Һиндистан өз әскәрлиригә алаһидә әһвалларда қорал ишлитиш рухсити бәргән

Мухбиримиз җүмә
2020-06-22
Share
india-china-conflict-2020.jpg 15-Июн кәчтә шәрқий ладақ райониға қарашлиқ һиндистанниң хитай билән чегрилинидиған галван җилғисида хитай әскәрлири һиндистан әскәрлиригә һуҗум қилип, 20 нәччә һиндистан әскирини өлтүргән.
Social Media

Қарақурум тағлириға җайлашқан һиндистан-хитай чеграсида йүз бәргән маҗирада һиндистан әскәрлири өлгәндин кейин, һиндистан тәрәп әмәлий контрол линийәсидики уруш қилиш қаидисини өзгәртип, өз әскәрлиригә алаһидә әһвалларда қорал ишлитиш рухсити бәргән.

15-Июн кәчтә шәрқий ладақ райониға қарашлиқ һиндистанниң хитай билән чегрилинидиған галван җилғисида хитай әскәрлири һиндистан әскәрлиригә һуҗум қилип, 20 нәччә һиндистан әскирини өлтүргәнлики билдүрүлгән.

"сода ички хәвәрлири" ториниң хәвәр қилишичә, һиндистан әскәрлири мәзкур чеграда қорал ишләтмәслик буйруқиға әмәл қилип, хитай әскәрлири һуҗум қилғанда қорал ишләтмигән.

Мәлуматларға қариғанда, һиндистан вә хитай тәрәп 1996-вә 2005-йиллири чегра чарлаш җәрянида келип чиққан тоқунушларда қорал ишләтмәслик һәққидә келишим һасил қилған.

Мәзкур паҗиәдин кейин һиндистан даирилири уруш қилиш қаидисини өзгәртип өз әскәрлиригә "вәзийәткә тактикилиқ қариши турушта толуқ әркинлик" бәргән. Нөвәттә һиндистан командилири алаһидә әһвалларға тақабил туруш үчүн өз иликидики барлиқ имканлардин толуқ пайдилинип, қорал ишлитиш буйруқи бериш һоқуқиға игә қилинған.

Илгири мәзкур чеграда қорал ишлитиш һиндистан тәрәпниң "уруш қилиш қаидиси" дә йоқ икән.

Хәвәрдә һиндистан һөкүмитидики өзини ашкарилашни халимиған бир хадимниң ейтқанлирини нәқил елип көрситишичә, икки тәрәп арисидики қучақлашма җәң 6, 7 саәт әтрапида давам қилған. 

У йәнә, тоқунушта һәр бир һиндистан әскиригә бәштин хитай әскири тоғра кәлгәнликиниму қошумчә қилған.

Бу қучақлашма җәңдә хитай тәрәптинму адәм чиқим болғанлиқини мәлум. Бу һәқтики учурларни хитай тәрәп етирап қилған болсиму, әмма өлгән адәм санини сир тутқан.

Ройтерсиниң бир һиндистан һөкүмәт хадимниң ейтқанлиридин нәқил елип хәвәр қилишичә, мәзкур тоқунушта хитай тәрәптин 43 әскәр өлгән. 

Бу тоқунуш, 1962-йили икки тәрәп арисида йүз бәргән қораллиқ тоқунуштин буянқи әң еғир тоқунушларниң бири дәп қаралмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт