qérindashlirimiz charisizliq ichide téngirqimaqta we turmush sewiyisi birqeder yaxshi bolghan ellerde yashawatqan Uyghur qérindashliridin yardem kütmekte. Gerche bizning dölitimiz xitay ishghaliyitide bolghachqa alahide meblegh ajritip xelqimizge yardem qilidighan hökümitimiz bolmisimu, dunyaning herqaysi jaylirida pa'aliyet élip bériwatqan teshkilatlirimiz, jem'iyetler, wexpilirimiz bar."

D u q re'isi dolqun eysa ependi bu heqte toxtalghanda aldi bilen korana wirusi seweblik muhajirettiki bir qisim Uyghurlarning, bolupmu türkiyediki Uyghurlarning éghir weziyette qalghanliqini eskertip ötti. U sözide "Wirus krizisi yardem merkizi" ning müshkilat ichide qalghan mushu Uyghurlarning derdige derman bolush meqsitide qurulghanliqini tilgha aldi.

"Wirus krizisi yardem merkizi" ning mes'uli turghunjan alawudun ependimu bu heqte bizni bezi melumatlar bilen teminlidi. U sözide dunyaning herqaysi jayliridiki Uyghurlar arisida yardem seperwerliki qozghap korana wirusining ziyankeshliklirige uchrawatqan Uyghur muhajirlirini qutquzush üchün qolidin kélishiche térishchanliq körsitidighanliqini tekitlidi.

"Wirus krizisi yardem merkizi" 17 dölette wekaletchi belgiligen. Merkezning norwégiyediki wakaletchisi bolghan bextiyar ömer ependimu bu heqte öz qarashlirini otturigha qoyup ötti.

Melum bolghinidek, 3-ayning 26-küni muhajirettiki 30 din artuq Uyghur teshkilatliri téléfon yighinigha qatniship "Wirus krizisi yardem merkizi" qurush toghrisida birdek qarar qobul qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet