Amérikada wolkswagén shirkitige qarshi namayishlar ötküzüldi

Muxbirimiz jewlan
2021-06-14
Share
Amérikada wolkswagén shirkitige qarshi namayishlar ötküzüldi Amérika Uyghur birleshmisi we Uyghur kishilik hoquq qurulushining teshkillishi bilen Uyghur jama'iti wirjinye shtatidiki wolkswagén tijaret ornining aldida ötküzgen namayishidin körünüshler. 2021-Yili 13-iyun.
Photo: RFA

Ötken esirde yehudiy chong qirghinchiliqi yüz bergen yillarda natsistlar gérmaniyesining hamyiliqigha érishken dangliq mashinisazliq shirkiti wolkswagén gérmaniyening xitaygha meblegh salghan eng chong shirketlridin biridur. Wolkswagén shirkiti ürümchide zawut qurup, xitayning bu rayondiki qul emgikidin paydiliniwatqanliqi köp qétim xewer qilin'ghanidi. Walkéswagén shirkitining mes'ulliri buni inkar qilip kéliwatqan bolsimu, emma zomiger xitayning menpe'eti we irqiy qirghinchiliq jinayitige shérik boluwatqanliqi emeliyet idi, yene kélip, ular zawutning ichidiki heqiqiy ehwalni sir tutup kelmekte idi.

Wolkswagén shirkitining tarixtiki xataliqini tekrarlap, mustebit xitayning irqiy qirghinchiliqigha süküt qiliwatqanliqi, belki uninggha shérik boluwatqanliqi amérikadiki Uyghurlarningmu naraziliqini qozghighan. Alime maysem mutellipowa xanimning bu yil 3-aydin bashlap her shenbe küni amérikaning boston shehiridiki wolkaswagén sétish ornining aldida namayish qiliwatqanliqi we buning belgilik ünümi körülüwatqanliqi radiyomiz teripidin xewer qilin'ghanidi.

6-Ayning 12- we 13-künliri amérika Uyghur birleshmisi we Uyghur kishilik hoquq qurulushining teshkillishi bilen Uyghur jama'iti wirjinye shitatidiki wolkswagén tijaret ornining aldida namayish ötküzüp, bu shirketning ürümchidiki zawutining Uyghur rayonidiki mejburiy emgektin paydiliniwatqanliqi we xitayning irqiy qirghinchiliq jinayitige shérik boluwatqanliqigha naraziliq bildürgen.

Amérika Uyghur birleshmisining hey'et ezasi elfidar iltebir xanim ziyaritimizni qobul qilip, bu qétimqi namayishning nechche aydin béri boston we washin'gton etrapidiki wolkéswagén tijaret orunlirining aldida élip bériliwatqan namayishning dawami, shundaqla barliq guruppilarning birlikte ötküzgen bir qétimliq ehmiyetlik namayishi ikenlikini bildürdi.

Elfidar iltebirning éytishiche, bu namayish élan-teshwiqat bilen birlikte nahayiti tinch shekilde élip bérilghan, yoldin ötkenler bu pa'aliyetni qollaydighanliqini bildürgen. Namayishchilar yene wolkswagén shirkitige xitay bilen hemkarlashqan her qandaq shirketning irqiy qirghinchiliq jinayitige shérik bolidighanliqini, shunga bu shirketning xitaydiki zawutlirini taqishi kéreklikini telep qilghan. Elfidar iltebir bu pa'aliyetning ehmiyiti heqqide toxtilip mundaq dédi: "Mushundaq namayishlar arqiliq wetinimizde boluwatqan qirghinchiliqni we mejburiy emgekke séliniwatqan xelqimizning awazini hemme döletlerge anglitalaymiz, hem bashqa shirketlergimu bu bir ders bolidu".

Yehudiylarning "Dunyagha nezer" teshkilatidiki kishilik hoquq pa'aliyetchilirimu 13-iyun los-anzhélistiki wolkswagén sétish ornining aldida namayish ötküzgen. Rabi yunah özining tiwittér hésabida bu namayishta qilghan sözini hembehirligen. U mundaq dégen: "Siler némishqa irqiy qirghinchiliqqa yardem qilisiler? bügün siler irqiy qirghinchiliqqa yardem bérip uning dawamlishishigha türtke boluwatisiler. Biz her bireylenni bu ishqa diqqet qilishqa chaqirimiz. Chünki walkswagén özining mashinilirini satalmisa, ularning Uyghurlarni éziwatqan xitaydin alidighan menpe'etimu toxtaydu. Irqiy qirghinchiliq qayta yüz bermisun!".

Igilishimizche, wolkswagén shirkitige bolghan naraziliq barghanséri küchiyiwatqan bolup, dunya Uyghur qurultiyi, en'giliyediki irqiy qirghinchiliqqa qarshi teshkilatlar we yehudiy kishilik hoquq teshkilatliri dunyaning her qaysi jaylirida teng namayish élip bérishqa seperwer qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet