Hindistan öz eskerlirige alahide ehwallarda qoral ishlitish ruxsiti bergen

Muxbirimiz jüme
2020-06-22
Share
india-china-conflict-2020.jpg 15-Iyun kechte sherqiy ladaq rayonigha qarashliq hindistanning xitay bilen chégrilinidighan galwan jilghisida xitay eskerliri hindistan eskerlirige hujum qilip, 20 nechche hindistan eskirini öltürgen.
Social Media

Qaraqurum taghlirigha jaylashqan hindistan-xitay chégrasida yüz bergen majirada hindistan eskerliri ölgendin kéyin, hindistan terep emeliy kontrol liniyesidiki urush qilish qa'idisini özgertip, öz eskerlirige alahide ehwallarda qoral ishlitish ruxsiti bergen.

15-Iyun kechte sherqiy ladaq rayonigha qarashliq hindistanning xitay bilen chégrilinidighan galwan jilghisida xitay eskerliri hindistan eskerlirige hujum qilip, 20 nechche hindistan eskirini öltürgenliki bildürülgen.

"Soda ichki xewerliri" torining xewer qilishiche, hindistan eskerliri mezkur chégrada qoral ishletmeslik buyruqigha emel qilip, xitay eskerliri hujum qilghanda qoral ishletmigen.

Melumatlargha qarighanda, hindistan we xitay terep 1996-we 2005-yilliri chégra charlash jeryanida kélip chiqqan toqunushlarda qoral ishletmeslik heqqide kélishim hasil qilghan.

Mezkur paji'edin kéyin hindistan da'iriliri urush qilish qa'idisini özgertip öz eskerlirige "Weziyetke taktikiliq qarishi turushta toluq erkinlik" bergen. Nöwette hindistan komandiliri alahide ehwallargha taqabil turush üchün öz ilikidiki barliq imkanlardin toluq paydilinip, qoral ishlitish buyruqi bérish hoquqigha ige qilin'ghan.

Ilgiri mezkur chégrada qoral ishlitish hindistan terepning "Urush qilish qa'idisi" de yoq iken.

Xewerde hindistan hökümitidiki özini ashkarilashni xalimighan bir xadimning éytqanlirini neqil élip körsitishiche, ikki terep arisidiki quchaqlashma jeng 6, 7 sa'et etrapida dawam qilghan. 

U yene, toqunushta her bir hindistan eskirige beshtin xitay eskiri toghra kelgenlikinimu qoshumche qilghan.

Bu quchaqlashma jengde xitay tereptinmu adem chiqim bolghanliqini melum. Bu heqtiki uchurlarni xitay terep étirap qilghan bolsimu, emma ölgen adem sanini sir tutqan.

Roytérsining bir hindistan hökümet xadimning éytqanliridin neqil élip xewer qilishiche, mezkur toqunushta xitay tereptin 43 esker ölgen. 

Bu toqunush, 1962-yili ikki terep arisida yüz bergen qoralliq toqunushtin buyanqi eng éghir toqunushlarning biri dep qaralmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet