Xeter astidiki alimlar teshkilati xitayni Uyghur alimlarni qoyup bérishke chaqiridi

Muxbirimiz jüme
2020-11-15
Share
Scholars_At_Risk-Robert-Quinn.png Xeter astidiki alimlar teshkilatining ijra'iye diréktori robért kuwin ependim.
Social Media

Xeter astidiki alimlar teshkilati ochuq xet élan qilip, xitay re'isi shi jinpingni Uyghur aptonom rayonidiki atalmish "Terbiyelesh lagérliri" we bashqa tutup turush orunlirida tutup turuluwatqan alimlar we oqughuchilarning shertsiz qoyup bérilishini derhal kapaletke ige qilishqa, "Qayta terbiyelesh" lagérlirigha xatime bérip xitaydiki az sanliq millet tetqiqatchiliri we oqughuchilarning négizlik kishilik hoquqi we erkinlikini qoghdashqa chaqirdi.

Mezkur ochuq xetni xeter astidiki alimlar teshkilatining ijra'iye diréktori robért kuwin xitay re'isi shi jinpinggha qaritip élan qilipla qalmay, belki yene b d t kishilik hoquq aliy komissari mishél bachélét, amérika kéngesh palatasi ezasi marko rubiyo, yawropa kéngishining mu'awin komissari joséf fontéllés qatarliq 10 nechche neper muhim erbabqimu qoshumche yollidi.

U xétide mundaq dédi: "Men xeter astidiki alimlar teshkilatigha wakaliten ushbu xetni yézip, xitayda ghayib bolghan hemde shinjang Uyghur aptonom rayonidiki atalmish 'terbiyelesh lagérliri' we bashqa tutup turush orunlirigha qamalghan dep guman qilin'ghan alim we oqughuchilarning künséri köpiyiwatqanliqi toghrisidiki xewerlerge qattiq köngül bölidighanliqimni bildürimen. Xeter astidiki alimlar teshkilati sizni türmidiki alimlar we oqughuchilarning shertsiz qoyup bérilishige kapaletlik qilip, 'qayta terbiyelesh' ishlirigha xatime bérishke, pütün xitaydiki az sanliq millet tetqiqatchiliri we oqughuchilirining asasiy hoquqi we erkinlikini qoghdashqa chaqiridu."

Mezkur xette, 2017-yili dékabirda ghayib bolghan shinjang uniwérsitétining dunyagha dangliq étnografiye alimi rahile dawut, 2017-yili noyabirda qolgha élinip, "Bölgünchilik xahishini namayan qilish" jinayiti bilen eyiblen'gen shinjang tébbiy uniwérsitétining sabiq mudiri xalmurat ghopur, 2018-yili yanwarda öz öyidin tutup kétilgen shinjang pédagogika uniwérsitétining proféssori abduqadir jalalidin qatarliqlar alahide gewdilendürülgen.

Xeter astidiki alimlar teshkilati 39 dölettiki 500 din artuq uniwérsitéttin terkib tapqan bolup, u dunyaning herqaysi jayliridiki alimlarning kishilik hoquqini qoghdash, shundaqla ilim-pen erkinliki prinsipigha bolghan tonushni ilgiri sürüshni özige bash nishan qilghan bir xelq'araliq alimlar toridur.

Chet'ellerdiki munasiwetlik teshkilatlar ilgiri 2016-yilidin buyan tutup kétilgen yaki lagérlargha tashlan'ghan 400 din artuq her sahe Uyghur ziyaliysining tizimlikini élan qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet