Sabiq oqughuchilar herikiti rehberliridin biri waris ababekrining lagérdin chiqip ölgenliki delillendi

• Muxbirimiz shöhret hoshur
  2019-12-02

1988-Yildiki oqughuchilar namayishining yétekchiliridin biri waris ababekrining noyabirning béshida lagérdin chiqqanliqi we uzun ötmey doxturxanida jan üzgenliki jem'iyet xewerliri arqiliq ashkarilan'ghanidi. Muxbirimizning ürümchidiki alaqidar siyasiy qanun organlirigha qarita élip barghan téléfon ziyaretliri dawamida, uning lagérdin chiqip jan üzgenliki we méyit namizining noghay meschitte chüshürülgenliki delillendi.

Ürümchi weziyitidin xewerdar kishilerning radiyomizgha bayan qilishiche, lagérdin chiqip uzun ötmey hayatidin ayrilghan sabiq pa'aliyetchi waris ababekrining tutulush sewebini texmin qilish qéyin emes؛ mesilen uning shinjang uniwérsitétidin heydilishige seweb bolghan oqughuchilar herikitige yétekchilik qilishidin tartip, ishligen filimliridiki nazuk témilarghiche we hetta uning kéyinki yillarda chet'elge chiqishqa urunushlirighiche köpligen ish herikiti yéqinqi 3 yildiki siyasiy quyunda uning béshigha qara xalta kiydürülüshige yéterlik bahanidur ؛ bu yerde peqet sirliq boluwatqini uning ölüm sewebi bolup, da'iriler waris ölgendin kéyin, uning a'ilisining turalghusini nazaret astigha alghan؛ a'ile ezaliri warisning ölümi heqqide artuqche gep qilmasliq heqqide agahlandurulghan.

Melum bolushiche, 1988-yili shinjang uniwérsitétidin heydelgendin kéyin tijaret, edebiyat-sen'et we axbarat qatarliq her sahede musteqil ish qilip kelgen waris ababekri köpinche hallarda döngköwrük etrapida istiqamet qilghan we xizmet qilghan؛ shunga biz aldi bilen döngköwrük etrapidiki saqchixanilargha téléfon qilip uning ölüm sewebi heqqide melumat soriduq. Xadimlardin biri waris ababekrini tonumaydighanliqi, uning ölümidinmu xewiri yoqluqini bayan qilish bilen birlikte؛ özining ürümchidiki atalmish terbiyelesh merkezliridin xewiri yoqluqinimu eskertish arqiliq özining so'allirimizgha toghra we rast jawab bérish niyiti yoqluqini namayan qildi. U axirida warisning ölüm sewebi heqqidiki so'allirimizgha yüzmu-yüz körüshken ehwalda jawab béreleydighanliqini bayan qilish arqiliq, warisning ölümining izahat bérishke tégishlik sewebliri barliqini isharetlidi.

Weziyettin xewerdar kishiler, waris ababekrining méyit namizining noghay meschitide chüshürülgenlikini melum qilghan. Éniqlashlirimiz dawamida noghay meschitning alaqe nomurlirigha érishelmiduq. Emma ürümchide siyasiy qanun saheside xizmet qiliwatqan we meschit bashqurushqa mes'ul bolghan bir xadimning ashkarilishiche, waris ababekri lagérdin chiqip uzun ötmey késel sewebi bilen hayatidin ayrilghan.

Weziyettin xewerdar kishiler, waris ababekrining salametlikide, bu yil 1-ayda lagérgha solan'ghan'gha qeder héchqandaq mesile yoqluqini ilgiri sürgen. Ilgiriki éniqlashlirimizdin delillinishiche, hazirgha qeder lagérda jan üzgenlerning köpinchisi qéyin-qistaqtin zeximlen'gen, yaki mewjut késellirini dawalashqa imkansiz qalghan we yaki lagérning maddiy hem meniwi shara'itlirining nacharliqining zerbiside késel bolghan weyaki késili saqaymaydighan basquchqa kelgendila, a'ilisige tapshurulghan. Yuqiriqi siyasiy-qanun xadimi waris ababekrining qéyin-qistaqtin ölgenlikini ret qildi؛ emma warisning késel sewebidin ölgenlikini ilgiri sürgen bolsimu, ölüshtin awwal bir mezgil lagérda yatqanliqini delillidi. Ilgiriki éniqlashlirimiz dawamida lagérdikilerning künige 10 nechche sa'et üzlüksiz ders anglaydighanliqi, yataqlirida ixtiyari pa'aliyetke yol qoyulmaydighanliqi, hetta yataqdashliri bilen öz'ara sözlishishkimu ruxset yoqluqi ashkarilan'ghanidi. Eger mezkur xadimning bayanliri rast dep qaralsa, warisning qandaq bir késel bilen ölgenliki, yeni lagérdiki qandaq bir shara'itning uningda qandaq bir késelni peyda qilghanliqi hazirche melum emes. Mezkur xadimning bayan qilishiche, warisning méyit namizi ürümchidiki noghay meschitte chüshürülgen.