Xitay hökümiti amérika bilen qarshilishishning ornigha, di'alogni tallashni otturigha qoyghan

Xitay bash ministéri li chyang 23-mart yekshenbe küni amérika kéngesh palata ezasi stiw deynis bilen béyjingda körüshkinide, xitay bilen amérikaning di'alogni tallap öz-ara tirkishishning aldini élishi kéreklikini otturigha qoyghan. Li chyang sözide ikki döletning bir muhim tarixiy basquchqa yétip kelgenlikini eskertip turup, xitay re'isi shijinping amérika prézidénti donald tramp bilen yanwarda téléfonda körüshkinide ikki döletning dost we shérik bolalaydighanliqini, shundaqla bir-birining muweppeqiyitige töhpe qoshalaydighanliqini bildürgen.

Amérika birleshme agéntliqining bu toghrisida bergen xewiride éytilishiche, amérika kéngesh palata ezasi deynis prézidént trampning yéqinliridin bolup, u bu qétim béyjinggha tramp bilen shijinping arisidiki aliy uchrishishning ulini salghili, shundaqla amérika üchün muhim bolghan féntanil mesilisini xitay bilen sözleshkili kelgen iken. U ötken peyshenbe küni béyjinggha yétip kelgen bolup, xitayning mu'awin bash ministéri xéliféng bilen körüshkinide, prézidént trampning xitaydin kélidighan féntanil zeherlik chékimlik terkiblirining éqip kirishini toxtitishni otturigha qoyghan.

Xitayning shinxu'a agéntliqining ikki terepning bu körüshishi toghrisida bergen xewiride éytilishiche, li chyang soda urushida utup chiqidighan bir terepning yoqliqini bildürip, amérika shirketlirining xitaygha kélip tereqqiy qilish pursetliridin behriman bolsa bolidighanliqini éytqan. Li chyang yekshenbe ettigende échilghan xitay tereqqiyat munbirida söz qilip, xitay iqtisadining tashqiy seweplerdin kütülmigen tewrinishke duch kélidighanliqini bildürgen.

Xitayning iqtisadi yéqinqi aylardin béri zor arqigha chékin'gen bolup, s n n ning yéqindiki mulahizisige qarighanda xitay hökümiti amérika prézidénti trampning xitay bilen élip baridighan soda urushidin qattiq endishe qilmaqta iken.