D u q 2020-yilini "Xelq'ara Uyghur medeniyet féstiwali yili" qilip békitkenlikini élan qildi


2020-01-08
Share
Uyghur-Medeniyet-Festiwali-Yili-2020.jpg D u q 2020-yilini "Xelq'ara Uyghur medeniyet féstiwali yili" qilip békitkenlikini élan qildi. 2020-Yili 7-yanwar.
Social Media

D u q re'isi dolqun eysa ependi 7-yanwar küni qurultayning tor téléwiziyeside nutuq sözlep, d u q ning 2020-yilini muhajirettiki Uyghurlarning "Xelq'ara Uyghur medeniyet féstiwali yili" qilip békitkenlikini élan qildi.

D u q rehberliridin igilishimizche, 2020-yilini muhajirettiki Uyghurlarning "Xelq'ara Uyghur medeniyet féstiwali yili" qilip békitish mesilisi 2019-yili 12-ayning 7-küni bélgiye paytexti biryussélda chaqirilghan d u q ijra'iye komitétining 5-nöwetlik yighinida qarar qilin'ghan. 
D u q re'isi dolqun eysa ependining bildürüshiche, xitay hakimiyitining Uyghur diyarida élip bériwatqan jaza lagérliri siyasiti yalghuz étnik qirghinchiliqnila emes, öz nöwitide yene rushen halda medeniyet-sen´et qirghinchiliqinimu öz ichige alghan bolup, muhajirettiki Uyghur sen'etkarlirini heriketke keltürüp tutqundiki senetkarlarning awazini dunyagha anglitish nöwettiki milliy dewaning muhim bir terkibi qismi sanilidiken. 

Dolqun eysa ependi 2020-yilini muhajirettiki Uyghurlarning "Xelq'ara Uyghur medeniyet féstiwali yili" qilip békitishtiki meqset heqqide toxtalghanda, muhajirettiki dewani hem siyasiy yolda hem medeniy bir shekilde barawer élip bérish arqiliq Uyghurlar mesilisini xelq'arada da'ima jiddiy téma halida tutup turush, xitayning Uyghur milliy herikitini térrorizm bilen qarilash shüyqestini bit-chit qilishning zörürlikini tekitlidi.

Myunxéndiki Uyghur jama'et erbabi ablimit tursun ependi "Xelq'ara Uyghur medeniyet féstiwali yili" teyyarliq komitétining ezaliridin biri bolup, u bu xususta toxtalghanda medeniyet féstiwali arqiliq Uyghurlar mesilisini dunyagha tonutushning ehmiyitini tilgha aldi. U sözide, sen'etning milletni oyghitish, kishiler qelbige tesir qilishtiki roli heqqide toxtaldi. 

D u q rehberlirining bildürüshiche, bu medeniyet féstiwali 2020-yili 6-ayda aldi bilen myunxén shehride bashlinip, arqidin yawropadiki tesiri küchlük birqisim döletlerning paytexti yaki siyasiy, medeniyet merkizi bolghan chong sheherliride, mesilen: bérlin, londun, parizh, amstérdam, biryussél, stokholim qatarliq sheherlerde dawamlishidiken. Pa'aliyette sen´et nomurliri, milliy medeniyetke da'ir boyumlarning körekliri, jaza lagérlirigha a'it resim körgezmisi qatarliqlar bir gewde halida namayen qilinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.