Prézidént bush: Uyghur musulmanlirigha oxshash azadliqi üchün tirmishiwatqan kishilerge éhtiram bildürimiz

 Prézidént bush nutiqining xitay heqqidiki qisimida Uyghurlar, tibetler we yer asti xristi'an murtlirini, dunya Uyghur qurultiyi re'isi rabiye qadir xanim, tibet rohani dahiysi we bezi xitay öktichi zatlirini tilgha aldi.

Bush mundaq deydu " biz xitayda diniy erkinlik üchün izdiniwatqan ashu kishilerni unutmaymiz, biz yene Uyghur musulmanlirigha oxshash öz azadliqi üchün tirmishiwatqan ashu kishilerge éhtiram bildürimiz. Men rabiye qadir bilen körüshüsh sheripige muyesser boldum. Men yene xitaydiki yer asti xristi'an murtlirini körüsh sheripige ige boldum shundaqla biz yene, dalay lama we tibet buddistlirining jasaritige éhtiram bildürimiz ."

Bush Uyghur azadliqi üchün izden'güchilerge éhtiram bildürüshtin birqanche kün ilgiri, ürümchide saqchilar " tangnuri baghchisi" diki bir binagha hujum qilip, 5 Uyghur yashni öltürgen, qeshqerde 5 Uyghur yashqa siyasiy sewebler tüpeyli ölüm jazasi bérilgen idi.

Prézidént bush nutuqida yene, xitay dölet re'isi xu jintaw bilen axirqi qétim körüshkende uninggha töwendiki sözlerni yetküzgenlikini bildürdi": özining erkinliki üchün küresh qilghuchilar bolidiken, amérika ular bilen bir mewqede turidu."

Prézidént bush xu jintaw bilen axirqi qétim yéqinda yaponiyining xokkaydo arilidiki 8 dölet guruhining bashliqlar yighinida uchrashqan bolup, ular siyasiy erkinlik, diniy erkinlik we kishilik hoquq mesililirini muzakire qilghan idi. Bush béyjing olimpik yighinining 8 ‏ - awghusttiki échilish murasimigha barghanda xitay rehberlirige yuqiriqi mesililerni yene tekitleydighanliqini bildürmekte.