Qazaqistan Uyghurliri yil axirida xeyrixahliq heriketlirini toxtatmidi

Ixtiyariy muxbirimiz oyghan
2020-12-30
Share
Qazaqistan Uyghurliri yil axirida xeyrixahliq heriketlirini toxtatmidi "Janan" jem'iyetlik fondi ötküzgen xeyrxahliq pa'aliyitidin körünüsh. 2020-Yil 26-dékabir, almuta.
RFA/Oyghan

Qazaqistan Uyghurlirining her yili xeyrixahliq ishlirini yürgüzüp, köp baliliq a'ililerge, yitim-yésirlargha, mejruh balilargha, tebi'iy apettin zerdap chekkenlerge we bashqilargha maddiy yardem körsitiwatqanliqi melum. Bu yil pütkül dunyagha tarqighan korona wirusi wabasi munasiwiti bilen peyda boluwatqan qiyinchiliqlargha qarimay, qazaqistanning her sheher we yézilirida yashawatqan Uyghur jama'etchiliki xeyr-saxawet ishlirini yenimu dawam qilip kelgenidi. Wabaning yene küchiyishi sewebidin qazaqistan hökümitining elde körüwatqan bixeterlik charilirini qet'iy saqlighan halda yil axiridimu xeyrixahliq heriketliri toxtimighan.

Radiyomiz ziyaritini qobul qilghan jumhuriyetlik Uyghur étno-medeniyet merkizi yénidiki "Janan" jem'iyetlik fondining mudiri mizen'gül awamisimowa xanim xeyrixahliq ishlirini élip bérishta qazaqistandiki bashqimu Uyghur jem'iyetlik birleshmiliri qatarida "Janan" fondiningmu aktip pa'aliyet yürgüzwatqanliqini otturigha qoyup, mundaq dédi: "2020-Yil qiyinchiliqlargha qarimay 'janan' fondi üchün nahayiti yaxshi ishlar, teshebbuslar bilen ötti, dep oylaymen. 'janan' fondi bu yili xeyrixahliq ishlarning béshida turdi. U bolsimu, qazaqistanda aghriqqa duchar bolghan balilargha yardem berduq. 50 Baligha ozuq-tülük séwiti qilduq. Uningdin bashqa turmushi nachar a'ililerge özimizning yardimini körsettuq. Shuning bilen bille nizamnamimizge baghliq her yili bir mektepke yardem qilimiz. Bu yili biz chuluqay mektipige üstel we orunduqlarni élip berduq. Turmushi nachar 50 ke yéqin ademge 'Uyghur awazi' gézitini yézip berduq."

Bu yilning axirida Uyghurlar zich olturaqlashqan almuta shehirining newruzbay nahiyesining Uyghur medeniyet merkizi teripidinmu xeyr-saxawet ishliri élip bérilghan idi. Igilinishiche, mezkur nahiye jama'etchiliki arisida bolupmu "R-wiziyon" shirkitining prézidénti rinat osmanof eyni waqitlarda almuta shehiride "Dostluq" tenheriket mektipini sélip, balilarning heqsiz meshqlendürüsh, ehwali nachar a'ililerning balilirini ten-heriket kiyimliri bilen teminlesh we bashqimu köpligen xeyr-saxawet ishlirini élip barghanken. 22-Dékabir küni u taldiqorghan shehiridiki anglash we sözlesh qabiliyiti töwen, éghir késelge muptilla bolghan 120 baligha yéngi yilliq archa murasimini uyushturup bergeniken.

Almuta wilayitining Uyghur nahiyelik Uyghur medeniyet merkiziningmu bu yili bir qatar xeyrixahliq ishlarni emelge ashurghanliqi melum. Korona wirusi wabasining tarqilishi sewebidin memlikette élan qilighan pewqul'adde halet we karantin tertipi munasiwiti bilen mezkur merkez teripidin bu yönilishte köpligen ishlar qilin'ghanken.

Radiyomiz ziyaritini qobul qilghan Uyghur nahiyelik Uyghur medeniyet merkizining katipi gülminem toxtayéwa xanim mundaq dédi: "Öktebir éyidin bashlap bu merkezge rexmetjan sudjakof rehber bolup teyinlinip, merkez ishlirini téximu janlanduruwetti. Az waqit ichide u orunbasarliri bilen nahiyemizdiki ghaljat, ketmen, aqtam, tügmen qatarliq barliq yézilarni arilap, yashlirimizni bilimlik we yaramliq insanlardin étip terbiyileshke chaqirdi. Hazirqi weziyetke baghliq turmushi nachar a'ile balilirigha we ten-salametliki nachar balilargha 250 dane yéngi yilliq sogha tarqatti."

Igilishimizche, mundaq xeyr-saxawet ishliri almuta wilayitining talghir nahiyisige qarashliq qayrat yézisidimu élip bérilghan. Jumhuriyetlik Uyghur étno-medeniyet merkizi yénidiki nuraniy anilar kéngishining re'isi güljahan muratowa turmushi nachar 10 a'ilining balilirigha yéngi yilliq soghilirini tapshurghanken. Güljahan muratowa köp baliliq a'ililerni turushluq öy bilen teminlesh ishlirinimu dawamliq élip bériwatqan Uyghur saxawetchilirining biriken.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet