Uyghurlar myunxénda weten qurbanlirini xatirilidi

Ixtiyariy muxbirimiz ekrem
2020-01-27
Élxet
Pikir
Share
Print

25-Yanwar küni gérmaniyede yashaydighan we bashqa bir qisim memliketlerdin kelgen Uyghurlar myunxén'gha jem bolup, d u q re'isi dolqun eysa ependining dadisi merhum eysa memet we amérikida yashap wapat bolghan 1944-1946-yilliri sherqiy türkistan inqilabigha qatnashqan merhum edhemjan zakirxan qatarliqlar we Uyghur diyarida hayatidin ayrilghan weten qurbanlirini xatirilep, xetme-qur'an qildi.

25-Yanwar küni gérmaniyening myunxén shehiride d u q re'isi dolqun eysa ependining dadisi merhum eysa memet, amérikida 24-yanwar qaza qilghan merhum edhemjan zakir shundaqla Uyghur diyarida qaza qilghan barliq shéhitlarning rohigha atap qur'an tilawet we nezir pa'aliyiti ötküzüldi.

Pa'aliyetke amérika, kanada, bélgiye, gollandiye we gérmaniyening herqaysi sheherliridin kelgen 200 ge yéqin kishi qatnashti. Pa'aliyet qur'an tilawet bilen bashlandi.

D u q ning qurghuchisi hem sabiq re'isi, Uyghur siyasiy zatliridin erkin aliptékin ependi tunji bolup nutuq sözlep, özining qayghusi we merhumlarning a'ile-tawabi'atlirigha bolghan tesellilirini ipade qildi. Uningdin kéyin söz qilghan ilham toxti guruppisining re'isi enwerjan ependimu köngül sözlirini izhar qildi.

Alayiten amérikadin kélip bu sorun'gha daxil bolghan d u q ning bash teptishi abdulhekim idris ependimu söz qilip, 24-yanwar amérikida qaza qilghan, 1944-yilidiki sherqiy türkistan jumhuriyitining jengchisi bolghan merhum edhemjan aka toghrisida qisqiche toxtilip ötti we dolqun eysaning dadisi eysa memetning ölümi heqqidiki qarashlirini bayan qildi.

Herqaysi döletlerdin Uyghur jama'itige wekil bolup kelgen teshkilat rehberlirining bayanliridin kéyin d u q ning re'isi dolqun eysa ependi söz élip, xitay hakimiyitining sherqiy türkistanda élip bériwatqan qirghinchiliq siyasetlirini eyiblidi. U sözide xitayning muhajirettiki Uyghurlarning a'ile-tawabi'atlirigha qest qilip musibetlerni köpeytish arqiliq özlirining iradilirini sundurush, milliy dewadin waz kechtürüsh meqsitige yételmeydighanliqini ilgiri sürdi.

Nezir pa'aliyiti qisqiche tilawet we xeyrlik du'alar bilen axirlashti. D u q ning mu'awin re'isi perhat muhemmidi ependi bu heqte toxtalghanda, buning yalghuz merhum eysa memet we edhemjan akilarghila emes, belki sherqiy türkistanda qaza qilghan barliq shéhitlarning rohigha atalghan bir nezir pa'aliyiti bolghanliqini eskertti.

Toluq bet