Д у қ 2020-йилини «хәлқара уйғур мәдәнийәт фестивали йили» қилип бекиткәнликини елан қилди

2020-01-08
Елхәт
Пикир
Share
Принт
Д у қ 2020-йилини «хәлқара уйғур мәдәнийәт фестивали йили» қилип бекиткәнликини елан қилди. 2020-Йили 7-январ.
Д у қ 2020-йилини «хәлқара уйғур мәдәнийәт фестивали йили» қилип бекиткәнликини елан қилди. 2020-Йили 7-январ.
Social Media

Д у қ рәиси долқун әйса әпәнди 7-январ күни қурултайниң тор телевизийәсидә нутуқ сөзләп, д у қ ниң 2020-йилини муһаҗирәттики уйғурларниң «хәлқара уйғур мәдәнийәт фестивали йили» қилип бекиткәнликини елан қилди.

Д у қ рәһбәрлиридин игилишимизчә, 2020-йилини муһаҗирәттики уйғурларниң «хәлқара уйғур мәдәнийәт фестивали йили» қилип бекитиш мәсилиси 2019-йили 12-айниң 7-күни белгийә пайтәхти бирюсселда чақирилған д у қ иҗраийә комитетиниң 5-нөвәтлик йиғинида қарар қилинған. 
Д у қ рәиси долқун әйса әпәндиниң билдүрүшичә, хитай һакимийитиниң уйғур диярида елип бериватқан җаза лагерлири сиясити ялғуз етник қирғинчилиқнила әмәс, өз нөвитидә йәнә рушән һалда мәдәнийәт-сән´әт қирғинчилиқиниму өз ичигә алған болуп, муһаҗирәттики уйғур сәнәткарлирини һәрикәткә кәлтүрүп тутқундики сәнәткарларниң авазини дуняға аңлитиш нөвәттики миллий дәваниң муһим бир тәркиби қисми санилидикән. 

Долқун әйса әпәнди 2020-йилини муһаҗирәттики уйғурларниң «хәлқара уйғур мәдәнийәт фестивали йили» қилип бекитиштики мәқсәт һәққидә тохталғанда, муһаҗирәттики дәвани һәм сиясий йолда һәм мәдәний бир шәкилдә баравәр елип бериш арқилиқ уйғурлар мәсилисини хәлқарада даима җиддий тема һалида тутуп туруш, хитайниң уйғур миллий һәрикитини терроризм билән қарилаш шүйқәстини бит-чит қилишниң зөрүрликини тәкитлиди.

Мюнхендики уйғур җамаәт әрбаби аблимит турсун әпәнди «хәлқара уйғур мәдәнийәт фестивали йили» тәйярлиқ комитетиниң әзалиридин бири болуп, у бу хусуста тохталғанда мәдәнийәт фестивали арқилиқ уйғурлар мәсилисини дуняға тонутушниң әһмийитини тилға алди. У сөзидә, сәнәтниң милләтни ойғитиш, кишиләр қәлбигә тәсир қилиштики роли һәққидә тохталди. 

Д у қ рәһбәрлириниң билдүрүшичә, бу мәдәнийәт фестивали 2020-йили 6-айда алди билән мюнхен шәһридә башлинип, арқидин явропадики тәсири күчлүк бирқисим дөләтләрниң пайтәхти яки сиясий, мәдәнийәт мәркизи болған чоң шәһәрлиридә, мәсилән: берлин, лондун, паризһ, амстердам, бирюссел, стокһолим қатарлиқ шәһәрләрдә давамлишидикән. Паалийәттә сән´әт номурлири, миллий мәдәнийәткә даир боюмларниң көрәклири, җаза лагерлириға аит рәсим көргәзмиси қатарлиқлар бир гәвдә һалида намайән қилинидикән.

Пикирләр (0)
Share
Толуқ бәт