Хәтәр астидики алимлар тәшкилати хитайни уйғур алимларни қоюп беришкә чақириди

Мухбиримиз җүмә
2020-11-15
Share
Scholars_At_Risk-Robert-Quinn.png Хәтәр астидики алимлар тәшкилатиниң иҗраийә директори роберт кувин әпәндим.
Social Media

Хәтәр астидики алимлар тәшкилати очуқ хәт елан қилип, хитай рәиси ши җинпиңни уйғур аптоном районидики аталмиш «тәрбийәләш лагерлири» вә башқа тутуп туруш орунлирида тутуп турулуватқан алимлар вә оқуғучиларниң шәртсиз қоюп берилишини дәрһал капаләткә игә қилишқа, «қайта тәрбийәләш» лагерлириға хатимә берип хитайдики аз санлиқ милләт тәтқиқатчилири вә оқуғучиларниң негизлик кишилик һоқуқи вә әркинликини қоғдашқа чақирди.

Мәзкур очуқ хәтни хәтәр астидики алимлар тәшкилатиниң иҗраийә директори роберт кувин хитай рәиси ши җинпиңға қаритип елан қилипла қалмай, бәлки йәнә б д т кишилик һоқуқ алий комиссари мишел бачелет, америка кеңәш палатаси әзаси марко рубийо, явропа кеңишиниң муавин комиссари җосеф фонтеллес қатарлиқ 10 нәччә нәпәр муһим әрбабқиму қошумчә йоллиди.

У хетидә мундақ деди: «мән хәтәр астидики алимлар тәшкилатиға вакалитән ушбу хәтни йезип, хитайда ғайиб болған һәмдә шинҗаң уйғур аптоном районидики аталмиш ‹тәрбийәләш лагерлири' вә башқа тутуп туруш орунлириға қамалған дәп гуман қилинған алим вә оқуғучиларниң күнсери көпийиватқанлиқи тоғрисидики хәвәрләргә қаттиқ көңүл бөлидиғанлиқимни билдүримән. Хәтәр астидики алимлар тәшкилати сизни түрмидики алимлар вә оқуғучиларниң шәртсиз қоюп берилишигә капаләтлик қилип, ‹қайта тәрбийәләш' ишлириға хатимә беришкә, пүтүн хитайдики аз санлиқ милләт тәтқиқатчилири вә оқуғучилириниң асасий һоқуқи вә әркинликини қоғдашқа чақириду.»

Мәзкур хәттә, 2017-йили декабирда ғайиб болған шинҗаң университетиниң дуняға даңлиқ етнографийә алими раһилә давут, 2017-йили ноябирда қолға елинип, «бөлгүнчилик хаһишини намаян қилиш» җинайити билән әйибләнгән шинҗаң теббий университетиниң сабиқ мудири халмурат ғопур, 2018-йили январда өз өйидин тутуп кетилгән шинҗаң педагогика университетиниң профессори абдуқадир җалалидин қатарлиқлар алаһидә гәвдиләндүрүлгән.

Хәтәр астидики алимлар тәшкилати 39 дөләттики 500 дин артуқ университеттин тәркиб тапқан болуп, у дуняниң һәрқайси җайлиридики алимларниң кишилик һоқуқини қоғдаш, шундақла илим-пән әркинлики принсипиға болған тонушни илгири сүрүшни өзигә баш нишан қилған бир хәлқаралиқ алимлар торидур.

Чәтәлләрдики мунасивәтлик тәшкилатлар илгири 2016-йилидин буян тутуп кетилгән яки лагерларға ташланған 400 дин артуқ һәр саһә уйғур зиялийсиниң тизимликини елан қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт