Сабиқ оқуғучилар һәрикити рәһбәрлиридин бири варис абабәкриниң лагердин чиқип өлгәнлики дәлилләнди

• Мухбиримиз шөһрәт һошур
  2019-12-02

1988-Йилдики оқуғучилар намайишиниң йетәкчилиридин бири варис абабәкриниң ноябирниң бешида лагердин чиққанлиқи вә узун өтмәй дохтурханида җан үзгәнлики җәмийәт хәвәрлири арқилиқ ашкариланғаниди. Мухбиримизниң үрүмчидики алақидар сиясий қанун органлириға қарита елип барған телефон зиярәтлири давамида, униң лагердин чиқип җан үзгәнлики вә мейит намизиниң ноғай мәсчиттә чүшүрүлгәнлики дәлилләнди.

Үрүмчи вәзийитидин хәвәрдар кишиләрниң радийомизға баян қилишичә, лагердин чиқип узун өтмәй һаятидин айрилған сабиқ паалийәтчи варис абабәкриниң тутулуш сәвәбини тәхмин қилиш қейин әмәс; мәсилән униң шинҗаң университетидин һәйдилишигә сәвәб болған оқуғучилар һәрикитигә йетәкчилик қилишидин тартип, ишлигән филимлиридики назук темиларғичә вә һәтта униң кейинки йилларда чәтәлгә чиқишқа урунушлириғичә көплигән иш һәрикити йеқинқи 3 йилдики сиясий қуюнда униң бешиға қара халта кийдүрүлүшигә йетәрлик баһанидур ; бу йәрдә пәқәт сирлиқ болуватқини униң өлүм сәвәби болуп, даириләр варис өлгәндин кейин, униң аилисиниң туралғусини назарәт астиға алған; аилә әзалири варисниң өлүми һәққидә артуқчә гәп қилмаслиқ һәққидә агаһландурулған.

Мәлум болушичә, 1988-йили шинҗаң университетидин һәйдәлгәндин кейин тиҗарәт, әдәбият-сәнәт вә ахбарат қатарлиқ һәр саһәдә мустәқил иш қилип кәлгән варис абабәкри көпинчә һалларда дөңкөврүк әтрапида истиқамәт қилған вә хизмәт қилған; шуңа биз алди билән дөңкөврүк әтрапидики сақчиханиларға телефон қилип униң өлүм сәвәби һәққидә мәлумат соридуқ. Хадимлардин бири варис абабәкрини тонумайдиғанлиқи, униң өлүмидинму хәвири йоқлуқини баян қилиш билән бирликтә; өзиниң үрүмчидики аталмиш тәрбийәләш мәркәзлиридин хәвири йоқлуқиниму әскәртиш арқилиқ өзиниң соаллиримизға тоғра вә раст җаваб бериш нийити йоқлуқини намаян қилди. У ахирида варисниң өлүм сәвәби һәққидики соаллиримизға йүзму-йүз көрүшкән әһвалда җаваб берәләйдиғанлиқини баян қилиш арқилиқ, варисниң өлүминиң изаһат беришкә тегишлик сәвәблири барлиқини ишарәтлиди.

Вәзийәттин хәвәрдар кишиләр, варис абабәкриниң мейит намизиниң ноғай мәсчитидә чүшүрүлгәнликини мәлум қилған. Ениқлашлиримиз давамида ноғай мәсчитниң алақә номурлириға еришәлмидуқ. Әмма үрүмчидә сиясий қанун саһәсидә хизмәт қиливатқан вә мәсчит башқурушқа мәсул болған бир хадимниң ашкарилишичә, варис абабәкри лагердин чиқип узун өтмәй кесәл сәвәби билән һаятидин айрилған.

Вәзийәттин хәвәрдар кишиләр, варис абабәкриниң саламәтликидә, бу йил 1-айда лагерға соланғанға қәдәр һечқандақ мәсилә йоқлуқини илгири сүргән. Илгирики ениқлашлиримиздин дәлиллинишичә, һазирға қәдәр лагерда җан үзгәнләрниң көпинчиси қейин-қистақтин зәхимләнгән, яки мәвҗут кесәллирини давалашқа имкансиз қалған вә яки лагерниң маддий һәм мәниви шараитлириниң начарлиқиниң зәрбисидә кесәл болған вәяки кесили сақаймайдиған басқучқа кәлгәндила, аилисигә тапшурулған. юқириқи сиясий-қанун хадими варис абабәкриниң қейин-қистақтин өлгәнликини рәт қилди; әмма варисниң кесәл сәвәбидин өлгәнликини илгири сүргән болсиму, өлүштин аввал бир мәзгил лагерда ятқанлиқини дәлиллиди. Илгирики ениқлашлиримиз давамида лагердикиләрниң күнигә 10 нәччә саәт үзлүксиз дәрс аңлайдиғанлиқи, ятақлирида ихтияри паалийәткә йол қоюлмайдиғанлиқи, һәтта ятақдашлири билән өзара сөзлишишкиму рухсәт йоқлуқи ашкариланғаниди. Әгәр мәзкур хадимниң баянлири раст дәп қаралса, варисниң қандақ бир кесәл билән өлгәнлики, йәни лагердики қандақ бир шараитниң униңда қандақ бир кесәлни пәйда қилғанлиқи һазирчә мәлум әмәс. Мәзкур хадимниң баян қилишичә, варисниң мейит намизи үрүмчидики ноғай мәсчиттә чүшүрүлгән.