Даңлиқ нахшичи халуқ ләвәнт: «шәрқий түркистанлиқ қериндашлиримға бундин кейинму ярдәм беримән!»

Ихтиярий мухбиримиз әркин тарим
2020-05-15
Елхәт
Пикир
Share
Принт
Түркийәдә тонулған нахшичи халуқ ләвәнт әпәнди.
Түркийәдә тонулған нахшичи халуқ ләвәнт әпәнди.
Social Media

Түркийәдә тонулған нахшичи халуқ ләвәнт әпәндигә түркийәдики хитайпәрәс бәзи кишиләр твиттер арқилиқ өзигә һуҗум қилип: «шәрқий түркистан дәп бир йәр йоқ, шинҗаң бар» дәп инкас язған. Халуқ ләвәнт әпәнди бу твиттер учуриға: «бәзи кишиләр мени хитайға берип, у йәрдә зулумниң бар-йоқлуқини нәқ җайида көрүп кәл, дәпту. Болиду, мән барай, лекин хитай һөкүмити 25 аилә уйғурни түркийәгә елип келишимгә рухсәт қилса, мән чоқум баримән!» дәп җаваб язған.

Халуқ ләвәнт әпәнди түркийәдә вә дуняниң һәр қайси җайлиридики йоқсул кишиләргә ярдәм қилиш мәқсити билән «аһбаб», йәни «дост» намида җәмийәт қуруп, түркийәниң 81 вилайитиниң көпидә шөбилирини ечип, намрат аиләләргә ярдәм қилип кәлгән. У 2 йилдин буян түркийәгә йеңи көчүп кәлгән шундақла маддий җәһәттин қийинчилиққа учраватқан уйғур аилиләргиму ярдәм қилған. У 9-май күни бу һәқтә твиттерға: «шәрқий түркистандин кәлгән қериндашлиримизға ярдәм қолимизни сунуватимиз,» дегән учурни йезип тарқатқандин кейин, хитайпәрәсләрниң һуҗумға учриған. У әң ахирида «шәрқий түркистанлиқ қериндашлиримға ярдәм беришни давамлаштуримиз, арқимизға чекинмәймиз,» дегән сөзләрни йезип тарқатқан.

Даңлиқ нахшичи халуқ ләвәнт әпәндиниң бу твиттер учурлириға түркийәдики иҗтимаий таратқулар, тор гезитлириму орун бәргән. Биз бу һәқтә техиму тәпсилий мәлумат игиләш үчүн халуқ ләвәнт әпәндигә телефон қилғинимизда униң катипи мүгә ханим телефонимизни елип, мундақ деди: «мән тәлипиңларни халуқ ләвәнт әпәндигә йәткүзүп қояй. Телефон номириңизниму берип қояй, әгәр у вақит чиқиралиса сизгә телефон қилсун, боламду?» деди.

Нахшичи халуқ ләвәнт әпәндиниң икки йилдин буян уйғур мәсилисини, болупму уйғур дияридики җаза лагерлири мәсилисини оттуриға қоюп келишиниң сәвәби зади немә, бу неминиң бешарити? әнқәрәдики һаҗәттәпә университетиниң тарих оқутқучиси, уйғур тәтқиқати институтиниң мудири доктор әркин әкрәм әпәнди нахшичи халуқ ләвәнт әпәнди адаләт туйғусиға игә киши болғачқа уйғурларниң дәрдини оттуриға қоюп, ярдәмгә моһтаҗ уйғурларға хәйрхаһлиқ қиливатқанлиқини баян қилди.

Доктор әркин әкрәм әпәнди халуқ ләвәнт әпәндидәк җәмийәттә тонулған шәхсләрниң уйғур мәсилисини көтүрүп чиқишиниң бу мәсилини күнтәртипкә елип келиштә шундақла түркийәдики сиясәтчиләргә тәсир көрситиштә пайдилиқ болидиғанлиқини билдүрди.

Уйғур дияридики лагерлар мәсилиси вә милйонлиған кишиләрниң лагерларға қамилиши түркийәдики тонулған кишиләрниң диққитини тартип кәлмәктә. Һазирғичә түркийәдә тонулған 3 нәпәр сәнәтчи вә 1 путболчи уйғур мәсилисигә қарита иҗтимаий таратқуларда пикир баян қилип, авамниң диққитини қозғиди. Буларниң ичидин тонулған нахшичи халуқ ләвәнт әпәнди изчил һалда уйғурлар мәсилисини оттуриға қоюп кәлмәктә.

Уйғур академийәси хитай тәтқиқат институтиниң мудири фәрһат қурбан тәңритағли әпәнди җәмийәттики тонулған шәхсләрниң уйғур мәсилисигә арилишишиниң үнүми зор болидиғанлиқини, уйғурларниң өз мәсилилирини бундақ кишиләргә аңлитиш үчүн тиришиши керәкликини тәкитлиди.

Бундин 25 йил бурун түркийәниң тонулған нахшичиси бариш манчо әпәндиму уйғурлар мәсилисини оттуриға қойған иди. У 1999-йили кесәл сәвәби билән вапат болғандин кейин түркийәдики тонулған сәнәткарлар ичидә узун йилларғичә уйғур мәсилисини оттуриға қойғанлар болмиған иди. Шәрқий түркистан вәқпиниң сабиқ баш катипи һамидхан гөктүрк әпәнди мәшһур нахшичи халуқ ләвәнтниң уйғур мәсилисини оттуриға қоюшиниң авам арисида зор үнүми болидиғанлиқини тәкитләп өтти.

Халуқ ләвәнт әпәнди өткән йили хоңкоңлуқлар уйғурларни қоллап намайиш қилғандин кейин твиттеридә: «хоңкоңлуқлар у йәрдә намайиш қиливатқанда мән бу йәрдә ‹шәрқий түркистандин кәлгән син көрүнүшлири у йәрдә зулумниң барлиқини көрситип бериду, ' дәп язған идим. Бу твиттемгә адәмниң көңлини йерим қилидиған инкаслар кәлди. Бәзиләр ‹түркийә билән хитай оттурисидики мунасивәтни бузуватисән, ' деди. Бу язғанлирим қандақму икки дөләт оттурисидики мунасивәтни бузсун? бу һәқтә бир еғиз гәп қилиш, у җайға берип тәкшүрүш елип беришни тәләп қилиш, у йәрдики уйғур қериндашлиримиз үчүн көңүл бериш гунаһму? мән растинла чүшинәлмидим! ?» дәп язған иди.

Тонулған нахшичи халуқ ләвәнт 1968-йили түркийәниң адана вилайитидә дуняға кәлгән. 1992-Йилидин тартип сәнәт саһәсидә даңқ қазинип, 12 нахша пластинкиси вә 2 китаби нәшир қилинған. Түркийәдә миң мәйдандин артуқ консерт бәргән.

Пикирләр (0)
Share
Толуқ бәт