Хитай таратқулириниң һиндистан тоғрисидики баянати қаттиқ ғулғула қозғиди

Ихтиярий мухбиримиз азиғ
2021-05-03
Share
Хитай таратқулириниң һиндистан тоғрисидики баянати қаттиқ ғулғула қозғиди Коммунистик партийәси сиясий-қанун комитетиниң башқурулушидики хәвәр суписи "чаңән" ториниң микро блогида "хитайчә от йеқиш билән һиндистанчә от йеқишниң пәрқи" темисидики язмиға қоюлған сүрәт. 2021-Йили апрел.
Social Media

1-Май күни хитай коммунистик партийәси сиясий-қанун комитетиниң башқурулушидики хәвәр суписи "чаңән" ториниң микро блогида "хитайчә от йеқиш билән һиндистанчә от йеқишниң пәрқи" дегән темида бир язма һәмбәһирләнгән. Мәзкур язминиң астиға һиндистандики күндилик юқум саниниң 400 миңдин ашқанлиқи әскәртилгән.

Мәзкур язма билән биллә һәмбәһирләнгән рәсимниң оң тәрипидә ваба сәвәблик һиндистанда вапат болғанларниң җәситиниң көйдүрүлүватқан көрүнүши йәр алған болуп, сол тәрипигә хитайниң 29-апирил қоюп берилгән тиәнхе ядролуқ моделиниң көрүнүши йәрләштүрүлгән.

Мәзкур рәсим һәмбәһирләнгәндин кийин хитайниң даңлиқ микро блоги "вийбо" да қаттиқ ғулғула қозғалған болуп, кишиләр мәзкур рәсим вә язминиң интайин уйғунсиз икәнликини билдүрүшкән.

Хитайниң һиндистанға болған бу хил өчмәнлики вә нәприти кишиләрниң қаттиқ диққитини қозғиған болуп, түркийәдики хитай ишлири мутәхәссиси мәмәттохти атавулла әпәндим мәзкур өчмәнликниң сәвәблири тоғрисида тәпсилий мәлумат бәрди.

Хитай коммунистик партийәсигә тәвә мәзкур ахбарат қурулуши вәқәниң улғийип кетиши сәвәблик, мәзкур рәсимни тордин өчүрүвәткән.

"билумберг" ниң хәвәр қилишичә, хитай ташқий ишлар министирлиқи мәзкур язма һәққидә инкас қайтуруп: "көпчиликниң хитай һөкүмитигә вә һиндистанниң юқумға қарши күришини қоллайдиған асасий еқимдики җамаәт пикригә диққәт қилишини үмид қилимиз," дегән.

Мәзкур рәсимлик язма ши җинпиңниң һиндистан баш министири нарендра модиға Covid-19 паҗиәсидин һал сораш учури әвәткәндин бир күн кейинла елан қилинған.

Хитай билән һиндистан оттурисидики мунасивәт бир қанчә он йилдин буян чегра мәсилилири сәвәблик һәмишә җиддий һаләтни сақлап келиватқан болуп, мутәхәссисләр келәчәктә америка башчилиқидики ғәрб дөләтлириниң хитайға қарши иттипақида һиндистанниң муһим рол ойнайдиғанлиқини тәкитләшмәктә.

Мәмәттохти атавулла әпәнди хитай билән һиндистан мунасивәтлириниң нөвәттики әһвали һәққидә көз қарашлирини биз билән ортақлашти.

Һиндистан корона вируси вабасиға қарши күрәштә қаттиқ қийин әһвалда қалған дөләтләрдин бири болуп, һиндистан сәһийә министирлиқиниң санлиқ мәлуматлириға қариғанда, өткән 24 саәт ичидә 368 миң 147 йеңи юқумланғучи билән һиндистанниң омумий юқумлиниш сани 19 милйон 930 миңға йәткән, қаза қилғанларниң омумий сани 3417 нәпәр ешип, 218 миң 959 гә йәткән.

Хитай коммунист партийәсиниң һиндистанлиқларниң өлүм әһвалини мәсхирә қилиш обйекти сүпитидә оттуриға ташлиши кишиләрни қаттиқ һәйран қалдурған болуп, мутәхәссисләр хитай коммунист партийәсиниң мустәбитлик вә шовинизмлиқ сияситидә барғансери радикаллишиватқанлиқини тәкитләшмәктә.

Голландийәдики вәзийәт анализчиси асийә уйғур ханим зияритимизни қобул қилип, хитайниң мәзкур рәсимлик язмисиниң зади қандақ бир сигнални беридиғанлиқи тоғрисида көз қарашлирини ейтип өтти.

Көзәткүчиләр йиллардин буян хитайниң уйғурларға қаратқан рәһимсиз вә инсанлиқтин йирақ позитсийәсиниң униң ташқий сияситидиму өзини көрситиватқанлиқини, дипломатик баянатлириниң барғансери хәлара дипломатийә әхлақидин узақлишиватқанлиқини ейтишмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт